မဲခေါင်၊ မတ် ၇
ရှမ်းပြည်နယ် မြောက်ပိုင်း၊ လားရှိုးမြို့မှာ စစ်ကောင်စီရဲ့ လက်ပါးစေ ယာဉ်ထိန်းရဲက ကားနဲ့ဆိုင်ကယ်တွေကို ပြစ်ချက်ရှာ ငွေညှစ်ဖို့ ဖမ်းဆီးနေတယ်လို့ ဒေသတွင်း သတင်းတွေမှာ ဖော်ပြပါတယ်။
နယ်စပ်မြို့တွေမှာ ပြည်သူ အများစု လိုင်စင်မဲ့ကားနဲ့ ဆိုင်ကယ်တွေကိုသာ စီးနင်း အသုံးပြုလေ့ရှိရာ လက်ရှိ လားရှိုး ယာဉ်ထိန်းရဲက လိုင်စင်၊ နောက်ကြည့်မှန်၊ အိတ်ဇော၊ ဦးထုပ်၊ ညပိုင်း မီးဖွင့်ပြီး မမောင်းတာတွေ စသဖြင့် ပြစ်ချက်မျိုးစုံရှားပြီး ဆိုင်ကယ် တစ်စီးကို ကျပ် ၃၅,၀၀၀ ခွဲနဲ့ လိုင်စင်မဲ့ ကားတွေကိုတော့ အဆင်ပြေသလို တောင်းယူနေတယ်လို့ ဒေသခံတွေက ပြောပါတယ်။
လားရှိုးမြို့မှာ မူးယစ်ဆေးဝါး ရောင်းဝယ် ဖောက်ကားမှုတွေ၊ သစ်တောထွက် ကုန်ကြမ်း တရားမဝင် ခိုးထုတ်တာတွေနဲ့ လောင်းကစားမျိုးစုံ ပေါ်ပေါ်ထင်ထင် လုပ်ကိုင်နေကြပေမဲ့ စစ်ကောင်စီက မသိချင်ယောင်ဆောင် လိုင်းကြေးယူကာ လွှတ်ထားပြီး ပြစ်မှုကြီး မဟုတ်တဲ့ ကား၊ ဆိုင်ကယ် ကိစ္စတွေကို ငွေကြေး ရလိုမှု အတွက် တင်းကြပ်နေတယ်လို့ ပြည်သူတွေက ပြောကြပါတယ်။
လားရှိုးမြို့နေ ပြည်သူ တစ်ဦးက “လိုင်စင်မဲ့ ကားတွေကို အိမ်အတွက် သွားရေးလာရေး အဆင်ပြေအောင် စီးနေကြတာကို လက်ခံ နားလည်ပေးလို့ ရပါတယ်။ လိုင်စင်မဲ့ကားနဲ့ လုပ်ငန်းသုံး အတွက် ခရီးသည်တင်ပြီး လိုင်းပြေးဆွဲနေတာတော့ လုံးဝ လက်ခံလို့ မရပါဘူး။ လိုင်စင်မဲ့ကားများဟာ လမ်းကြောတစ်လျှောက် တွေ့သမျှ စစ်သား၊ ရဲတို့ကို ငါးရာ တစ်ထောင် ပေးပြီး သွားလာ လုပ်စားနေကြတာကို တားဆီး အရေးယူ သင့်ပါပြီ။ သစ်တောထွက် ပရိဘောဂ အကြမ်းထည်များလည်း နယ်စပ်ပို့နေတာ ပြည်တွင်းမှာ ကုန်သလောက် ဖြစ်နေပါပြီ။ မန္တလေးကနေ ရှမ်းမြောက်ကို ပရိဘောဂ အကြမ်းထည်များ တင်လာတဲ့ ကားများဟာ နေ့စဉ် အစီးရေ ၂၀ နဲ့ ၃၀ နီးပါး ရှိကြပါတယ်။ တာဝန်အရှိဆုံး သစ်တောကလည်း ငွေယူ မျက်နှာလွှဲ နေကြပါတယ်’’ လို့ သူမြင်တွေ့နေရတာကို လူမှုကွန်ရက်မှာ ထုတ်ဖော် ရေးသားထားပါတယ်။
လားရှိုးမြို့မှာ ကားနဲ့ ဆိုင်ကယ်တွေကို မတ်လ ၁ ရက်ကနေ ၃၁ ရက်အထိ စစ်ကောင်စီက ဆက်ပြီး ဖမ်းဆီးသွားဖို့ရှိတယ်လို့ ဒေသတွင်း သတင်းတွေက ဖော်ပြထားပါတယ်။
REF: Shwe Phee Myay News Agency
MK-007