မဲခေါင်၊ အောက်တိုဘာ ၂၇
ရှမ်းပြည်နယ် မြောက်ပိုင်းဒေသမှာ ဖြစ်ပွားနေတဲ့ တိုက်ပွဲတွေ အတွင်း မြောက်ပိုင်း မဟာမိတ် တပ်ဖွဲ့တွေနဲ့ အတူ ပြည်သူ့ကာကွယ်ရေး တပ်မတော်(မန္တလေး)-MDY PDF နဲ့ ဗမာပြည်သူ့လွတ်မြောက်ရေး တပ်မတော်-BPLA တို့ ပါ၀င် တိုက်ခိုက်နေတယ်လို့ MDY PDF တာ၀န်ရှိသူ ကိုအော်စမွန်က မဲခေါင်သတင်းဌာနကို ဒီကနေ့ အောက်တိုဘာ ၂၇ ရက်မှာ ပြောပါတယ်။
“ရှမ်းမြောက် တိုက်ပွဲတွေမှာ ပါ၀င်တိုက်ခိုက်နေတာ မှန်ပါတယ်။ ဒါပေမဲ့ တိုက်ပွဲ အခြေအနေ အသေးစိတ် ကိုတော့ ပြောပြလို့ မရသေးပါဘူး။ နောက်မှ ထုတ်ပြန်ပါ့မယ်” လို့ သူကရှင်းပြပါတယ်။
ရှမ်းမြောက်က စစ်ကောင်စီ အထိုင် တပ်စခန်းတွေကို မဟာမိတ် ညီနောင် တပ်ဖွဲ့တွေဖြစ်တဲ့ TNLA၊ MNDAA၊ AA တို့အပြင် MDY PDF နဲ့ BPLA တပ်ဖွဲ့တို့ အော်ပရေးရှင်း ၁၀၂၇ စစ်ဆင်ရေး အဖြစ် ပါ၀င် တိုက်ခိုက်နေတယ်လို့ ဆိုပါတယ်။
BPLA တည်ထောင်သူ ကိုဆောင်းခ က “ကျွန်တော်တို့ BPLA က စိတ်ရှည်လက်ရှည်နဲ့ လူတွေ အထင်အမြင်လွဲခံ၊ ပင်ပန်းဆင်းရဲဒဏ်ခံပြီး ၂ နှစ်ကျော်ကာလ တည်ဆောက်ခဲ့ရတာတွေကို အခုတခေါက်မှာတော့ ဗမာပြည်သူတွေ နားလည်လာနိုင်မယ်လို့ ယုံကြည်မျှော်လင့်ပါတယ်။ ကျွန်တော်တို့ အတွက်တော့ တိုက်ပွဲက အခုမှစတာ ဖြစ်ပါတယ်” လို့ လူမှုကွန်ရက် စာမျက်နှာမှာ ရေးသား ပြောဆိုထားပါတယ်။
လက်ရှိ တော်လှန်ရေး မဟာမိတ် ပူးပေါင်းတပ်တွေ နဲ့ စစ်ကောင်စီတပ် တိုက်ပွဲတွေ ပြင်းထန်နေဆဲဖြစ်ပြီး စစ်တပ်စခန်း တော်တော်များများကို သိမ်းပိုက်ထားနိုင်ပြီလို့ တော်လှန်ရေးအင်အားစုတွေထံက သိရပါတယ်။
MK-007
#MekongNews
#ရှမ်းမြောက်
#MDY_PDF
#BPLA