မဲခေါင်၊ မတ် ၂၈
ရှမ်းပြည်မြောက်ပိုင်း၊ သိန္နီမြို့နယ်ထဲက SSPP တပ်စခန်းတစ်ခုကို မတ်လ ၂၆ ရက်ကစပြီး MNDAA တပ်တွေက ဒရုန်းနဲ့ ၂ ကြိမ်တိုင် စတင်တိုက်ခိုက်တာကြောင့် နှစ်ဖက်ထိတွေ့မှု ဖြစ်ပွားခဲ့တယ်လို့ SSPP က မနေ့ မတ် ၂၇ ရက်မှာ ထုတ်ပြန်ပါတယ်။
သိန္နီမြို့နယ်အတွင်းက နမ့်စလပ်နဲ့စယ်အူကျေးရွာအုပ်စုမှာ လှုပ်ရှားနေတဲ့ SSPP လှုပ်ရှားစစ်ကြောင်းကို MNDAA က မတ်လ ၂၆ ရက် ညနေ ၃ နာရီကျော်မှာ MNDAA က တိုက်ခိုက်ရေးဒရုန်းနဲ့ လိုက်လံ တိုက်ခိုက်ခဲ့ရာမှာ စယ်အူကျေးရွာအုပ်စု ကုန်းညောင်ကျေးရွာအနီးမှာ ၁၀ မိနစ်ကြာ နှစ်ဖက်ထိတွေ့ တိုက်ပွဲဖြစ်ပွားခဲ့တယ်လို့ သိရပါတယ်။
ယမန်နေ့ မတ်လ ၂၇ ရက် မနက် ၉နာရီမှာလည်း စယ်အူကျေးရွာအုပ်စု၊ ပန်နားကျေးရွာအနီးက လယ်ကွက်ထဲကနေ MNDAA အင်အား ၂၀၀ ခန့်က အနီးနားရှိ SSPP ရဲ့ အထူးတပ်စခန်းတစ်နေရာကို တိုက်ခိုက်ရေးဒရုန်းနဲ့ အကြိမ်ပေါင်း ၅၀ ကျော် ဗုံးကြဲတိုက်ခိုက်ခဲ့ပြီး မနက် ၁၁ နာရီကျော်အချိန်မှာ မြေပြင် စစ်အင်အား ၂၀၀ ကျော်နဲ့ SSPP တပ်စခန်းကို ထပ်မံတိုက်ခိုက်လို့ နေ့လည် ၁၂ နာရီကျော်အထိ တိုက်ပွဲဖြစ်ပွားခဲ့တယ်လို့ ဆိုပါတယ်။
MNDAA ကတိုက်လာလို့ SSPP က ခုခံကာကွယ်တဲ့အနေအထားနဲ့သာ တိုက်ခိုက်ခဲ့တာဖြစ်ပြီး တိုင်းရင်းသားအချင်းချင်းပြန်လည်သင့်မြတ်ရေးအတွက် ရှေ့ရှုကာ တွေ့ဆုံဆွေးနွေးတဲ့လမ်းစဉ်နဲ့ အတတ်နိုင်ဆုံး ဖြေရှင်းသွားနိုင်ရန်လည်း ကြိုးပမ်းသွားမှာဖြစ်ပြီး လုံးဝဖြေရှင်းမရမှသာ မိမိအဖွဲ့အစည်း မိမိအုပ်ချုပ်ရေးနယ်မြေအတွင်းက ပြည်သူတွေကို ထိပါးစော်ကားလာပါက SSPP အနေနဲ့ ထိထိရောက်ရောက် ပြန်လည်တုံ့ပြန်သွားမယ်လို့ ဆိုပါတယ်။
မတ်လ ၂၇ ရက် က မဲခေါင်သတင်းဌာနရဲ့ ဆက်သွယ်စုံစမ်းချက်အရ စယ်အူက MNDAA တပ်စခန်းမှာ မတ်လ ၂၆ ရက် ညနေပိုင်း တန်းစီချိန် SSPP က လာရောက်ပစ်ခတ်လို့ တပ်ဖွဲ့ဝင် ၁ ဦးဒဏ်ရာရတဲ့အပေါ် MNDAA တွေက ပြန်လည် တုံ့ပြန်တိုက်ခိုက်တယ်လို့ သိရပါတယ်။
ယင်းဖြစ်စဉ်နဲ့ပတ်သက်လို့ MNDAA အနေနဲ့ ပြောကြားချက် တစ်စုံတစ်ရာ မရှိသလို မဲခေါင်အနေနဲ့လည်း ဆက်သွယ်လို့ မရခဲ့ပါဘူး။
အဆိုပါစယ်အူကျေးရွာမှာ MNDAA အပြင် TNLA နဲ့ KIA တပ်ဖွဲ့တွေပါရှိကြပြီး တိုက်ပွဲဘာကြောင့် ဖြစ်ပွားရတယ်ဆိုတာတော့ မသိရသေးပါဘူး။
MK-012
