တောင်ကြီးမြို့မဈေးရဲ့ မြောက်ဖက်၊ ကုန်သည်လမ်းပေါ်မှာ ယာဉ်ကြော ပိတ်ဆို့မှုတွေနဲ့ ဆိုင်ကယ် မကြာခဏ ပျောက်ဆုံးမှုတွေ ဖြစ်နေလို့ ဗိုလ်ချုပ်လမ်းမကြီးဘေးရှိ UCA တိုက်တန်းပေါ် ပြောင်းရွှေ့ ရပ်နားခိုင်းတာလို့ ဆိုပါတယ်။

ဈေးနားမှာ မနေ့က လာပြောပြီး ဗီနိုင်းတွေ ကပ်သွားတယ်။ အဲဒီ ဆိုင်ကယ်ရပ်နားရာ နေရာမှာ ဆိုင်ကယ် ခဏခဏပျောက်နေလို့ မိန်းလမ်းဘေးက နေရာကို ပြောင်းရပ်ခိုင်းထားတယ်။ သတ်မှတ်‌နေရာမှာ ပိုက်ဆံပေးပြီး ရပ်တာတောင် ဆိုင်ကယ်ပျောက်နေတာ ဆိုတော့ ကျန်တဲ့နေရာတွေဆို မစဉ်းစားရဲဘူး 

လို့ ဒေသခံ တစ်ဦးက ပြောပါတယ်။

အဲဒီ ဆိုင်ကယ် ရပ်နားရာ နေရာ အပါအဝင် တောင်ကြီးမြို့ နေရာအနှံ့မှာ တစ်ရက်ကို ဆိုင်ကယ် ၅ စီး ထက်မနည်း ခိုးယူခံနေရပြီး ရဲစခန်းမှာ အမှုဖွင့် တိုင်ကြားပေမယ့် ပြန်လည် တွေ့ရှိတဲ့ အရေအတွက် အလွန် နည်းပါးတယ်လို့ မြို့ခံတွေက ဆိုပါတယ်။

စစ်ကောင်စီရဲ့ အရှေ့ပိုင်းတိုင်း စစ်ဌာနချုပ် အပြင် တပ်ပေါင်းများစွာနဲ့ ပြည်နယ်၊ ခရိုင်ရဲရုံးတို့ အခြေစိုက်တဲ့ တောင်ကြီးမြို့မှာ စစ်တပ်က အာဏာသိမ်းပြီးနောက် ခိုးဆိုးလုနှိုက်တွေ ပေါများလာပေမယ့် စစ်ကောင်စီနဲ့ ရဲတပ်ဖွဲ့က အရေးတယူ ရှာဖွေ ဖမ်းဆီးတာတွေ မလုပ်ဘူးလို့ ဒေသခံတွေက ပြောပါတယ်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)