မဲခေါင်၊ ဇူလိုင် ၅
ကရင်အမျိုးသား လွတ်မြောက်ရေး တပ်မတော် အနေနဲ့ စစ်အာဏာရှင်ကို ခုခံတော်လှန်နေတဲ့ လူမျိုးတိုင်း၊ အဖွဲ့အစည်းတိုင်းနဲ့ လက်တွဲပြီး ကရင်အမျိုးသားတွေရဲ့ နိုင်ငံရေး ရည်ရွယ်ချက်တွေ ပြည့်စုံရေး နိုင်ငံရေး သတိ ရှိဖို့ လိုအပ်တယ်လို့ ကရင်အမျိုးသား အစည်းအရုံး-KNU ဥက္ကဋ္ဌ ပဒိုစောကွယ်ထူးဝင်းက ပြောလိုက်ပါတယ်။
ဒီနေ့ ဇူလိုင် ၅ ရက်မှာ ကျရောက်တဲ့ (၇၄) နှစ်မြောက် ကရင်အမျိုးသား လွတ်မြောက်ရေး (ကော်သူးလေ) တပ်မတော်နေ့ KNU ဥက္ကဋ္ဌက ပေးပို့တဲ့ သဝဏ်လွှာမှာ အခုလို ထည့်သွင်း ဖော်ပြထားတာပါ။
လက်ရှိ နိုင်ငံရေး၊ စစ်ရေးဆိုင်ရာ အခြေအနေတွေဟာ သမိုင်းတလျှောက် ဖြစ်ပျက်ခဲ့တာတွေနဲ့ လုံးဝမတူဘဲ စစ်အုပ်စုက ပြည်သူလူထုကို ရန်သူသဖွယ် သဘောထားနေပြီး ရပ်ရွာ၊ ဆေးရုံ၊ ဆေးခန်း၊ စာသင်ကျောင်း၊ ဘုန်းကြီးကျောင်းနဲ့ ခရစ်ယာန်ဘုရားကျောင်းတွေကို လေယာဉ်နဲ့ဗုံးကြဲတာ၊ လက်နက်ကြီးနဲ့ ပစ်ခတ် နေတယ်လို့ သဝဏ်လွှာထဲမှာ ပြောထားပါတယ်။
ဒါကြောင့် ကရင်အမျိုးသား လွတ်မြောက်ရေး တပ်မတော်ရဲ့ အဓိက တာဝန်ဟာ ကရင်အမျိုးသားတွေအပြင် ပြည်သူလူထုကို စစ်အုပ်ချုပ်ရေးစနစ်နဲ့ အာဏာရှင်စနစ်ဆိုးရဲ့ ညှဉ်းပန်းနှိပ်စက်တာ၊ ရပ်ရွာတွေကို မီးရှို့ ဖျက်ဆီးတာနဲ့ ရက်ရက်စက်စက် သတ်ဖြတ်တာတွေကနေ တားဆီး ကာကွယ်ပေးဖို့ ဖြစ်တယ်လို့ ဥက္ကဋ္ဌက ဆိုပါတယ်။
ကော်သူးလေ တပ်မတော်ရဲ့ နိုင်ငံရေး ရပ်တည်ချက်နဲ့ ရည်မှန်းချက်ပန်းတိုင်ဟာ တန်းတူရေးနဲ့ ကိုယ်ပိုင် ပြဌာန်းခွင့်ရှိတဲ့ ဖက်ဒရယ်ဒီမိုကရေစီ ပြည်ထောင်စုကြီးကို တည်ဆောက်ဖို့ဖြစ်ပြီး လက်ရှိ အချိန်ကာလဟာ ကြီးမားတဲ့ စိန်ခေါ်မှုတွေရှိနေသလို ကိုယ်ပိုင်ပြဌာန်းခွင့်နဲ့ ကိုယ့်ကြမ္မာ ကိုယ်ဖန်တီးနိုင်မယ့် အခွင့်ကောင်းတွေလည်း ရှိနေတယ်လို့ သဝဏ်လွှာထဲမှာ ရေးသားထားပါတယ်။
ကရင်အမျိုးသား လွတ်မြောက်ရေး တပ်မတော်ကို ကျရာတာဝန်နဲ့ အခန်းကဏ္ဍတို့မှာ အားသွန်ခွန်စိုက် ကူညီပံ့ပိုးနေကြတဲ့ ပြည်တွင် းပြည်ပမှာရှိတဲ့ ကရင်အမျိုးသား အားလုံးကို အထူးတလည် ကျေးဇူးတင်ကြောင်း သဝဏ်လွှာမှာ ထည့်သွင်း ဖော်ပြထားပါတယ်။
ဒါ့အပြင် ကရင်အမျိုးသား လွတ်မြောက်ရေး တပ်မတော်က အရာရှိ၊ တပ်ဗိုလ်၊ တပ်မှူးတွေနဲ့ မျိုးချစ် စစ်သည်တော်တွေ အားလုံး စည်းလုံးညီညွတ်စွာ ရဲစွမ်းသတ္တိအပြည့်နဲ့ ရန်သူခပ်သိမ်းကို အနိုင်ယူပြီး ကိုယ်စိတ်နှစ်ဖြာ ကျန်းမာချမ်းသာပါစေလို့ KNU ဥက္ကဋ္ဌက ဆုတောင်းမေတ္တာ ပို့ပေးထားပါတယ်။
ကော်သူးလေ အစိုးရကို ၁၉၄၉ ခုနှစ်၊ ဇွန်လ ၁၄ ရက်မှာ ဖွဲ့စည်းတည်ထောင်ပြီး ကရင့်အမျိုးသား ခုခံတော်လှန်ရေး အစုအဖွဲ့တွေကို ကော်သူးလေ တပ်မတော်အဖြစ် စုစည်းခဲ့တာ ဖြစ်ပါတယ်။
၁၉၅၆ ခုနှစ်၊ ဇွန်လ ၂၆ ရက်နေ့ မောကို(ဆောထိ) မြို့နယ်မှာ ပြုလုပ်တဲ့ ကရင်အမျိုးသားလုံးဆိုင်ရာ ကွန်ကရက်မှာ ကော်သူးလေ တပ်မတော်ရဲ့ စစ်ရေးဆိုင်ရာ စီမံချက်တွေကို ကိုယ်စားလှယ် ခေါင်းဆောင်တွေက အတည်ပြုကာ ဖွဲ့စည်းပုံနဲ့ စုဖွဲ့မှုတွေကို ပြင်ဆင်ခဲ့တဲ့ ဇူလိုင် ၅ ရက်ကို အစွဲပြုပြီး ကော်သူးလေ တပ်မတော်နေ့အဖြစ် နှစ်စဉ် ကျင်းပခဲ့ကြတယ်လို့ သိရပါတယ်။
MK-009
#MekongNews
#ကရင်ပြည်နယ်
#KNU
#ဖက်ဒရယ်ပြည်ထောင်စု
