မဲခေါင်၊ ဇန်နဝါရီ ၃၀

ကျားဖြန့်လို့ခေါ်တဲ့ အွန်လိုင်းလိမ်လည်မှုလုပ်ငန်းတွေ တာချီလိတ်ဖက်မှာ အဖမ်းအဆီးများနေတာကြောင့် မိုင်းဆတ်၊ မိုင်းတုံ ဖက်သို့ ပြောင်းရွှေ့နေကြတယ်လို့ ဒေသသတင်းအရင်းအမြစ်တွေထံက သိရပါတယ်။

တာချီလိတ်မှာ ကျားဖြန့်လုပ်ငန်းလုပ်ဆောင်နေသူ ၅၀၀ နီးပါး ဖမ်းဆီးခံထားရပြီးနောက် လုပ်ငန်းခေါင်းဆောင်တွေက မိုင်းဆတ် ၊ မိုင်းတုံဖက်သို့ လုပ်ငန်းတွေ ဆက်လက်လုပ်ကိုင်ဖို့ ပြောင်းရွှေ့နေကြတယ်လို့သိရပါတယ်။

“ကားအကောင်းတွေနဲ့ လွယ်ဆမ်ဆွန်က ရာဘာခြံကို ဖြတ်ဆင်းပြီး မိုင်းဆတ်၊ ဝမ်ဟုန် အဲဒီကနေ ဟိုပန်ဟိုရွက်၊ မိုင်းကျွတ်၊ ဟွေအောဖက်ကို သွားကြတယ်၊ မိုင်းဆတ်၊ နဲ့ မိုင်းတုံ မြို့တွေကို ဝင်စရာမလိုတဲ့ လမ်းတွေက သွားတာ၊ တစ်ခါသွားရင် ၂၀ ၊ ၃၀ ရှိတယ်၊ မိုင်းကျွတ်မှာ ထိုင်နေတယ်လို့လဲသိရတယ်” လို့ ပြောပါတယ်။

ကျားဖြန့်တွေအနက် တစ်ကယ့် ငွေကြေးတတ်နိုင်သူတွေက ကျိုင်းတုံ ဖက်မပြေးဘဲ မိုင်းဆတ်၊ မိုင်းတုံ ဖက်ပြေးတာလို့ပြောပါတယ်။

တာချီလိတ်မှာလည်း အိမ်ငှားပြီးလုပ်ငန်းတွေ လုပ်ကြကြောင်း၊ အရင်ကတော့ ဟိုတယ်အလတ်စားတွေကို ငှားပြီးလုပ်ကြပေမယ့် နောက်ပိုင်း အဖမ်းအဆီးများလာတော့ ခုလို လူသိပ်မသိနိုင်တဲ့ဂိုထောင်လိုနေရာတွေမှာ ပိတ်လှောင်ထားပြီး လုပ်ငန်းတွေ လုပ်ကိုင်ခိုင်းတာလို့ သိရပါတယ်။

မနေ့ ဇန်နဝါရီ ၂၉ ရက် နံက်အစောပိုင်းက တာချီလိတ်၊ ဆေခမ်းရပ်ကွက်ကို စစ်တပ်နဲ့ရဲပူးပေါင်းပြီး ဝင်ရောက်စီးနင်းရှာဖွေတာမှာ တရုတ်နိုင်ငံသား ၄၇၅ ဦးနဲ့ အမျိုးသမီး ၂၀ တို့ ဖမ်းဆီးခံခဲ့တယ်လို့သိရပါတယ်။

ဖမ်းမိတဲ့သူတွေကို တာချီလိတ်ကနေ ကျိုင်းတုံကို ပို့ပြီးနောက် ကျိုင်းတုံကတဆင့် မိုင်းလားကို ဆက်ပို့တယ်လို့ ဆိုပါတယ်။

`မိုင်းလားမှာ ကားပေါ်က ခုန်ချထွက်ပြေးတာတွေ၊ ခုန်ချလို့ ကားဘီးနဲ့ကြိတ်မိတာတွေတွေ့ရတယ်၊ နမ့်စန်ဘက်ကလည်း ထောင်ကျော်ပို့တာ” လို့ မိုင်းလားကို ကားဆွဲနေတဲ့ တာချီလိတ်က ကားသမားတစ်ဦးက ပြောပါတယ်။

အထောက်အထားမဲ့တရုတ်နိုင်ငံသားတွေဟာ တာချီလိတ်ဖက်ကို ပါလျိုး၊ ကျိုင်းလပ်၊ ဝမ်ပုံဖက်က ရောက်ရှိလာကြတာဖြစ်ပြီး ဟိုတယ်၊ လုံးချင်းအိမ် စတာတွေကို ဆေခမ်း၊ ဟောင်လိတ်၊ ဝိန်းကျောက်၊ ဝမ်လုံး၊ ဖမ်မင်ကျေးရွာစတဲ့ နေရာတွေမှာ ငှားရမ်းကာ လုပ်ငန်းတွေလုပ်နေကြတာလို့ သိရပါတယ်။

MK – 012

#MeKongNews

#ကျားဖြန့်

#တာချီလိတ်

#မိုင်းတုံ

#မိုင်းဆတ်

#ပြောင်းရွေ့

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)