မဲခေါင်၊ မတ် ၂၆
ရှမ်းပြည်နယ်မြောက်ပိုင်း၊ လောက်ကိုင်မြို့ MNDAA အုပ်ချုပ်ရေးမှာ နေထိုင်ခွင့်ကဒ်ရှိသူတွေပါ ဖမ်းခံနေရတယ်လို့ မတ်လ၂၄ ရက်က အဖမ်းခံရပြီး ပြန်လွတ်လာတဲ့ နမ္မတူ မြို့သူ ၁ ဦးက အများပြည်သူသိစေရန် လူမှုကွန်ရက်ပေါ်တင်တဲ့ ရုပ်သံဖိုင်အရ သိရပါတယ်။
အဖမ်းခံရသူတွေဟာ နေထိုင်ခွင့်ရရှိပေမယ့် ကဒ်မရှိသူတွေနဲ့ အတူတူသွားလာလို့ ဆိုပြီး မတ်လ ၁၉ ရက်က ဖမ်းခံထားရပြီး မတ်လ ၂၄ ရက်နေ့တွင်မှ ပြန်လည်လွှတ်ပေးခံရတယ်လို့ ပြောပါတယ်။
“လောက်ကိုင်ကို မလာကြနဲ့အုံးလို့၊ တိုင်းရင်းသားဖြစ်ဖြစ် ဗမာလူမျိုးဖြစ်ဖြစ် လောက်ကိုင်အဝင်မှာ အရမ်းအဖမ်းအဆီးများတယ်၊ ကဒ်မရှိတဲ့ သူနဲ့ရှိတဲ့သူတွဲသွားရင်လဲ ဖမ်းတယ်၊ အဆင်းလဲကဒ်မရှိရင်ဖမ်းတယ်၊ ပေးမထွက်ဘူး” လို့ ပြောပါတယ်။
ဒီနေ့မှာလည်း လောက်ကိုင်က ဗမာတန်းကို စက်ယန္တရားတွေနဲ့ ဖျက်ဆီးနေပြီလို့ မြေပြင်သတင်းတွေအရ မဲခေါင်းသတင်းဌာနက သိရပါတယ်။
ပြီးခဲ့တဲ့ ဖေဖော်ဝါရီ ၁၈ ရက်က ရှမ်းပြည်နယ်အထူးဒေသ(၁) စစ်ရေးအုပ်ချုပ်မှုကော်မတီရဲ့ အထူးဒေသအတွင်း ဒေသပြန်လည်တည်ဆောက်ရေးအတွက် အလုပ်သမားတွေနဲ့ နည်းပညာရှင်တွေ အမြောက်အများလိုအပ်နေပြီး လုပ်ငန်းပိုင်ရှင်က မိမိသဘောနဲ့ အလုပ်သမားတွေကို ခေါ်ယူခွင့်ပြုသော်လည်း လုံခြုံရေးအတွက် စစ်ဆေးသွားမယ်လို့ ထုတ်ပြန်ပါတယ်။
အလုပ်သမားတွေအားလုံး အထူးဒေသရဲတပ်ဖွဲ့မှာ နေထိုင်ခွင့်ကဒ်လုပ်ရမှာဖြစ်ပြီး ရပ်ကွက်ပြောင်းရွေ့နေထိုင်ခွင့် မပြုဘူးလို့ ထုတ်ပြန်ချက်မှာ ပါရှိပါတယ်။
ယခု အဖမ်းခံထားရတဲ့သူတွေအခြေအနေနဲ့ နေထိုင်ခွင့်ကိစ္စရပ်များကို မေးမြန်းအတည်ပြုနိုင်ရန် MNDAA ရဲ့ ပြောရေးဆိုခွင့်ရှိသူ လီကျားဝင်းအား မဲခေါင်က ဆက်သွယ်ပေမယ့် ဆက်သွယ်ခွင့် မရခဲ့ပါဘူး။
MK-012