မဲခေါင်၊ မေ ၈
လာမယ့် မေလ ဒုတိယပတ် အတွင်း မြန်မာနိုင်ငံ ဝင်ရောက်နိုင်တယ်လို့ မိုးဇလ ပညာရှင်တွေ ခန့်မှန်းထားတဲ့ မိုချာ-MOCHA ဆိုင်ကလုန်း မုန်တိုင်း တိုက်ခတ်ပြီးနောက်မှာ အလှူခံရမယ့် နိုင်ငံနဲ့ အဖွဲ့အစည်း စာရင်းတွေကို စစ်ကောင်စီက ပြုစုပြီး လုပ်ငန်း စီမံချက် ရေးဆွဲထားခဲ့တယ်လို့ သိရပါတယ်။
စစ်ကောင်စီက အလှူခံဖို့ စာရင်းပြုစုထားတဲ့ နိုင်ငံတွေထဲမှာ တရုတ်၊ အိန္ဒိယ၊ ထိုင်းနိုင်ငံတို့ အဓိက ပါဝင်ပြီး အာဆီယံနိုင်ငံများ၊ ကုလသမဂ္ဂ အဖွဲ့အစည်းအောက်က လက်ရှိ ပူးပေါင်း ဆောင်ရွက်လျက်ရှိတဲ့ အဖွဲ့အစည်းတွေကိုပါ အကြောင်းကြားစာပေးပို့ဖို့ လုပ်ငန်း စီမံချက်မှာ ထည့်သွင်း ရေးဆွဲထားတာတာကို မဲခေါင်သတင်းဌာနက ရရှိတဲ့ လုပ်ငန်းစီမံချက်မှာ တွေ့ရပါတယ်။
အဆိုပါ စီမံချက်ရဲ့ ကြိုတင်ပြင်ဆင်ရေး အပိုင်းမှာ အလှူခံရမယ့် နိုင်ငံနဲ့ အဖွဲ့အစည်းတွေကို အကြောင်းကြားစာ ပေးဖို့၊ လှူဒါန်း ပစ္စည်းတွေ စိစစ် လက်ခံရေး၊ ငွေကြေးသုံးစွဲမှုကို အတတ်နိုင်ဆုံး လျှော့ချရေးနဲ့ လှူမယ့် ပစ္စည်းတွေကို ပြည်တွင်းမှာ ဝယ်ယူနိုင်ပါက ပစ္စည်း ပြတ်လပ်မှုနဲ့ ဈေးနှုန်း ကြီးမြင့်မှု မဖြစ်ရေး အတွက် လိုအပ်တာတွေကို ကုန်သည်ကြီးများအသင်းနဲ့ ညှိနှိုင်း ဆောင်ရွက်ဖို့တို့ အဓိက ပါဝင်တာ ဖြစ်ပါတယ်။
စစ်ကောင်စီရဲ့ စီမံချက်ထဲမှာ ပြီးခဲ့တဲ့ ၂၀၀၈ ခုနှစ်က နာဂစ်မုန်တိုင်းနဲ့ ၂၀၁၀ ခုနှစ်က ဂီရိ မုန်တိုင်း တိုက်ခတ်ပြီးချိန် နိုင်ငံတကာက လာရောက်လှူဒါန်းခဲ့တဲ့ အလှူရှင်နိုင်ငံနဲ့ အဖွဲ့အစည်း ၄၂ ဖွဲ့ရဲ့ စာရင်း အပါအဝင် လှူဒါန်းခဲ့တဲ့ ပစ္စည်း စာရင်းတွေကိုလည်း အမျိုးအမည်နဲ့ တကွ ပြုစု ဖော်ပြထားပါတယ်။
မကြာမီ ရက်ပိုင်း အတွင်း မြန်မာနိုင်ငံထဲ ဝင်ရောက်လာနိုင်တယ်လို့ ခန့်မှန်းနေတဲ့ MOCHA မုန်တိုင်းဟာ မြန်မာ့ကမ်းရိုးတန်း ဒေသတွေနဲ့ နီးစပ်တဲ့ မွန်၊ ကရင်၊ ပဲခူး၊ ရန်ကုန်နဲ့ ဧရာဝတီတိုင်းတွေမှာ သက်ရောက်မှု ရှိနိုင်ပြီး နိုင်ငံတဝန်း မိုးကြီးတာ၊ လေပြင်း တိုက်ခတ်တာတွေ ဖြစ်လာနိုင်လို့ ပြည်သူတွေ အထူး ပြင်ဆင်ထားဖို့ မိုးလေဝသ လေ့လာ ခန့်မှန်းသူ ဦးဝင်းနိုင်က သုံးသပ် ပြောဆိုထားပါတယ်။
ဒီနေ့ မေလ ၈ ရက်မှာတော့ MOCHA မုန်တိုင်းဟာ ဝင်ရောက်နိုင်တဲ့ တစ်နာရီကို မိုင် ၁၆၀ ကျော်ရှိပြီး အားအလွန်ကောင်းတဲ့ မုန်းတိုင်း ဖြစ်လာနိုင်ကြောင်းနဲ့ မုန်တိုင်း ဝင်ရောက်မယ့် လမ်းကြောင်း၊ မြို့နဲ့ အခြေအနေတွေ အတိအကျ မပြောနိုင်သေးတာကြောင့် သတင်းတွေ အမြဲမပြတ် စောင့်ကြည့်ဖို့ ဦးဝင်းနိုင်က တိုက်တွန်းထားပါတယ်။
MK-009
#MeKongNews
#မိုချာမုန်တိုင်း
#အလှူခံ
#ဦးဝင်းနိုင်
