မဲခေါင်၊ မတ် ၂၃
ရှမ်းပြည်တောင်ပိုင်း၊ ဆီဆိုင်မြို့ကို ပစ္စည်းပြန်ယူတာ အပါအဝင်အကြောင်းအမျိုးမျိုးနဲ့ပြန်တဲ့ ၆၀ ဦးခန့် မိသားစုနဲ့ အဆက်အသွယ်မရ ပျောက်ဆုံးနေတယ်လို့ လူမှုကူညီနေသူတွေထံက သိရပါတယ်။
ဆီဆိုင်မြို့ကို တော်လှန်ရေးတပ်ဖွဲ့တွေက တိုက်ခိုက်သိမ်းပိုက်လိုက်တဲ့ ပြီးခဲ့တဲ့ ဇန်နဝါရီ ၂၃ ရက်ကနေ ဒီနေ့ မတ်လ ၂၃ ရက် ထိ နှစ်လတိတိကြာမြင့်ခဲ့ချိန်မှာ ဆီဆိုင်မြို့ကို အကြောင်းအမျိုးမျိုးနဲ့ပြန်တဲ့သူ ဒေသခံ ၆၀ ဦးခန့် မိသားစုက အဆက်အသွယ်မရဘဲ ပျောက်ဆုံးနေတယ်လို့ သိရပါတယ်။
လူမှုကူညီရေးအဖွဲ့က စုစည်းထားတဲ့ စာရင်းအချို့အရ မတ်လ ၁၀ ရက် ကိုရင် ခေါ် စိုးဝင်းနဲ့လွိုင်ကော်မှာ ကားအငှားလိုက်သူ ၂ ဦး၊ မတ်လ ၁၅ ရက်က ဆီဆိုင် သီရိရပ်ကွက်နေ မြတ်သူနဲ့အောင်ချမ်းသာရပ်ကွက်က ကားအငှားလိုက်သူ ကျော်လွင် နဲ့ အခြားအမည်မသိရသူ ၆၀ ဦးခန့်ရှိတယ်လို့ သိရပါတယ်။
တချို့က မြို့နဲ့ အနီးတဝိုက်မှာပဲ စစ်ရှောင်နေကြပြီး ရိက္ခာပြတ်လပ်တဲ့အခါ မြို့ထဲ ပြန်ဝင်လို့ အဖမ်းခံကြရသူ၊ မြို့ရဲ့အရှေ့ဘက် လွယ်တဖီးတောင်ခြေမှာ စစ်ရှောင်နေကြသူတွေ၊ မြို့အနောက်ဘက် တဘက်ချောင်းဘေးနဲ့ မြို့အနောက်ဘက် ရွှေဟင်္သာဘုရားအနီး ဝန်းကျင် စစ်ရှောင်နေကြသူတွေဟာ မြို့နဲ့နီးတော့ ရိက္ခာပြတ်လပ်တဲ့အခါတိုင်း မြို့ထဲကို ပြန်ဝင်ကြတာလို့ ပြောပါတယ်။ အဲလို ပြန်ဝင်ရင်း ပြန်မလာတော့ဘဲ အဆက်အသွယ်ပြတ် နေတာလို့ သိရပါတယ်။
လူမှုကူညီနေသူ တစ်ဦးကတော့ “စစ်ရှောင်တွေအားလုံးမှာ တူညီတဲ့ ခံစားချက်တစ်ခုရှိတယ်၊ အဲဒါက အိမ်ကိုပြန်ချင်ကြတာဘဲ” လို့ မဲခေါင်ကို သတင်းပေးပြောပြပါတယ်။
အခြားတစ်ဦးကတော့ တိုက်ပွဲကြောင့် ကျဆုံး၊ သေဆုံးသူတွေ စာရင်းကို ပြုစုထုတ်ပြန်ပေးသလို ပျောက်ဆုံးသူ စာရင်းကိုလည်း ရသမျှ အမည်၊ လိပ်စာတွေ၊ ပျောက်ဆုံးနေရာနဲ့ နောက်ဆုံးသိရတဲ့အခြေအနေတွေကို စုံစမ်းပြီးထုတ်ပြန်ပေးစေချင်တယ်လို့ ပြောပါတယ်။
စစ်ရှောင်ရတာ အချိန်ကြာလာနဲ့အမျှ စားဝတ်နေရေးက ပိုပြီး ကြပ်တည်းလာတယ်၊ အလုပ်အကိုင်မရှိ ဝင်ငွေမရှိ ၊ ဝင်ငွေမရှိ၊ တနေ့ထက်တနေ့ စားသောက်ရေးက ပိုပို ခက်ခဲလာတယ်၊ ငွေကြေးပြည့်စုံသူတွေကလွဲရင် ကျန်တဲ့သူအားလုံး နေထိုင်ရေးကအစ ခက်ခဲလာတယ်၊ မနေ့ကမိုးရွာတယ်၊ တောထဲက မိသားစုတွေ တစ်ညလုံး မိုးရွာထဲမှာ နေရရှာတယ်လို့ ပြောပါတယ်။
လက်ရှိ ဆီဆိုင်မြို့ဟာ နေ့စဉ်ပစ်နေတဲ့ လက်နက်ကြီးဒဏ်၊ ဒရုန်းဗုံးဒဏ်၊ လေယာဉ်ဗုံးကြဲမှုတွေကြောင့် မြို့ရဲ့ ၃ ပုံ ၂ ပုံလောက်ဟာ လုံးဝနီးပါး ပျက်စီးသွားခဲ့ပြီး ဆီဆိုင်မြို့ ၆ ရက်ကွက်အနက် ဟိုခဲ၊ မြကန်သာ၊ မင်္ဂလာ၊ အောင်ချမ်းသာ ရပ်ကွက်တွေဟာ အပျက်စီးဆုံးဖြစ်ပြီး ရပ်ကွက်အားလုံး မီးလောင်ကျွမ်းပျက်စီးခဲ့ပြီလို့ သိရပါတယ်။
ပအိုဝ်းလူငယ်အစည်းအရုံး PYO ရဲ့ မတ်လ ၁၈ ရက် ထုတ်ပြန်ချက်မှာ ပအိုဝ်းဒေသ ဆီဆိုင်၊ ဟိုပုံး၊ ပင်လောင်း ဒေသ မှာ တိုက်ပွဲစတဲ့ ဇန်နဝါရီ ၂၁ ရက်က မတ်လ ၁၆ ရက်ထိ အရပ်သား သေဆုံးမှု ၄၉ ဦး၊အရပ်သား ထိခိုက်ဒဏ်ရာရမှု ၆၄ ဦးလို့ ဖော်ပြထားပါတယ်၊ ယင်းစာရင်းထဲက ဆီဆိုင်တစ်ခုထဲအနေနဲ့ အရပ်သား သေဆုံးမှု ၁၄ ဦးအထက်ရှိခဲ့သလို ထိခိုက်ဒဏ်ရာရသူ ၂၇ ဦးအထက်ရှိခဲ့တာအပြင် မြို့ကို ပြန်လို့ ပျောက်ဆုံးနေသူ ၆၀ ဦးလို့ ဆီဆိုင်စစ်ဘေးရှောင် ကူညီနေသူတွေရဲ့ ပြောကြားချက်အရ သိရပါတယ်။
PYO ရဲ့ မတ်လ ၁၈ ရက် ထုတ်ပြန်ချက်အရ စစ်ဘေးရှောင် ၁ သိန်းနဲ့အထက်မှာ ဆီဆိုင်က ၆ သောင်းခွဲလောက်ပါဝင်ပြီး တိုက်ပွဲစဖြစ်တဲ့ ဇန်နဝါရီ ၂၃ ရက်မှာ အရေးပေါ်အဝတ်တစ်ထည် ကိုယ်တစ်ခုနဲ့ စစ်ဘေးရှောင်လာတာမှာ ၂ လပြည့်တဲ့ ဒီနေ့ မတ်လ ၂၃ ရက်မှာတော့ ယာယီမဟုတ်တော့ ဘဲ ကာလရှည်စစ်ဘေးရှောင်တွေ ဖြစ်လာနေကြရပြီး အမြဲတမ်းစစ်ဘေးရှောင်တွေ မဖြစ်ဖို့ ဆုတောင်းယုံကြလွဲပြီး ဘာမှ မတတ်နိုင်ကြဘူးလို့ စစ်ဘေးရှောင်တွေက ပြောကြပါတယ်။
မြန်မာနိုင်ငံ စစ်ဘေးရှောင်တွေကို အရေးပေါ်၊ ယာယီနဲ့ ကာလရှည်၊ အမြဲတန်းဆိုပြီး Data of IDPs အဖွဲ့ သတ်မှတ်ရာမှာ အရေးပေါ်ကို တစ်ပတ်အတွင်း အဝတ်အထည်ကိုယ်တစ်ခုနဲ့ ပြေးရသူတွေ၊ ယာယီကို ၁ လအတွင်းနဲ့ ကာလရှည်ကို ၁ လက ၆ လအတွင်း၊ အမြဲတန်းကို ၆ လအထက် လို့ သတ်မှတ်ထားပါတယ်။
MK-012