မဲခေါင်၊ ဇူလိုင် ၁၅
ရှမ်းပြည်နယ်မြောက်ပိုင်း၊ လားရှိုးမြို့မစျေးက ဇွဲထက်ရွှေဆိုင်မှာ ဒီကနေ့မနက် ၈ နာရီ ဝန်းကျင်ခန့်က ဗုံးပေါက်ကွဲမှုဖြစ်ပွားပြီး ဆိုင်ဝန်ထမ်းတွေ ၅ ဦးထက်မနည်း ထိခိုက်ဒဏ်ရာရသွားတယ်လို့ ဒေသခံတစ်ဦးက မဲခေါင်သတင်းကိုပြောပါတယ်။
ဆိုင်ဖွင့်ပြီး မကြာခင် အခုလို ဗုံးပေါက်ကွဲခဲ့တာဖြစ်ပြီး စျေးသွားစျေးလာတွေတော့ ထိခိုက်မှုမရှိပေမဲ့ ဆိုင်တွင်းက ဝန်ထမ်းတွေတော့ အတော်များများထိခိုက်သွားတယ်လို့ သူကဆိုပါတယ်။
“ ကျွန်မတို့နဲ့က နီးနီးလေး။ အဲ့အချိန်က ကျွန်မလည်း အိပ်နေတုန်း။ အမေကတော့နိုးနေပြီ စျေးသွားဖို့လုပ်နေတာ။ အသံအကျယ်ကြီးပဲ။ အိပ်ချင်မူးတူးဆိုတော့ လန့်ပါ လန့်တယ်။ အပြေးသွားကြည့်တော့ ဆိုင်ရှေ့မှာ ရစရာမရှိဘူး။ ပြောတာတော့ ဆိုင်ရှေ့က ဆိုင်ကယ်နားကနေ ကွဲတယ်ပြောတာပဲ” လို့ သူကရှင်းပြပါတယ်။
ပေါက်ကွဲမှုကြောင့် ဇွဲထက်ရွှေဆိုင်မျက်နှာရှေ့က ဆိုင်ကယ်တစ်စီးအပါအဝင် ဆိုင်ခန်းနဲ့ ဝန်ထမ်းအများအပြားလည်း မိုင်းစ ထိမှန်ဒဏ်ရာရခဲ့တယ်လို့ဆိုပါတယ်။
လာရှိုးမြို့ဟာ ရှမ်းလက်နက်ကိုင်တပ်ဖွဲ့တွေ၊ ပြည်သူ့စစ်တွေနဲ့ စစ်ကောင်စီတပ်ဖွဲ့တွေသာ အဓိက လှုပ်ရှားနေတာဖြစ်ပြီး အဆိုပါ တိုက်ခိုက်မှုကို ဘယ်အဖွဲ့က လုပ်ဆောင်ခဲ့လဲဆိုတာကိုတော့ မဲခေါင်သတင်းအနေနဲ့ သီးခြားအတည်မပြုနိုင်သေးပါဘူး။
ထိခိုက်ဒဏ်ရာရတဲ့ ဝန်ထမ်းတွေကိုတော့ ဆေးရုံကားတွေနဲ့ တင်ဆောင်သွားကာ မျက်မြင်တွေ့သူရဲ့အဆိုအရ ၅ ဦးထက်မနည်းရှိတယ်လို့ဆိုပါတယ်။
လက်ရှိအချိန်မှာတော့ ပေါက်ကွဲမှုဖြစ်ပွားရာနေရာကို စစ်ကောင်စီတပ်သားတစ်ချို့ရောက်နေပြီး စစ်ဆေးမှုတွေပြုလုပ်နေတာကြောင့် မြို့မစျေးတစ်ဝိုက်မှာ လူသွားလူလာမရှိတော့ဘူးလို့ ဆိုပါတယ်။
MK-007
#လားရှိုး
#ဇွဲထက်
#ဗုံးပေါက်