မဲခေါင်၊ စက်တင်ဘာ ၃၀
ရှမ်းပြည်နယ် တောင်ပိုင်း၊ ပအို၀်း ကိုယ်ပိုင်အုပ်ချုပ်ခွင့်ရ ဒေသ၊ ဆီဆိုင်မြို့နယ်၊ မိုက်တီးကျေးရွာမှာ ထော်လာဂျီ တိုက်လို့ အသက် ၄ နှစ် အရွယ် ကလေးငယ် သေဆုံးခဲ့ပေမယ့် ရဲက အရေးမယူဘူးလို့ ဒေသခံတွေက ပြောပါတယ်။
မိုက်တီးကျေးရွာနေ အသက် ၄ နှစ်အရွယ် မနန်းဆုမွန်ဦး ဟာ ပြီးခဲ့တဲ့ စက်တင်ဘာလ ၂၆ ရက်နေ့ မူကြိုကျောင်းက အပြန် ထော်လာဂျီ အတိုက်ခံရလို့ ဆေးရုံ တက်ရောက် ကုသပေမဲ့ သေဆုံးသွားခဲ့တာ ဖြစ်ပါတယ်။
မူကြိုက ပြန်လာတဲ့ ကလေးငယ်ကို ဆီဆိုင်မြို့နယ်၊ နောင်လုံတောင်ရွာနေ စိုင်းဆန်းဦး ဆိုသူ မောင်းနှင်တဲ့ ထော်လာဂျီနဲ့ တိုက်မိခဲ့တာ ဖြစ်တယ်လို့ ကလေးနဲ့ ဆွေမျိုးတော်စပ်တဲ့ ဒေသခံတွေက ပြောပါတယ်။
“ထော်လာဂျီနဲ့ တိုက်မိတော့ ကလေးကိုတောင် ဆင်းမကြည့်ဘူး။ ထော်လာဂျီပေါ်ကနေ နောက်လှည့်ကြည့်ပြီး မောင်းပြေးသေးတယ်။ အဲ့ဒါကို ရွာကလူတွေက အော်ပြီး ဆိုင်ကယ်နဲ့ လိုက်ခေါ်မှ ပြန်လာကြည့်တာ။ ရွာထဲမှာကို ထော်လာဂျီ အမြန်ကြီးမောင်းလို့ တိုက်မိတာ” လို့ ကလေးနဲ့ ဆွေမျိုးတော်စပ်သူ တစ်ဦးက ပြောပါတယ်။
ထော်လာဂျီနဲ့ တိုက်မိတဲ့ ကလေးကို ဆိုက်ခေါင် တိုက်နယ်ဆေးရုံမှ တဆင့် တောင်ကြီးမြို့ ထွန်းဆေးရုံမှာ ခွဲစိပ်ကုသပေမယ့် စက်တင်ဘာလ ၂၇ ရက်နေ့မှာ အသက်ဆုံးရှုံးခဲ့ရပါတယ်။
“ဆေးရုံမှာ ခွဲစိပ်ကုသလည်း ကလေးက ပြန်မကောင်းလာဘူး ဆုံးသွားတယ်။ ကလေးမိဘက ထိုင်းမှာ အလုပ် သွားလုပ်နေတာ။ သနားပါတယ်” လို့ မိုက်တီးရွာ ဒေသခံ တစ်ဦးက ပြောပါတယ်။
ထောလာဂျီတိုက်လို့ သေဆုံးသွားတဲ့ ကလေးရဲ့ မိဘတွေဖြစ်တဲ့ ခွန်ချစ်လယ် နဲ့ နန်းအုန်းမေ တို့ဟာ ထိုင်းနိုင်ငံမှာ အလုပ်သွားလုပ်နေတဲ့ အတွက် ကလေးငယ် နန်းဆုမွန်ဦး ဟာ အဖိုးအဖွားနဲ့အတူ နေထိုင်တာ ဖြစ်ပါတယ်။
မိုက်တီးရွာ အရှေ့ဘက်၊ ဆိုက်ခေါင်စံပြကျေးရွာမှာ ရဲစခန်းရှိပေမယ့် လက်ရှိအချိန်ထိ ထော်လာဂျီ မောင်းသူကို ဖမ်းဆီး အရေးယူတာ မရှိဘူးလို့လည်း ဒေသခံတွေက ဆိုပါတယ်။
“ရဲက ဘာမှမလုပ်ဘူး။ သူတို့အချင်းချင်း စကားပြောကြလို့တောင် ပြောလိုက်တယ်။ PNO အဖွဲ့လည်း ကျည်ဆန်ဖိုး၊ လုံခြုံရေးဖိုး ဆိုပြီး ငွေကောက်တုန်းက ကောက်ပြီး အခုပြဿနာက သူတို့နဲ့ မဆိုင်သလို လုပ်နေတယ်” လို့ ဒေသခံ တစ်ဦးက ပြောပါတယ်။
ဒါ့အပြင် ရပ်ရွာသူကြီးတွေကလည်း ရှုပ်ရှုပ်ယှက်ယှက် မလုပ်ဘဲ ဆေးဝါးကုသမှု ကုန်ကျစရိတ်နဲ့ ကလေး အသုဘ နာရေး ကုန်ကျစရိတ်ယူပြီး ကျေအေးဖို့ ဖိအားပေးနေတယ်လို့ ဒေသခံ လူငယ်တွေက ပြောပါတယ်။
“ရွာလူကြီးတွေက ရှုပ်ရှုပ်ယှက်ယှက် မလုပ်နဲ့၊ နစ်နာကြေးယူပြီး ကျေအေးဖို့ ဖိအားပေးနေလို့ ကလေးတွေရဲ့ ဆွေမျိုးတွေဘက်က စိတ်သောက ရောက်နေတယ်။ အခုတော့ ကလေး အဖေ အမေက ထိုင်းကနေ ပြန်လာနေတယ်လို့ ပြောတယ်။ ဘယ်လို ဖြေရှင်းကြမလဲတော့ မသိသေးဘူး” လို့ မိုက်တီးရွာခံ လူငယ် တစ်ဦးက ပြောပါတယ်။
ထော်လာဂျီက တိုက်မိလို့ သေဆုံးသွားတဲ့ ကလေးငယ်ကိုတော့ စက်တင်ဘာ ၂၉ ရက်နေ့မှာ အဖိုး အဖွားတွေ ဆွေမျိုးတွေက ဈာပန ပြုလုပ် သင်္ဂြိုဟ် ပေးခဲ့တယ်လို့ ဒေသခံတွေက ပြောပါတယ်။
CJ-002
