မဲခေါင်၊ မတ် ၂၄
ကြာအင်းဆိပ်ပြီးမြို့နယ်ထဲမှာ မတ် ၁၆ရက်ကနေ ၂၁ရက်နေ့အထိ ၅ရက်တာအတွင်း နဂါးနီစစ်ကြောင်း၊ အထူးစစ်ဆင်ရေးတပ်ဖွဲ့ S.O.F၊ KNLA ပူးပေါင်းတပ်ဖွဲ့တွေနဲ့ စစ်ကောင်စီတပ်တို့ကြား တိုက်ပွဲ ၃ကြိမ်ဖြစ်ပွားခဲ့တယ်လို့ နဂါးနီစစ်ကြောင်းက မတ်လ ၂၃ရက် ညပိုင်းက သတင်းထုတ်ပြန်ပါတယ်။
၅ရက်တာ ထိတွေ့တိုက်ပွဲ ၂ကြိမ်အတွင်း စစ်ကောင်စီဘက်က ၁၀ဦး ကျဆုံးကာ ၁၉ဦး ဒဏ်ရာရှိပြီး PDF တပ်ဖွဲ့တွေဘက်က ၁၁ဦး မစိုးရိမ်ရ ဒဏ်ရာရခဲ့တယ်လို့ သိရပါတယ်။
ကြာအင်းဆိပ်ကြီးမြို့နယ်၊ တောင်ကလေးကျေးရွာအုပ်စု၊ ကွီလုံးတိုင်ရွာသစ်အနီးကို
စစ်ကြောင်းထိုးလာတဲ့ စစ်ကောင်စီတပ် စကခ(၁၃)လက်အောက်ခံ ခမရ ၅၆၁ နဲ့ ခမရ ၄၃၂ အင်အား ၈၀ ခန့်ကို ပူးပေါင်းတပ်ဖွဲ့တွေက မတ်လ ၁၆ရက်က လိုက်လံပိတ်ဆို့ တိုက်ခိုက်ရာမှာ ၂ နာရီခန့် ကြာတိုက်ပွဲဖြစ်ပွားခဲ့ပြီး စစ်ကောင်စီတပ်ဘက်က ၆ဦး သေဆုံးကာ ၉ဦးဒဏ်ရာရတယ်လို့ ထုတ်ပြန်ချက်မှာ ဖော်ပြထားပါတယ်။
အဲဒီတိုက်ပွဲမှာ PDF ပူးပေါင်းတပ်ဖွဲ့က ၄ဦး မစိုးရိမ်ရဒဏ်ရာ ရရှိခဲ့တယ်လို့ မြေပြင်သတင်းကို ကိုးကားပြီး ထုတ်ပြန်ချက်မှာ ဖော်ပြထားပါတယ်။
အဲဒီစစ်ကောင်စီ စစ်ကြောင်းဟာ မတ်လ ၁၉ရက်မှာ ကွီလုံးတိုင်ကျေးရွာအတွင်း ဝင်ရောက်ပြီး နေအိမ် ၂ လုံးကို မီးရှို့ဖျက်ဆီးခဲ့ကာ ဆန် ၂၀အိတ်ကို အတင်းအဓမ္မယူဆောင်သွားတယ်လို့ နဂါးနီစစ်ကြောင်းက ထပ်ပြန်ထားပါတယ်။
ဒါ့အပြင် ထီးသဘျူဖိုးခီးကျေးရွာမှာလည်း ဈေးဆိုင် ၃ဆိုင်က ကျပ်သိန်း ၃၀ဖိုးခန့် ပစ္စည်းတွေကို မွှေနှောက်၍ ယူဆောင်သွားခဲ့တယ်လို့ သိရပါတယ်။
မတ်လ ၂၁ရက်နေ့မှာ PDF ပူးပေါင်းတပ်နဲ့ စစ်ကောင်စီ စစ်ကြောင်းတို့ ထပ်မံတိုက်ပွဲပြင်းထန်ခဲ့ပြီး စစ်ကောင်စီဘက်က ဂျက်လေယာဉ်နဲ့ ၂ကြိမ်၊ Mi 35 နဲ့ ၃ကြိမ် လေကြောင်းပစ်ကူတွေအသုံးပြု တိုက်ခိုက်ခဲ့တယ်လို့ ထုတ်ပြန်ထားပါတယ်။
စစ်ကောင်စီရဲ့ လေကြောင်းတိုက်ခိုက်မှုကြောင့် ဘာသာရေးအဆောက်အဦအချို့ ပျက်ဆီးခဲ့တယ်လို့ သိရပါတယ်။
အဲဒီတိုက်ပွဲမှာ စစ်ကောင်စီဘက်က ၄ဦး ကျဆုံးကာ ၁၀ဦး ဒဏ်ရာရခဲ့ပြီး PDF ပူးပေါင်းတပ်ဖွဲ့ဘက်က ၇ဦး မစိုးရိမ်ရဒဏ်ရာ ရခဲ့သလို PDF တပ်ဖွဲ့တွေက MA1 တစ်လက်၊ MA2 (စက်ကလေး) တစ်လက် သိမ်းဆည်းရမိခဲ့တယ်လို့ နဂါးနီစစ်ကြောင်းရဲ့ ထုတ်ပြန်ချက်မှာ ဖော်ပြထားပါတယ်။
#MeKongNews