တရုတ်-မြန်မာ နယ်စပ် ကုန်သွယ်ရေးဇုန် ဖြစ်တဲ့ မန့်ဝိန်းဂိတ်၊ နန်းတော်ဂိတ်၊ ဆင်ဖြူဂိတ်၊ ပန်ဆိုင်းစတဲ့ နယ်စပ်ကုန်သွယ် ရေးဂိတ်တွေကို လူအဝင်အထွက် ပြန်ဖွင့်ပေးကာ ဖွင့်လှစ်ဖို့ ပြင်ဆင်နေတယ်လို့ မူဆယ် နယ်စပ်ကုန်သည်တွေထံက သိရပါတယ်။
၈ ရက်နေ့မှာ ပြန်ဖွင့်မယ်။ လူအဝင်အထွက် ပေးမယ် ပြောတယ်။ သူတို့ ကြေညာချက်မှာ ကုန်နဲ့ပတ်သက်ပြီး ပြောသွားတာ မပါဘူး။ ဖွင့်တာကတော့ ကောင်းတယ်။ တရုတ်ဘက်မှာ ရောဂါက တအားဖြစ်နေတော့ သတိတော့ ထားရမယ်။ အခြားနိုင်ငံတွေဆို ကန့်သတ်ချက်တွေ ထုတ်ပြီး ကာကွယ်နေတာ ဆိုတော့ ဒီဘက်ကို ရောဂါတွေ ပျံ့နှံ့လာရင် မလွယ်ဘူး။ နောက်တစ်ခုက ကုန်စည်တွေနဲ့ ပတ်သက်ပြီး ဘာတွေ စီမံထားလဲ။ ဖွင့်ပြီးမှ ကောင်းမကောင်း ပြောလို့ရမယ်။ အခုထိ ရှင်းရှင်းလင်းလင်း ဘာမှ မသိသေးဘူး
လို့ မူဆယ်နယ်စပ် ကုန်သည် တစ်ဦးက ဆိုပါတယ်။
အခုလို နယ်စပ်ဂိတ်တွေ ပြန်ဖွင့်ပေး ပေမယ့် ကုန်သွယ်မှု အတွက် အကျိုးသက်ရောက်မှု အနည်းငယ်သာ ရှိမှာဖြစ်ပြီး အရင်လို မြန်မာဘက်ခြမ်း ၁၀၅ မိုင်မှာ အရာင်းအဝယ် ပြုလုပ်ခွင့် ရမှသာ အကျိုးအမြတ်များနိုင်ပြီး လက်ရှိမှာ တရုတ်ဘက်က ဝယ်လက်နဲ့ တိုက်ရိုက် ရောင်းဝယ်ခွင့် မရှိဘဲ ပွဲစားနဲ့သာ ရောင်းဝယ်နေရတယ်လို့ သူကပြောပါတယ်။
ဒီကုန်သွယ်ရေး ဂိတ်တွေကို ၂၀၁၉ ခု နစ်ကုန်ပိုင်းမှ စတင်ပြီး ကိုဗစ် ရောဂါ ကူးစက်မှု အပြင်းအထန် ဖြစ်နေစဉ်က ပိတ်ထားခဲ့ရာက ကုန်သွယ်ရာမှာတော့ မြန်မာဘက် ၁၀၅ မိုင် ကုန်သွယ်ရေးဇုန်မှာ ရောင်းဝယ်ခွင့် မပြုတော့ဘဲ တရုတ်ပြည်ဘက်မှာသာ အရောင်းအဝယ် ပြုလုပ်ဖို့ တရုတ်ဘက်က ကန့်သတ်ခဲ့တာ ဖြစ်ပါတယ်။