မဲခေါင်၊ ဇူလိုင် ၂၆
ရှမ်းပြည်နယ်ရဲ့ မြို့တော် တောင်ကြီးမြို့မှာ စစ်ကောင်စီရဲ့ ၂၀,၀၀၀ တန် ဂယက်ကြောင့် အိမ်၊ ခြံ၊ မြေဈေးတွေ ထိုးတက်လာတယ်လို့ အကျိုးဆောင်တွေက ပြောပါတယ်။
စစ်ကောင်စီက ၂၀၀၀၀ တန် ထုတ်ဝေမယ်လို့ ကြေညာခဲ့တဲ့ ဇူလိုင်လ ၂၃ ရက်နေ့ နောက်ပိုင်းကစကာ အိမ်၊ ခြံ၊ မြေ ဈေးတွေဟာ ရပ်ကွက်နေရာပေါ် မူတည်ပြီး အနည်းဆုံး သိန်း ၅၀ ကနေ သိန်းထောင်ချီ ထိုးတက်နေတယ်လို့ ဆိုပါတယ်။
“မြေရှင်က သေချာပြီဆိုမှ ဝယ်လက်ကို လိုက်ပြရဲတယ်။ မနေ့နဲ့ ဒီနေ့တောင် ဈေးမတူဘူး။ အခုက ၂၀,၀၀၀ တန်ကြောင့် ဝယ်လက်များပြီး ရောင်းမယ့်သူက နည်းနေတာ။ လူတွေက ငွေဈေးကျတော့ အိမ်၊ ခြံ၊ မြေ ပဲ ကိုင်ထားချင်ကြတာ” လို့ အိမ်၊ ခြံ၊ မြေ အကျိုးဆောင် တစ်ဦးက ပြောပါတယ်။
လက်ရှိမှာ မြို့စွန်နေရာတွေ အနည်းဆုံး ကျပ်သိန်း ၇၀၀ အထိ ပေါက်ဈေး ရှိနေပြီး အရင် အနောက်မြို့ပတ်လမ်း ပေါ်က သိန်း ၈,၀၀၀ ဝန်းကျင် နေအိမ်တွေဟာ သိန်း ၁၀,၀၀၀ ကျော်သွားပြီလို့ ဆိုပါတယ်။
“မြို့ပေါ်တင်ပဲ မဟုတ်ဘူး။ မြို့နဲ့နီးတဲ့ ရွာဘက်တွေလည်း ဈေးတက်တယ်။ တော်တော်များများက ရောင်းမယ့်သူကို မရှိတာ။ စကစကြောင့် ဘာမှ ပိုင်ဆိုင်မှု မပြနိုင်တဲ့ မြေကွက်တွေတောင် သိန်းရာချီနေတယ်။ ဒီလိုပဲ ဆက်သွားရင် ပွဲစားတွေ ခက်ခဲလာနိုင်တယ်” လို့ အကျိုးဆောင် နောက်တစ်ဦးက ပြောပါတယ်။
လတ်တလော တောင်ကြီးမြို့ အိမ်၊ ခြံ၊ မြေဈေးတွေ ထိုးတက်နေပေမယ့် စစ်ကောင်စီက ဖျက်သိမ်းရမယ်လို့ သတ်မှတ်ထားတဲ့ ဘုရားဖြူရပ်ကွက်က နယ်မြေတချို့နဲ့ ဖာမွန်းကျေးရွာက မြေကွက်တွေတော့ ဝယ်သူ မရှိဘူးလို့ အကျိုးဆောင်တွေက ပြောပါတယ်။
တောင်ကြီးမြို့မှာ အိမ်၊ ခြံ၊ မြေတွေအပြင် ကားနဲ့ ဒေါ်လာဈေးတွေလည်း တက်နေတယ်လို့ သိရပါတယ်။
ဇူလိုင်လ ၂၃ ရက်နေ့ မတိုင်ခင်က လိုင်စင်မဲ့ Honda Fit ကားတစ်စီး ပျမ်းမျှ သိန်း ၆၀ ဝန်းကျင်ရှိခဲ့ရာက အခု သိန်း ၁၀၀ ကျော်အထိ ဈေးတက်သွားပြီး အမေရိကန် တစ်ဒေါ်လာ ဈေးနှုန်းဟာ မြန်မာငွေကျပ် ၄,၀၀၀ နီးပါးအထိ တက်လာတယ်လို့ ကားအကျိုးဆောင်နဲ့ ဒေါ်လာရောင်းဝယ်သူတွေက ပြောပါတယ်။
CJ-007
#MekongNews
#တောင်ကြီးမြို့
#ကျပ် ၂၀,၀၀၀ တန်
#အိမ်ခြံမြေ