မဲခေါင်၊ ဖေဖော်ဝါရီ ၆
စစ်တပ်က ပြည်သူတွေကို ရည်ရွယ်ချက်ရှိရှိ လက်နက်ကြီးနဲ့ တိုက်ခိုက်နေမှုကြောင့် ကရင်အမျိုးသား အစည်းအရုံး-KNU အုပ်ချုပ်နယ်မြေ၊ ခလယ်လွီထူခရိုင် ကျေးရွာ ၆ ရွာထဲက ပြည်သူ ၅,၆၆၆ ဦး အသက်ဘေးလွတ်ရာ ထွက်ပြေးတိမ်းရှောင် နေရတယ်လို့ KNU ဗဟိုက မနေ့က ထုတ်ပြန်ပါတယ်။
ပဲခူးတိုင်း၊ ညောင်လေးပင်ခရိုင်၊ KNU ရဲ့ ခလယ်လွီထူခရိုင် တပ်မဟာ (၃) မှာ တပ်စွဲထားတဲ့ စစ်တပ်ရဲ့ ခမရ (၃၅၁) နဲ့ ခလရ (၆၀) က ဖေဖော်ဝါရီ ၄ ရက် မနက် ၅ နာရီမှာ အင်အား ၆၀ ခန့်နဲ့ မူးမြို့နယ် မြင်သာယာကျေးရွာကို စတင်ဝင်ရောက်ပြီး ဝဲကြီးကျေးရွာ ဘုန်းကြီးကျောင်းမှာ တပ်စွဲထားတယ်လို့ သိရပါတယ်။
အဲဒီစစ်တပ် ကျေးရွာတွင်းကို ဝင်ရောက်စဉ် မြင်သာယာကျေးရွာ၊ ဝဲကြီးကျေးရွာနဲ့ ညောင်ပင်ဆိမ်ကျေးရွာ တွေက ရွာလုံးကျွတ် နေရပ်စွန့်ခွာ ထွက်ပြေး တိမ်းရှောင်ခဲ့ရာ လူဦးရေ ၂,၄၃၁ ဦးတယ်လို့ ထုတ်ပြန်ချက်မှာ ဖော်ပြထားပါတယ်။
ကျေးရွာတွင်း ဝင်ရောက်စဉ် မြင်သာယာကျေးရွာမှ ပြည်သူတွေရဲ့ ဆိုင်ကယ် ၅ စီးနဲ့ ဆန် ၁၀ အိတ်ကို တပ်စွဲထားတဲ့ ဝဲကြီးဘုန်းကြီးကျောင်းသို့ ယူဆောင်သွားတယ်လို့ သိရပါတယ်။
စစ်တပ်က ကျေးရွာတွင်း တပ်စွဲထားလို့ ကျေးရွာနေ ပြည်သူတွေ ရွာလုံးကျွတ် ထွက်ပြေးပြီးနောက် စစ်ကောင်စီတပ်နဲ့ ကရင်အမျိုး သားလွတ်မြောက် ရေးတပ်မတော်-K.N.L.A၊ ကရင်အမျိုးသား ကာကွယ်ရေးတပ်ဖွဲ့-KNDO၊ တပ်မဟာ (၃) လက်အောက်ခံ Federal Wings Drone တပ်ဖွဲ့တွေ ညနေ ၆ နာရီခွဲမှ ၇ နာရီကျော်အထိ တိုက်ပွဲ ဖြစ်ပွားခဲ့တယ်လို့ သိရပါတယ်။
တိုက်ပွဲ ဖြစ်ပွားပြီးနောက် စစ်ကောင်စီဘက်မှ လက်နက်ကြီး ၁၅ လုံး ပစ်ခတ်ခဲ့ရာ အနီးအနားမှာရှိတဲ့ ကျေးရွာတွေသို့ ကျရောက် ပေါက်ကွဲခဲ့ပြီး စစ်တောင်းမြစ် အနောက်ဘက်ကမ်းရှိ ဇီးခုံကျေးရွာမှ အရပ်သား ၂ ဦးကို လက်နက်ကြီး ကျည်စ ထိမှန်ခဲ့လို့ နီးစပ်ရာ ဆေးရုံသို့ သွားရောက် ကုသခဲ့ရတယ်လို့ ဖော်ပြပါတယ်။
ဇန်နဝါရီလ ၃၁ ရက် မနက် ၈ နာရီကျော်မှာ စစ်တပ်ရဲ့ ခလရ (၆၀) က လပတ်ကျေးရွာမှ ရည်ရွယ်ချက်ရှိရှိ လက်နက်ကြီး ပစ်ခတ်မှုကြောင့် မရမ်းစိမ်လေးကျေးရွာတွင်း ကျရောက်ပေါက်ကွဲပြီး ပြည်သူ ၃ ဦး ကျည်စထိမှန် ဒဏ်ရာရရှိကာ ဝက်တစ်ကောင် သေဆုံးခဲ့တယ်လို့ ဆိုပါတယ်။
ထိခိုက်ဒဏ်ရာ ရရှိသူတွေဟာ အသက် ၁၃ နှစ်ရှိ နော်မူမူနဲ့ အသက် ၅ နှစ်ရှိ နော်ဖော ညီအမ နှစ်ဦးနဲ့ အသက် ၆ နှစ်ရှိ နော်လယ်ဝါး တို့ဖြစ်ပြီး လယ်ဒိုမြို့ ဆေးရုံမှာ ကုသခဲ့ရတယ်လို့ ဖော်ပြထားပါတယ်။
အဲဒီလို ပစ်ခတ်မှုကြောင့် လပတ်ကျေးရွာနဲ့ မရမ်းစိမ်လေး ကျေးရွာရှိ လူဦးရေ ၁,၉၀၈ ဦးမှာ ဘေးလွတ်ရာသို့ ထွက်ပြေးတိမ်းရှောင် ခဲ့ရတယ်လို့ ဆိုပါတယ်။
အဲဒီနေ့ ညနေ ၂ နာရီခွဲမှာ ခလရ (၆၀) မှ တပ်သားတွေက ကျေးရွာရှိ တဲ ၈ လုံးနဲ့ နေအိမ် ၃ လုံးကို မီးရှို့ဖျက်ဆီး ခဲ့တယ်လို့ သိရပါတယ်။
လက်ရှိ KNU ခလယ်လွီထူခရိုင်၊ မူးမြို့နယ်ရှိ နောက်ထပ် ကျေးရွာ ၆ ရွာဖြစ်တဲ့ မြင်သာယာကျေးရွာ၊ ဝဲကြီးကျေးရွာ၊ ညောင်ပင်ဆိပ်ကျေးရွာ၊ ဗမာမျက်ရဲကျေးရွာ၊ လပတ်ကျေးရွာနဲ့ မရမ်းစိမ်လေးကျေးရွာမှာရှိတဲ့ လူဦးရေ ၅၆,၆၆ ဦး နေရပ်စွန့်ခွာ စစ်ဘေးရှောင်ခဲ့ရတယ်လို့ ထုတ်ပြန်ချက်မှာ ဖော်ပြထားပါတယ်။
MK-003
#MeKongNews
#KNU
#စစ်ဘေးရှောင်
#လက်နက်ကြီး
