မဲခေါင်၊ မတ် ၂၈

ရှမ်းပြည်တောင်ပိုင်း၊ ပင်လောင်းမြို့နယ်၊ နန်းတုတ်ကျေးရွာအနီးကို တိုက်ပွဲဖြစ်ပွားတာမရှိဘဲ စစ်ကောင်စီက မတ်လ ၂၇ ရက်နေ့လည်ပိုင်းက လေယာဉ်နဲ့ မီးလောင်ဗုံးကြဲချကာ ပြောင်းတင်လှေဆိပ်ကို လေယာဉ်နဲ့ ပစ်ခတ်တိုက်ခိုက်တယ်လို့ သိရပါတယ်။

စစ်ကောင်စီဟာ လေယာဉ်နဲ့ ယမန်နေ့ မတ်လ ၂၇ ရက် နေ့လည် ၁ နာရီ ၅၅ မိနစ်အချိန်ခန့်မှာ နန်းတုတ်ကျေးရွာအနီးကို မီးလောင်ဗုံးကြဲချ တိုက်ခိုက်ခဲ့တယ်လို့ သိရပါတယ်။

မီးလောင်ဗုံး ၁ လုံးဟာ နန်းတုတ်ရွာရဲ့ မြောက်ဘက် သချိုင်းထဲ ကျရောက်ခဲ့ပြီး ပြောင်းတင်တဲ့ လှေဆိပ်ကိုလည်း လေယာဉ်နဲ့ နှစ်ကြိမ်ပတ်ကာ ပစ်ခတ်ခဲ့လို့ပြောင်းတင်လှေဆိပ်နား ရပ်ထားတဲ့ ကားတစ်စီး ထိမှန်ပျက်စီခဲ့တယ်လို့ သိရပါတယ်။

ဒါ့အပြင် ရေပူ(ထီခိုး)ရွာကို ဖယ်ခုံစစ်ကောင်စီတပ်က လက်ူနက်ကြီးနဲ့ ၈ ကြိမ်ပစ်ခတ်ခဲ့တာမှာ နေအိမ် ၁ လုံး ထိမှန်ပျက်စီးခဲ့တယ်လို့ သိရပြီး ရွာသူရွာသားတွေကတော့ ထွက်ပြေးတိမ်းရှောင်နေကြလို့ အထိအခိုက်မရှိဘူးလို့ သိရပါတယ်။

ပြီးခဲ့တဲ့ မတ်လ ၂၃ ရက် ညပိုင်းမှာလည်း ယင်းနန်းတုတ်ကျေးရွာကို ဖယ်ခုံတပ်က လက်နက်ကြီးနဲ့ ၅ လုံးပစ်ခတ်ခဲ့လို့ ကုန်စုံဆိုင် ၁ ဆိုင်ကို ထိမှန်ပျက်စီးခဲ့သေးတယ်လို့ သိရပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)