နိုင်ငံတဝန်း ဝိုင်းဝန်း တိုက်ခိုက်မှုများကြောင့် စစိကောင်စီ အကျပ်ဆိုက်နေစဉ် ရှမ်းပြည်နယ်နဲ့ ပြည်ထောင်စု အတွင်းရှိ တိုင်းရင်းသား လက်နက်ကိုင် တော်လှန်ရေး အဖွဲ့အစည်းများနဲ့ ယနေ့ အောက်တိုဘာလ ၁၀ ရက်နေ့မှ ၂၀၂၃ ခုနှစ် ဇန်နဝါရီလ ၁၀ ရက်နေ့ အတွင်း တွေ့ဆုံ ဆွေးနွေးဖို့ ကမ်းလှမ်းကြောင်း သျှမ်းပြည် ပြန်လည်ထူထောင်ရေး ကောင်စီ (RCSS) က ထုတ်ပြန်ပါတယ်။
လက်ရှိ စစ်ရေး ပဋိပက္ခများကြောင်း ပြည်တွင်း ပြည်ပ စစ်ဘေးရှောင် အများအပြားရှိနေပြီး တိုင်းပြည် စီးပွားရေး ကျဆင်းကာ ပြည်သူလူထု မြေစာပင် ဖြစ်နေရတဲ့ အတွက် တွေ့ဆုံ ဆွေးနွေးပြီး နည်းလမ်းရှာဖို့ လိုအပ်တယ်လို့ RCSS က ဆိုပါတယ်။
RCSS အနေနဲ့ လက်ရှိ နိုင်ငံရေး၊ စစ်ရေး ပြဿနာများကို တွေ့ဆုံဆွေးနွေးရေး နည်းလမ်းနဲ့ ဖြေရှင်းဖို့ ပေါ်လစီ ချမှတ်ထားပြီး တွေ့ဆုံ ဆွေးနွေးခြင်း အားဖြင့် အပြန်အလှန် ဝင်ထွက်သွားလာ ဆက်ဆံနိုင်ရေး၊ အထင်မှားမှုများ လျှော့ချနိုင်ရေး၊ နားလည်မှု ရှိရေး၊ ယုံကြည်မှု တည်ဆောက်ရေးနဲ့ လူထု၊ တိုင်းပြည်အကျိုး အတွက် ရည်ရွယ်တယ်လို့ ဆိုပါတယ်။
ဒါ့အပြင် အဖွဲ့အစည်းအားလုံးနဲ့ မဟာမိတ် ဖြစ်လာနိုင်ဖို့၊ စည်းလုံးညီညွတ်မှု တည်ဆောက်ဖို့ ဖက်ဒရယ် ပြည်ထောင်စု တည်ဆောက်နိုင်ဖို့ အထိ ဆောင်ရွက်နိုင်မယ်လို့ ယုံကြည်တဲ့ အတွက် တွေ့ဆုံဆွေးနွေးရေး ကမ်းလှမ်းတာလို့ ထုတ်ပြန်ချက်မှာ ဖော်ပြပါတယ်။
ဒါ့ပေမယ့် ဆွေးနွေးပွဲတွေကနေ ထွက်ပေါ်လာတဲ့ ရလဒ်တွေကို စစ်ခေါင်းဆောင် မင်းအောင်လှိုင်ထံ ပြန်လည် တင်ပြဖို့ ရှိ မရှိနဲ့ RCSS ရဲ့ မျှော်လင့်ချက်တွေကို အသေးစိတ် မေးမြန်းနိုင်ဖို့ အတွက် ထုတ်ပြန်ချက်မှာ ဖော်ပြထားတဲ့ ဖုန်းနံပတ်တွေကို မဲခေါင်သတင်း အနေနဲ့ ဆက်သွယ်ခဲ့ပေမယ့် ဆက်သွယ်လို့ မရခဲ့ပါဘူး။
အခုလို RCSS ရဲ့ ဖိတ်ခေါ်ချက်နဲ့ ပတ်သက်ပြီး ရှမ်းလက်နက်ကိုင် တပ်ဖွဲ့တစ်ခုဖြစ်တဲ့ SSPP အပါအဝင် တခြား လက်နက်ကိုင် တပ်ဖွဲ့တွေ အနေနဲ့ တစ်စုံတရာ တုန့်ပြန်တာမျိုး မရှိသေးသေးပါဘူး။
စစ်ခေါင်းဆောင် မင်းအောင်လှိုင်နဲ့ ဖော်ရွေတဲ့ ဆက်ဆံရေးရှိတဲ့ ဗိုလ်ချုပ်ကြီး ယွက်စစ်ရဲ့ RCSS ဟာ အပစ်ရပ်စာချုပ် (NCA) လက်မှတ်ရေးထိုးထားတဲ့ အဖွဲ့ဖြစ်ပြီး လက်ရှိ အာဏာသိမ်း စစ်ကောင်စီနဲ့ တွေ့ဆုံ ဆွေးနွေးမှုတွေ မကြာခဏ ပြုလုပ်လေ့ ရှိပါတယ်။