မဲခေါင်၊ ဖေဖော်ဝါရီ ၁၁
ရခိုင်မှာရောက်နေတဲ့ တပ်မ – ၁၁ တပ်မမှူး ဗိုလ်မှူးချုပ်မင်းမင်းထွန်းကို ရခိုင့်တပ်တော် – AA က ဖေဖော်ဝါရီလ ၈ရက်မှာ အသေဖမ်းမိတယ်လို့ ပန်ဆန်းနဲ့နီးစပ်တဲ့ သတင်းရင်းမြစ်က မဲခေါင်ကို အတည်ပြုပါတယ်။
မြောက်ဦးမြို့ကို AA က တိုက်ခိုက်သိမ်းပိုက်လိုက်ပြီးတဲ့နောက်မှာ ဗိုလ်မှူးချုပ်မင်းမင်းထွန်းရဲ့ အလောင်းကို ရရှိခဲ့တာဖြစ်ပြီး သတ်သေသွားတာဖြစ်နိုင်တယ်လို့ အဲဒီသတင်းရင်းမြစ်က ပြောပါတယ်။
“သူ့နောက်တန်းဌာနချုပ်က မြောက်ဦးလေ။ မြောက်ဦးက ၇ရက်၊ ၈ရက်လောက်ကတည်းက ပြောင်နေပြီ။ ဒီကောင်တွေ(မြန်မာစစ်တပ်)က အရင်က ဗိုလ်မှူးချုပ်လောက်ကို ရဟတ်ယာဉ်နဲ့ ကယ်ထုတ်သေးတယ်။ ကွမ်လုံတိုက်ပွဲနောက်ပိုင်းကတည်းက မကယ်ထုတ်တော့ဘူး။ မနိုင်ရင် အသေခံဆိုတဲ့ သဘောမျိုးဖြစ်သွားတယ်” လို့ သူက ပြောပါတယ်။
အခုသေဆုံးသွားတဲ့ ဗိုလ်မှူးချုပ်မင်းမင်းထွန်းဟာ တာချီိလိတ်မြို့နယ် ဗျူဟာမှူးအဖြစ် လုပ်ကိုင်သွားသူဖြစ်ပြီး သူ့ရဲ့ အမျိုးသမီးဟာ ဆရာဝန်အဖြစ်ကနေ စစ်တပ်အာဏာသိမ်းချိန်မှာ CDM ပြုလုပ်ပြီး သူနဲ့ကွာရှင်းခဲ့တယ်လို့ တာချီလိတ်မြို့ သတင်းရင်းမြစ်တွေထံက သိရပါတယ်။ ဗိုလ်မှူးချုပ်မင်းမင်းထွန်းဟာ တာချီလိတ်မှာရှိစဉ်က ဗိုလ်မှူးကြီးရာထူးဖြစ်ပြီး တပ်မ-၁၁ ကိုပြောင်းရွှေ့သွားချိန်မှာ ဗိုလ်မှူးချုပ်ရာထူးတိုးသွားတာ ဖြစ်ပါတယ်။
မြန်မာစစ်တပ်မှာ ဗိုလ်မှူးချုပ်မင်းမင်းထွန်း ၂ဦးရှိပြီး တစ်ဦးကို TNLA က ၂၀၂၃ခုနှစ် ဒီဇင်ဘာလ ၁၆ရက် ရှမ်းမြောက်၊ နမ့်ဆန်တိုက်ပွဲမှာ ဖမ်းဆီးရမိခဲ့ကာ နောက်တစ်ဦးကိုတော့ AA က မြောက်ဦးမှာ အသေဖမ်းမိခဲ့တာဖြစ်ပါတယ်။
TNLA က နမ့်ဆန်က ဗိုလ်မှူးချုပ်မင်းမင်းထွန်းကို ဖမ်းဆီးရမိချိန်မှာ သတင်းမီဒီယာအချို့မှာ တာချီလိတ်မှာ ဗျူဟာမှူးလုပ်သွားတဲ့ ဗိုလ်မှူးချုပ်မင်းမင်းထွန်းနဲ့ မှားယွင်းဖော်ပြတာကြောင့် သူ့အတွက် ယတြာကျေတယ်ဆိုပြီး သဘောကျခဲ့သေးတယ်လို့ တာချီလိတ်မြို့က သူနဲ့နီးစပ်သူတွေက မဲခေါင်ကို ပြောပါတယ်။
“တပ်မ – ၁၁ နှစ်ပတ်လည်နေ့တုန်းကတောင် တာချီလိတ်က သူ့လူတွေကို အမှတ်တရအင်္ကျီပို့ပေးသေးတယ်။ ပထမ မင်းမင်းထွန်းနဲ့သူ့ကို မှားတုန်းက သူယတြာကျေသွားပြီ မသေတော့ဘူးဆိုပြီး ပျော်နေသေးတာ။ အဲ့လူက တာချီလိတ်မှာလည်း အသေရှာ(ငွေ)သွားသေးတာ။ လူလည်။ ပထမက ရှမ်းမြောက်မှာ ပွဲကြမ်းနေတော့ ရခိုင်ကို ရအောင်ပြောင်းသွားတာ” လို့ သူက ပြောပါတယ်။
မင်းမင်းထွန်း ၂ယောက်လုံးဟာ မင်းအောင်လှိုင်အားကိုးတဲ့လူတွေဖြစ်ပြီး ဗေဒင်၊ ယတြာတွေနဲ့ နာမည်ကိုကြည့်ပြီး ဆုံးဖြတ်တာမျိုးဖြစ်မယ်လို့ စစ်တပ်အရေးလေ့လာသူတစ်ဦးက ပြောပါတယ်။
“သူတို့က ဗေဒင်ယတြာတွေလေဗျာ။ မင်းအောင်လှိုင်၊ မင်းမင်းထွန်းဆိုပြီး။ ကြာသပတေးသားလွှတ်၊ တပ်မမှူးခန့်တာ။ တိုက်ဆိုင်တာမဟုတ်ဘူး။ ဒဲ့ကြီး။ ဟိုကောင်က တပ်မ – ၁၀၁၊ ဒီကောင်က ၁၁။ ဗမာစစ်ဗိုလ်က ပြည်သူပြောလည်းမယုံဘူး။ ဘယ်သူပြောပြောမယုံဘူး။ သူတို့မယား ကြီး၊ ငယ်တွေရယ်၊ ဗေဒင်ဆရာရယ်ပြောရင် အကုန်ယုံတယ်။ အဲဒါကြောင့် တိုင်းပြည်က ဒုက္ခရောက်တာ” လို့ သူက ပြောပါတယ်။
၁၀၂၇ စစ်ဆင်ရေးနောက်ပိုင်း ဇန်နဝါရီလ ၃ရက်အထိ စစ်ကောင်စီဘက်က သေ-ပျောက်-ဖမ်းမိတဲ့ ဒုတိယဗိုလ်မှူးကြီးနဲ့အထက် အရာရှိ ၁၄ဦးရှိတယ်လို့ Myanmar Now သတင်းဌာနက စာရင်းပြုစုထားပြီး လက်ရှိမှာတော့ ၂၀ဦးနီးပါးရှိလာပြီ ဖြစ်ပါတယ်။
ပုံအညွှန်း – တာချီလိတ်တွင် တာဝန်ကျစဉ်က အားကစားပွဲတစ်ခု၌တွေ့ရသည့် ဗိုလ်မှူးချုပ်မင်းမင်းထွန်း
MK – 004
#MeKongNews
#ဗိုလ်မှူးချုပ်မင်းမင်းထွန်း
#AA
#တာချီလိတ်