မဲခေါင်၊ မတ် ၂၇
ရှမ်းပြည်တောင်ပိုင်း၊ ပအိုဝ်ေးဒသ ဆီဆိုင်မြို့တွင်းနဲ့ မြို့ပတ်ဝန်းကျင်မှာ တိုက်ပွဲတွေ ပြင်းထန်နေတယ်လို့ PNLA က ဒီနေ့ မတ်လ ၂၇ ရက်မှာ ထုတ်ပြန်ပါတယ်။
စစ်ကောင်စီက မြို့တွင်းကို တင့်ကားတွေ အသုံးပြု ထိုးစစ်ဆင်နေသလို လက်နက်ကြီးတွေ၊ ဒရုန်းတွေနဲ့ အဆမတန် ပစ်ခတ်နေတာကြောင့် အိုးအိမ်တွေ ပျက်စီးနေရတယ်လို့ ပါရှိပါတယ်။
လက်ရှိ တိုက်ပွဲပြင်းထန်နေတဲ့ မြို့ထဲကို အချို့ပြည်သူတွေက အရဲစွန့်ပြီး ဝင်ရောက်ဖို့ ကြိုးစားနေတာတွေကြောင့် စစ်ကောင်စီနဲ့အပေါင်းပါ လက်ပါးစေတွေက ပစ်ခတ်ဖမ်းဆီးမှုတွေ ပြုလုပ်ခဲ့တာမှာ ပြည်သူအချို့ထိခိုက်သေဆုံးတာ၊ အဆက်အသွယ်ပြတ်တောက်ကာ ပျောက်ဆုံးနေတာတွေရှိ နေတယ်လို့ သိရပါတယ်။
ဆီဆိုင်မြို့ဟာ တိုက်ပွဲဖြစ်ပွားနေတဲ့ စစ်ဇုံအတွင်းကျရောက်နေပြီး တိုက်ပွဲလဲ ပြင်းထန်နေတာဖြစ်လို့ အရဲစွန့်ကာ မြို့တွင်းကို ဝင်ရောက်ခြင်းတွေ လုံးဝ(လုံးဝ)မပြုလုပ်သင့်ဘူး လို့ ပြောပါတယ်။
ပြည်သူတွေအနေနဲ့ PNLA ရဲ့ တရားဝင် သတင်းထုတ်ပြန်ချက်တွေကို စောင့်ကြည့်ဖို့နဲ့ တရားဝင် အသိပေးထုတ်ပြန်ချင်းတွေ မရှိမခြင်း မြို့တွင်းကို အရဲစွန့် ဝင်ရောက်ခြင်းတွေ မပြုလုပ်ကြဖို့ အထူးတိုက်တွန်းလိုတယ်လို့ ပါရှိပါတယ်။
ထို့အပြင် မဲနယ်တောင်ဒေသကို ထိုးစစ်ဆင်နေတဲ့ စစ်ကောင်စီတပ်ဖွဲ့ဝင်တွေဟာ ပအိုဝ်းကျေးရွာက အမားပြည်သူပိုင် အိုးအိမ်စည်းစိမ်တွေကို ဖျက်ဆီးခိုးယူမှုတွေလုပ်နေပြီး ယမန်နေ့ မတ်လ ၂၆ ရက်က လုံးဒါကျေးရွာအတွင်းကိုဝင်ရောက်ကာ ပြည်သူတွေရဲ့ ပစ္စည်းတွေကို ခိုးယူပြီး အဲ့ဒီ့ကျေးရွာမှာပဲ တပ်စွဲနေထိုင်ခဲ့တယ်လို့ ဆိုပါတယ်။
ဒါ့အပြင် စစ်ကောင်စီဟာ လွယ်မောတောင် ဒေသကိုလည်း လက်နက်ကြီးနဲ့ ၄ ကြိမ် ပစ်ခတ်ခဲ့တယ်လို့ ဖော်ပြပါရှိပါယ်။
ဆီဆိုင်မြို့မှာ တိုက်ပွဲတွေဖြစ်ပွားခဲ့တဲ့ ဇန်နဝါရီလ ၂၃ ရက်က ယနေ့အထိ မြို့ကို ပစ္စည်းယူတာ အကြောင်းအမျိုးမျိုးနဲ့ပြန်တဲ့သူ ၆၀ ဦးကျော် မိသားစုနဲ့ အဆက်အသွယ်မရဘဲ ပျောက်ဆုံးနေသလို ဆီဆိုင်မြို့ကို ပြန်လို့ရပြီဆိုပြီး သတင်းအတုတွေ ဖော်ပြပေးနေတဲ့ အွန်လိုင်းပေါ်က စစ်ကောင်စီရဲ့အလိုတော်ရိပိုစ်တွေကို မယုံကြည်ကြဖို့ စစ်ဘေးရှောင်သူ အချင်းချင်း သတိပေးနေကြပါတယ်။
MK-012
