မဲခေါင်၊ မတ် ၅
ရန်ကုန်မြို့လယ်ကောင်၊ ဗိုလ်ချုပ်စျေးမှာဖွင့်လှစ်ထားတဲ့ နှင်းဆီရတနာ – Rose Jewellery ရတနာဆိုင်ဖောက်ထွင်းခံခဲ့ရပြီး တန်ဖိုးကြီးရတနာပစ္စည်းတွေ အခိုးခံလိုက်ရတယ်လို့ ဆိုင်ခန်းပိုင်ရှင်တစ်ဦး က မဲခေါင်သတင်းကို ပြောပါတယ်။
ဖောက်ထွင်းခံရတဲ့ ရတနာဆိုင်ဟာ မတ်လ၃ ရက်နေ့ ညနေ၄နာရီ အချိန်ကဆိုင်ပိတ်ထားခဲ့ပြီး မတ်လ၄ရက် မနက်၁၀ နာရီဝန်းမှာမှ ဆိုင်နီးချင်းတွေ ဖုန်းဆက်အကြောင်းကြားလို့ ဆိုင်ဖောက်ထွင်းခံရတာကို သိရတယ်လို့ သူကပြောပါတယ်။
“ ဆိုင်ထဲမှာဝင်မွှေပြီးမှ အဖိုးတန်တာတွေယူသွားတဲ့ပုံစံပါ။ ဆိုင်သော့ကိုအက်ဆစ်နဲ့ဖျက်ပြီး တံခါးကိုဟပြီး ဝင်တဲ့ပုံစံမျိုးတွေ့ရတယ်။ စျေးမှာရှိတဲ့ အစောင့်တွေ ဘာလုပ်နေကြလဲတော့မသိဘူး။ ဘေးဆိုင်တွေက ခြေရာလက်ရာပျက်နေလို့ သူတို့ကိုဖုန်းဆက်လိုက်တာ။ တန်ဖိုးရှိတာတွေ အတော်များများတော့ယူသွားကြတယ်” လို့ မျက်မြင်တွေ့သူတစ်ဦးက ပြောပါတယ်။
ဖောက်ထွင်းခံရတာကြောင့် လက်ဝတ်ရတနာတွေဖြစ်တဲ့ ကျောက်စိမ်းလက်ကောက်၊ ကျောက်စိမ်းပန်းပုရုပ်တွေ၊ ကျောက်စိမ်းနားကပ်တွေနဲ့ လည်ဆွဲတွေ ပျောက်ဆုံးနေခဲ့ပြီး တန်ဖိုးကိုတော့မသိရှိရသေးဘူးလို့ ဆိုပါတယ်။
စစ်ကောင်စီအာဏာသိမ်းပြီးနောက်ပိုင်း ရန်ကုန်မြို့လယ်ကောင်မှာ လုယက်မှု၊ ဖောက်ထွင်းမှုနဲ့ ဓားပြတိုက်မှုတွေ ဖြစ်ပွားနေပေမယ့် ကျူးလွန်နေတဲ့ တရားခံအများစုကို ဒီနေ့အထိဖမ်းဆီးနိုင်ခြင်းမရှိသေးသလို လုယက်မှုတွေလည်း နေ့စဥ်ဖြစ်ပွားနေတယ်လို့ ဒေသခံတွေကပြောပါတယ်။
MK-005
