မဲခေါင်၊ မတ် ၂၂
ရန်ကုန်တိုင်း၊ ခရမ်းမြို့နယ် အလှူတစ်ခုမှာ ကံသာကျောင်းတိုက် ဆရာတော် ဟောကြားတဲ့ တရားမှာ နိုင်ငံရေးတွေ ပါတယ်ဆိုပြီး စစ်တပ် အင်အား အလုံးအရင်းနဲ့ လာရောက် သတိပေးသွားတယ်လို့ ဒေသခံတွေက မဲခေါင်သတင်းကို ပြောပါတယ်။
မတ်လ ၁၉ ရက်နေ့၊ မနက်ပိုင်းက ရပ်ကွက် အလှူတစ်ခုမှာ ဆရာတော် တရားဟောတာကို အမှတ် (၁) ရပ်ကွက် စစ်တပ်ခန့် အုပ်ချုပ်ရေးမှူး မျိုးဇော်ဦး က ဗီဒီယို ရိုက်ကူးထားပြီး စစ်ကောင်စီကို နိုင်ငံရေး တရားဟောပြောနေတယ် ဆိုပြီး တိုင်ကြားခဲ့တာ ဖြစ်တယ်လို့ ဒေသခံတစ်ဦးကပြောပါတယ်။
“ ဒီကောင်က စစ်တပ်က ခန့်ထားတဲ့ အုပ်ကြီး။ သူပဲ ရိုက်ပြီး စစ်တပ်ကို သွားပြတာ။ နောက်နေ့ကြတော့ ဆရာတော်ဆီ ကားတွေနဲ့ ရောက်လာပြီး သတိပေးတာတွေ လုပ်သွားတယ်။ ဆရာတော်ကို စစ်တပ်နဲ့ ရဲအရာရှိ ကားတွေနဲ့ ရောက်လာပြီး သတိပေးစကား လာပြောသွားတာ။ ဖမ်းဆီးတာတွေတော့ မလုပ်ပါဘူး” လို့ သူကပြောပါတယ်။
“ ငြိမ်းချမ်းရေး” ခေါင်းစဉ်နဲ့ ဆရာတော် ဟောကြားတဲ့ တရားတော်ထဲမှာ နိုင်ငံရေးတွေ ပါဝင်တယ်ဆိုပြီး စစ်ကား ၂ စီး၊ ရဲကား တစ်စီး၊ အခြားကားများစွာနဲ့ မတ်လ ၂၀ ရက်၊ ညနေပိုင်းမှာ ကံသာကျောင်းတိုက်ကို ရောက်ရှိလာပြီး သတိပေး ပြောဆိုမှုတွေ လုပ်သွားတာ ဖြစ်တယ်လို့ ဒေသခံက ပြောပါတယ်။
လက်ရှိ စစ်ကောင်စီ ကိုးကွယ်တဲ့ ဘုန်းကြီးတွေရဲ့ တရားပွဲတွေ ပါမစ်တင်စရာ မလိုဘဲ ပြည်သူ ကြည်ညို ကိုးကွယ်တဲ့ ဆရာတော်တွေကတော့ တရားဟောခွင့်ရဖို့ မြို့နယ်သံဃာ့ နာယကမှာ စာတင်ရပြီး စစ်ကောင်စီကို ဆန့်ကျင်တဲ့ ဆရာတော်များ တရားဟောခွင့် ပိတ်ပင်ခံရလေ့ ရှိတယ်လို့ သိရပါတယ်။
MK-005