မဲခေါင်၊ မတ် ၁၉
ရှမ်းပြည်တောင်ပိုင်း၊ အင်းလေးဒေသ၊ ညောင်ရွှေမြို့နယ်၊ မင်းချောင်းအုပ်စုက မင်းချောင်းအရှေ့ရွာ ရာအိမ်မှူးကို ကျေးရွာအတွင်း မူးယစ်ဆေးဝါးရောင်းချနေသူတွေထံက အခွန်ငွေယူကာ ရောင်းချပေးနေမှုအပေါ် အင်းလေးဒေသ တရားမျှတမှုဖော်ဆောင်ရေးအဖွဲ့ JMC-I ကမတ် ၁၈ ရက်မှာ သတိပေးစာပေးပို့လိုက်တယ်လို့ သိရပါတယ်။
မင်းချောင်းအရှေ့ရွာ ရာအိမ်မှူး ဦးကျော်မြင့် ဆိုသူထံ ယင်းစာကို ပေးပို့လိုက်တာဟာ ရွာက ကလေးတွေ မူးယစ်ဆေးဝါးအများအပြားသုံးစွဲလာတာကို မိဘတွေက မူးယစ်ဆေးရောင်းသူတွေကို မရောင်းဖို့ ပြောကြတဲ့အခါမှာ ရာအိမ်မှူးကို အခွန်ပေးပြီးရောင်းတာ ဘာဖြစ်လဲဆိုတဲ့သဘောမျိုး တွေ့ကြုံနေရတဲ့အတွက် ယခုလို စာထုတ်ရတာလို့ JMC-I ရဲ့ ဒါရိုက်တာ ဒေါ်ယုလှိုင်သင်းက မဲခေါင်ကိုပြောပါတယ်။
အဝေးရောက်နေပေမယ့် ဇာတိရွာရဲ့ ကောင်းကျိုးကိုတော့ ကြည့်ရမယ်၊ ခုက မူးယစ်ဆေးရောင်းသူတွေက အခွန်ပေးပြီးရောင်းတာ တရားဝင်စကားမျိုးပြောလာပြီး သားသမီးတွေ မူးယစ်ဆေးရဲ့သားကောင်ဖြစ်ရတာကို တားဆီးချင်တဲ့ မိဘတွေကို ပြန်ဆက်ဆံလာနေတာဟာရွာက လူငယ်တွေကို ပျက်စီးဖို့ ကျေးရွာကို ဖျက်ဆီးနေတာဖြစ်တယ်၊ ဒါကြောင့် တာဝန်ရှိတဲ့ ရာအိမ်မှူးကို သတိပေးစာပေးပို့ရတာဖြစ်တယ်လို့ မဲခေါင်ရဲ့ ဆက်သွယ်မေးမြန်းမှုကို ဖြေကြားပါတယ်။
မင်းချောင်းရှေ့ ရာအိမ်မှူးဟာ အခွန်ယူပြီး မူးယစ်ဆေးရောင်းခွင့်ပြုတာအပြင် အဝေးဧည့်စာရင်းတိုင်ရင် ကျပ်ငွေ၃ သိန်းတောင်းတာ၊ ကရင်နီစစ်ဘေးရှောင်တွေကို ရွာမှာ အကြောင်းအမျိုးမျိုးပြပြီး လက်မခံတာ၊ လူသားချင်း ကိုယ်ချင်းစာနာစိတ်မထာားဘဲ မကူညီတာ၊ စစ်ကောင်စီရဲ့ လက်ကိုင်တုတ် ပျူစောထီးတွေကို စည်းရုံးပေးတာတွေလုပ်နေတယ်လို့သူက ဖြည့်စွက်ပြောပါတယ်။
လက်ရှိ အာဏာပါဝါကို အလွဲသုံးစားလုပ်နေတဲ့အပေါ် သတိပေးတာဖြစ်ပြီး မလိုက်ခဲ့ရင် တော်လှန်ရေးအဖွဲ့အစည်းတွေရဲ့ မူဝါဒအတိုင်းပြင်းပြင်းထန်ထန် ထိရောက်စွာ အရေးယူသွားမယ်လို့ သတိပေးစာမှာ ဖော်ပြပါရှိပါတယ်။
မင်းချောင်းအရှေ့ရွာဟာ ညောင်ရွှေမြို့နယ်၊ အင်းလေးကန်အနောက်ဘက်ကမ်းမှာ တည်ရှိပြီး မင်းချောင်းအုပ်စု ၆ရွာထဲက တစ်ရွာဖြစ်ကာ ရေ ၆ လ ၊ ကုန်း ၆ လ ရွာဖြစ်တယ်လို့ သိရပါတယ်။
MK-012
