မဲခေါင်၊ ဩဂုတ် ၁၁
ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ်၊ ဟောင်ပါးကျေးရွာအုပ်စု၊ ဆယ်ဇင်းရွာ အနီးရှိ စစ်ကောင်စီ စခန်း တစ်ခုကို ဒီကနေ့ ဩဂုတ်လ ၁၁ ရက်နေ့၊ မနက်ပိုင်း ၅ နာရီ ဝန်းကျင်က KIA တပ်မဟာ (၉)၊ တပ်ရင်း (၂၆) က သိမ်းပိုက်ခဲ့ကြောင်း KIA ရှေ့တန်း သတင်းရင်းမြစ်နဲ့ နီးစပ်သူတွေထံက သိရပါတယ်။
ရှမ်းနီ အမျိုးသား တပ်မတော်-SNA နဲ့ စစ်ကောင်စီ ခမရ (၁၁၆) ပူးပေါင်းတပ်နဲ့ KIA တပ်မဟာ (၉)၊ တပ်ရင်း (၂၆) တို့အကြား မနေ့ညနေ ကတည်းက တိုက်ပွဲ ပြင်းထန်နေပြီး ဒီမနက်ပိုင်းမှာ KIA ဘက်က လက်နက်အများအပြား သိမ်းဆည်း ရရှိခဲ့တယ်လို့ KIA ရှေ့တန်း သတင်းရင်းမြစ်နဲ့ နီးစပ်သူက ပြောပါတယ်။
“ ဟုတ်တယ်။ ပစ္စည်းတော်တော် သိမ်းဆည်းရတယ်။ တပ်ရင်း ၂၆ ဘက်” လို့ သူကပြောပါတယ်။
အဲဒီစခန်းကို ယမန်နေ့ ဩဂုတ်လ ၁၀ ရက်နေ့၊ ညနေ ၃ နာရီ ဝန်းကျင်ခန့်ကစပြီး ဒီကနေ့ ဩဂုတ်လ ၁၁ ရက်နေ့ မနက် ၅ နာရီ ဝန်းကျင်အထိ တိုက်ခိုက်ခဲ့တာလို့ ဆိုပါတယ်။
“ နန့်ကသာ နဲ့ ပန်ရှီး (ပန်ချယ်) ကြား” လို့ နောက်ထပ် KIA ရှေ့တန်း သတင်းရင်းမြစ် တစ်ဦးက စခန်းတည်နေရာကို အတည်ပြု ပြောပါတယ်။
အဲဒီစခန်းကို ပြီးခဲ့တဲ့ ၂၀၂၂ ခုနှစ်၊ နှစ်ကုန်ပိုင်းမှာ KIA က သိမ်းပိုက် ရှင်းလင်းခဲ့ပြီး အဲဒီနေရာကို အခုနှစ် နှစ်ဆန်းပိုင်းက စစ်ကောင်စီနဲ့ ရှမ်းနီ SNA ပူးပေါင်းတပ်ဖွဲ့တို့ စစ်ကြောင်းထိုး တပ်စခန်း အခြေချလာတာကြောင့် တိုက်ပွဲ ဖြစ်ပွားတာလို့ ဆိုပါတယ်။
ဩဂုတ်လ ၉ ရက်၊ ည ၈ နာရီ ဝန်းကျင်က ဖားကန့် KIA တပ်ရင်း (၆) စခန်းကို စစ်ကောင်စီက လေကြောင်းနဲ့ ဗုံး ၂ ကြိမ် လာကြဲသွားတာ အထိအခိုက်မရှိဘူးလို့ သတင်းရင်းမြစ်က ရှင်းပြပါတယ်။
ပြီးခဲ့တဲ့ ဩဂုတ်လ ၇ ရက်နေ့ကလည်း ဖားကန့်မြို့နယ်၊ ဆယ်ဇင်းရွာ အနီးက စစ်ကောင်စီ လက်အောက်ခံ ရှမ်းနီ SNA တပ်စခန်းနဲ့ နမ့်မှော် ကသိုင်းတောင်တပ်စခန်းကို KIA က သိမ်းပိုက် မီးရှို့ဖျက်ဆီးခဲ့လို့ စစ်ကောင်စီက KIA တပ်ရင်း (၆) နယ်မြေတွေကို လက်နက်ကြီး ပစ်ခတ်ကာ လေကြောင်း တိုက်ခိုက်မှုတွေ လုပ်နေတယ်လို့ ဒေသခံတွေက ပြောပါတယ်။
CJ-008
