မဲခေါင် ၊ ဇန်နဝါရီ ၁၀

တအာင်းဒေသအတွင်းရှိ ကျောင်းများအားလုံးကို ဒေသအခြေအနေ တည်ငြိမ်တာနဲ့ ၂၀၂၄-၂၀၂၅ ပညာသင်နှစ်မှာ တာဝန်ယူ ဖွင့်လှစ်သွားမယ်လို့ တအာင်းအမျိုးသားပညာရေးကော်မတီ TNEC က သတင်းထုတ်ပြန်ပါတယ်။

တအာင်းဒေသမှာ ၂၀၂၃ ခုနှစ် နှစ်လယ်ပိုင်းကစပြီး ဖြစ်ပွားခဲ့တဲ့ စစ်ပွဲဟာ ၂၀၂၄ နှစ်ဆန်းထိ ဒေသအနှံကူးစက်ကာ စစ်မီးတောက်လောင်နေတဲ့အတွက် စာသင်ကျောင်း အများစုကို ပိတ်ထားခဲ့ရတာဖြစ်ပါတယ်။

ဒါကြောင့် အခု ၂၀၂၄ ခုနှစ်မှာ ဒေသအခြေအနေ တည်ငြိမ်လာတာနဲ့ တပြိုင်နက် ပိတ်ထားခဲ့တဲ့ ကျောင်းတွေကို ဆက်လက်ဖွင့်လှစ်သွားမယ်လို့ TNEC ကဆိုပါတယ်။

ဒါပေမယ့် အရင်က စစ်ကောင်စီဖွင့်လှစ်ခဲ့တဲ့ ကျောင်းတွေဖြစ်တဲ့ နမ့်ခမ်းမြို့နယ်မှ ၅၉ ကျောင်း ၊ နမ့်ဆန်မြို့နယ်မှ ၁၉ ကျောင်း ၊ နမ္မတူမြို့နယ်မှ ၅၆ ကျောင်း ၊မန်တုံမြို့နယ်မှ ၆ ကျောင်း၊ မိုင်းငေါ့မြို့ ၊ မိုင်းလုံမြို့ နဲ့ ကွတ်ခိုင်မြို့နယ်တွေမှာ ဖွင့်ထားတဲ့ ကျောင်းတွေကိုတော့ သင်ကြားရေးဆရာ/ဆရာမများ မရှိသေးတဲ့အတွက် အခုပညာသင်နှစ်မှာ ဖွင့်လှစ်သင်ကြားပေးနိုင်ခြင်း မရှိသေးဘူးလို့ ဆိုပါတယ်။

ဒါကြောင့် ကျောင်းပိတ်ထားတဲ့ ကာလအတွင်း ကျောင်းသူ ကျောင်းသူများအနေနဲ့ ပညာရေးဆုံးရှုံးမှု မဖြစ်စေရေးအတွက် ကိုယ်ပိုင်လေ့လာမှုပြုခြင်း၊ စာသင်ဝိုင်းဖွဲကာ လေ့လာခြင်း၊ မိသားစုလုပ်ငန်းအား ကူညီလုပ်ကိုင်ခြင်းနဲ့ ကွင်းဆင်းလေ့လာခြင်းများ ပြုလုပ်ကြရန် တအာင်းအမျိုးသားပညာရေးကော်မတီ TNEC က တိုက်တွန်းထားပါတယ်။

ဒါ့အပြင် ပိတ်ထားတဲ့ ကျောင်းတွေမှာ ပညာသင်ကြားခဲ့တဲ့ ကျောင်းသား ကျောင်းသူများရဲ့ ပညာရေး ထိခိုက်နစ်နာမှု မရှိစေရေး ၎င်းတို့ဖြေဆိုခဲ့တဲ့ ၂၀၂၃-၂၀၂၄ ပညာသင်နှစ် နှစ်ဝက်စာမေးပွဲ ရလဒ် ဒါမှမဟုတ် ဒီဇင်ဘာလစာမေးပွဲရလဒ်များကို အတန်းတဆင့်တက် ပညာသင်ကြားနိုင်ရန်လက်ခံမယ်လို့ TNEC ကဆိုပါတယ်။

TNEC ဟာ တအာင်းဒေသအတွင်းရှိ ကျောင်းပညာရေးသင်ယူရန် ခက်ခဲတဲ့ ဝေးလံခေါင်ဖျားတဲ့ ဒေသတွေမှာ စာသင်ကျောင်းတွေ ဖွင့်လှစ်ပြီး ပညာသင်ကြားပေးနေတဲ့ အဖွဲ့အစည်းဖြစ်ပါတယ်။

CJ-002

#MeKongNews

#တအာင်း

#ပလောင်

#တည်ငြိမ်

#စာသင်ကျောင်း

#ပညာရေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)