မဲခေါင်၊ မတ် ၂၇
ရှမ်းပြည်မြောက်ပိုင်း၊ သီပေါနဲ့ကျောက်မဲမြို့တွေ အကြားက ပျက်စီးနေတဲ့ ကျင်သီတံတားဘေးမှာ ယာဉ်ငယ်တွေ ဖြတ်သန်းသွားလာနိုင်ဖို့ ယာယီတံတား ဆောက်နေတယ်လို့ ဒေသခံ သတင်းအရင်းအမြစ်တွေထံက သိရပါတယ်။
၁၀၂၇ စစ်ဆင်ရေးအတွင်းက ပျက်စီးခဲ့တဲ့ အခိုင်အမာတံတားမျိုးမဟုတ်ပေမယ့် စဉ့်အင်တံတားလိုယာဉ်ငယ်တွေ ဖြတ်သန်းသွားလာနိုင်ဖို့ တည်ဆောက်နေတာလို့ ဆိုပါတယ်။
“တံတားမှာ TNLA တွေပဲစောင့်နေတာ၊ စစ်တပ်ကဆောက်နေတာ မဟုတ်တာတော့ သေချာတယ်၊ စဉ့်အင်လိုဆိုရင် SSPP နဲ့ ခွန်ကိုက်ကျေး ရွာက ရွာသူရွာသားတွေ စုပေါင်းပြီးဆောက်တာ၊ ဒီမှာတော့ ဘယ်သူဆောက်တယ်မသိရဘူး” လို့ သီပေါဒေသခံက မဲခေါင်ကိုပြောပါတယ်။
အဆိုပါ ယာယီတံတားပြီးစီးပါက ၁၀၂၇ စစ်ဆင်ရေးအတွင်း ပျက်စီးခဲ့တဲ့ သီပေါ-လားရှိုးဘက် စဉ့်အင်တံတားလို ၈ တန်ထက် မပိုတဲ့ ယာဉ်ငယ်တွေအတွက် လွယ်ကူစွာ ဖြတ်သန်းသွားလာ နိုင်မှာဖြစ်ပြီး တံတားပျက်စီးနေစဉ်က တံတား ဟိုဘက် ဒီဘက် ပြောင်းလဲတင်ဆောင် သွားလာမှုကနေ ယာယီတံတားပြီးရင်တော့ ငွေရော အချိန်ရော သက်သာသွားမယ်လို့ သိရပါတယ်။
စဉ့်အင်တံတားကို ဇန်နဝါရီ ၇ ရက်က ၂၅ ရက်အတွင်း ၁၈ ရက်ကြာ တည်ဆောက်ခဲ့တာဖြစ်သလို ယခု ကျင်သီတံတားကိုလည်း မတ်လ ၂၄ ရက် ကစတင်တည်ဆောက်နေတာဖြစ်လို့ မကြာမီ အတွင်း ပြီးစီးသွားဖို့ ခန့်မှန်းကြပါတယ်။
လက်ရှိတွင် ကျိုးကျနေတဲ့ တံတားအပိုင်းအထိ ကားတွေ လာရောက်ပြီး ကုန်နဲ့ခရီးသည်များ နှစ်ဘက်က လာကြိုတဲ့ ကားတွေအပေါ်လူနဲ့ကုန် ပြောင်းလဲ စီးနင်းတင်ဆောင်နေရတယ်လို့ သိရပါတယ်။
ကားကြီးတွေအနေနဲ့ကတော့ အခိုင်အမာတံတားတွေ မပြင်ဆင်ရသေးလို့ ကျောက်မဲ-လားရှိုး ပြည်ထောင်စုကားလမ်းကို အသုံးမပြုနိုင်သေးဘဲ နောင်ချိုမြို့ကတဆင့် ရပ်စောက်-ကျောက်ဂူ-နမ့်လန်-မိုင်းရယ်လမ်းအတိုင်း ခရီးဝေးသွားလာနေရဆဲဖြစ်ကြောင်း သိရပါတယ်။
MK-012