မဲခေါင်၊ ဇူလိုင် ၁၉
ကရင်နီပြည်နယ်တွင်းမှာရှိတဲ့ စစ်ရှောင်စခန်း အများစုမှာ ရာသီတုပ်ကွေးနဲ့ ငှက်ဖျားရောဂါ ဖြစ်ပွားမှုနှုန်းများပြားနေတယ်လို့ စစ်ဘေးရှောင် ကူညီစောင့်ရှောက်ရေးအဖွဲ့အစည်းတွေထံက သိရပါတယ်။
ရှမ်းပြည်နယ် တောင်ပိုင်းနဲ့ ကရင်နီနယ်စပ်ဖြစ်တဲ့ ပင်လောင်း၊ ဖယ်ခုံ၊ မိုးဗြဲဒေသအပါအဝင်၊ ဒီးမော့ဆို၊ ဖရူဆို၊ လွိုင်ကော်၊ ဖားဆောင်းနဲ့ ထိုင်း-ကရင်နီ နယ်စပ်က စစ်ရှောင်စခန်းတွေမှာပါ တုပ်ကွေးနဲ့ ငှက်ဖျားဖြစ်နေသူတွေရှိနေတယ်လို့ စစ်ရှောင်ကူညီသူတွေက ဆိုပါတယ်။
“အဖြစ်များတာကတော့ အသက် ၁၀ နှစ်အောက် ကလေးတွေမှာ ဖြစ်နေတယ်။ ပြီးတော့ ကိုယ်ဝန်ဆောင်၊ နို့တိုက်မိခင်တွေမှာလည်း ဖြစ်နေတာရှိတယ်။ ပြီးတော့ လူလတ်ပိုင်းပေါ့နော် အစုံပါပဲ လူကြီးလူငယ်မရွေး ဖြစ်နေတယ်” လို့ စစ်ရှောင်ကူညီနေသူ တစ်ဦးက ပြောပြပါတယ်။
ရောဂါလက္ခဏာ အနေနဲ့ နှာစေးတာ၊ ချောင်းဆိုးတာ၊ လည်ချောင်းနာတာ၊ ကိုယ်ပူတာနဲ့ ဖျားနာတာတွေ ဖြစ်နေပြီး ရှမ်း-ကရင်နီနယ်စပ်က စစ်ရှောင်စခန်းတိုင်းမှာ လူဦးရေရဲ့ ၂၀ ရာခိုင်နှုန်းလောက် တုပ်ကွေးနဲ့ ငှက်ဖျားလက္ခဏာပြတာတွေ ရှိနေတယ်လို့ သိရပါတယ်။
တောတောင်ထဲမှာအဆင်ပြေသလိုနေထိုင်ရတဲ့ ကရင်နီစစ်ရှောင်စခန်းတွေမှာ ခြင်ကိုက်တာနဲ့ သောက်သုံးရေ မလုံလောက်တာ၊ မိုးရေတစ်မျိုးတည်းကိုသာ အဓိက သုံးစွဲနေရတာကြောင့် တစ်ကိုယ်ရေသန့်ရှင်းမှု အားနည်းတာတွေရှိနေပြီး တုပ်ကွေးဖျားနာတာအပြင် ယားနာတွေလည်း ဖြစ်နေတယ်လို့ စစ်ရှောင်ကူညီသူတွေက ဆိုပါတယ်။
“ဒီဘက်က အဓိက ယားနာ၊ ဖျားနာ၊ ချောင်းဆိုး အများဆုံးပဲ။ မနေ့ကသွားတဲ့ စစ်ရှောင်စခန်းဆို လူနာ ၂၀၀ လောက်ကြည့်ခဲ့ရတယ်။ နက်ဖြန်သွားမယ့် စစ်ရှောင်စခန်းက ဘယ်လိုလာမလဲ မသိဘူး” လို့ ဖယ်ခုံမြို့နယ်တွင်း ကူညီနေသူ တစ်ဦးက ဆိုပါတယ်။
စစ်ရှောင်ကူညီသူတွေဟာ ကျန်းမာရေး တာဝန်ခံတွေနဲ့အတူ တုပ်ကွေးနဲ့ ငှက်ဖျားလက္ခဏာပြနေတဲ့ လူနာတွေကို malaria test နဲ့စစ်ဆေးပေးပြီး လက္ခဏာပေါ်လာသူတွေကို သောက်ရမယ့် ဆေးညွှန်းအတိုင်း ဆေးသောက်ခိုင်းတာနဲ့ လိုအပ်တဲ့ ဆေးဝါးကုသမှုတွေ ပြုလုပ်ပေးနေတယ်လို့ ဆိုပါတယ်။
ဒါ့အပြင် စစ်ဘေးရှောင် ပြည်သူတွေကို ခြင်ထောင်နဲ့ ခြင်လိမ်းဆေးတွေ ဖြန့်ဝေတာ၊ စခန်းအနီးဝန်းကျင်က ခြုံနွယ်တွေ ဝိုင်းဝန်းရှင်းလင်းတာတွေလည်း လုပ်ပေးနေတယ်လို့ သိရပါတယ်။
သို့သော်လည်း ကရင်နီအရပ်ဖက်အဖွဲ့အစည်းတွေရဲ့စာရင်းအရ လူဦးရေ ၃ သိန်းဝန်းကျင် စစ်ရှောင်နေရတဲ့ ကရင်နီပြည်နယ် အနှံ့မှာ စစ်ရှောင်စခန်းတွေ များပြားလွန်းတာကြောင့် လက်လှမ်းမမီနိုင်တဲ့ စခန်းတွေလည်း ရှိနေတယ်လို့ စစ်ရှောင်ကူညီသူတွေကဆိုပါတယ်။
ကရင်နီပြည်နယ်တွင်းကို ရိက္ခာနဲ့ ဆေးဝါး ဝင်ရောက်နိုင်တဲ့လမ်းကြောင်းတွေကို စစ်ကောင်စီက ပိတ်ဆို့ထားတာအပြင် ပြည်နယ်တွင်း တိုက်ပွဲတွေကြောင့်လည်း လမ်းကြောင်းတွေ ပိတ်ဆို့နေရာ ဆေးဝါး မလုံလောက်မှုတွေ ရှိနေတယ်လို့လည်း သိရပါတယ်။
“ဆေးကတော့ ဘယ်လုံလောက်မလဲနော် ရှာကြံလုပ်ပေးနေရတာပေါ့။ ကြားထဲ လမ်းကြောင်းကြောင့် ဆေးမလာနိုင်တော့ ပိုခက်ခဲရပါတယ်။ ရှိစုမဲ့စုတွေထဲကဝယ်ထားရတဲ့ ဆေးတွေ လမ်းမှာခံနေတာ အများကြီးရှိတယ်” လို့ စစ်ရှောင် ကူညီသူ တစ်ဦးက ညီးညူ ပြောဆိုပါတယ်။
လက်ရှိအချိန်မှာ တောတောင်ထဲနေထိုင်ကြရတဲ့ စစ်ဘေးရှောင်တွေမှာသာမက လွိုင်ကော်မြို့ပေါ်မှာလည်း သွေးလွန်တုပ်ကွေးဂအဖြစ်များနေပြီး သွေးစစ်လိုက်တဲ့ကလေးတိုင်းလိုလိုမှာ သွေးလွန်တုပ်ကွေး တွေ့နေရတယ်လို့ သိရပါတယ်။
သွေးလွန်တုပ်ကွေး လက္ခဏာပြတဲ့ ကလေးတွေကို ပါရာစီတမောကလွဲပြီး တခြားအကိုက်အခဲပျောက်ဆေးတွေ မတိုက်ဖို့၊ ဓာတ်ဆားရည်မဝင်ဝင်အောင်တိုက်ဖို့နဲ့ ဆရာဝန်ညွှန်ကြားချက်မပါဘဲ ပိုးသတ်ဆေးတွေ မတိုက်ဖို့နဲ့ ခြင်မကိုက်အောင် ကြိုတင်ကာကွယ်ကြဖို့ ဆရာဝန်နဲ့ ကျန်းမာရေးဝန်ထမ်းတွေက အသိပညာပေးနေကြပါတယ်။
MK-009
#MekongNews
#ကရင်နီပြည်နယ်
#စစ်ဘေးရှောင်
#ငှက်ဖျား