မဲခေါင်၊ ဇန်နဝါရီ ၃၀
ရှမ်းပြည်နယ်တောင်ပိုင်း၊ ဆီဆိုင်မြို့ကို စစ်ကောင်စီက လက်နက်ကြီးတွေ၊ လေကြောင်းတိုက်ခိုက်မှုတွေနဲ့ တိုက်ပွဲပြင်းထန်နေဆဲဖြစ်ပြီး ပအိုဝ်းအမျိုးသားလွတ်မြောက်ရေးတပ်မတော် (PNLO) က မြို့ကို ထိန်းချုပ်ထားဆဲ ဖြစ်တယ်လို့ ဒေသခံတွေထံမှ သိရပါတယ်။
စစ်ကောင်စီလေယာဉ်တွေက အရပ်သားပစ်မှတ်နဲ့ ဘာသာရေးအဆောက်အဦ ဘုန်းကြီးကျောင်း၊ ဓမ္မာရုံ၊ ဘုရားကျောင်းနဲ့ စာသင်ကျောင်းတွေကို ဦးတည်တိုက်ခိုက်နေတာဖြစ်လို့ ဒေသခံတွေက ပြောပါတယ်။
လေယာဉ်နဲ့ ဗုံးကြဲမှုကြောင့် ဟိုခဲဘုန်းကြီးကျောင်း၊ ကောင်းမှုဗွာ ဘုန်းကြီးကျောင်း၊ အရိယာမဂ္ဂင်ဓမ္မာရုံ၊ မြကန်သာရပ်ကွက် ခရစ်ယန်ဘုရားကျောင်းနဲ့ နန်းတာင်းမူလတန်းကျောင်းတွေ ထိခိုက်ပြိုကျပျက်စီးခဲ့ရသလို လက်နက်ကြီးပစ်ခတ်မှုကြောင့် အိမ်ခြေ ၁၀ အိမ်ကျော် မီးသင့်လောင်ကျွမ်းခဲ့ကာ သေဆုံးသူ ၃ ဦး ရှိပြီလို့ သိရှိရပါတယ်။
မြို့နဲ့အနီးနားမှာရှိတဲ့ တပ်ရင်းတွေမှာ စစ်ကောင်စီ၊ ပြည်သူ့စစ်နဲ့ PNLA အဖွဲ့တွေဟာ တိုက်ပွဲဖြစ်နေပြီး လေကြောင်းကနေ ဗုံးကြဲတာကြောင့် မြို့တွင်းနေရာတွေမှာ မီးလောင်ကုန်တယ်လို့ ကျန်ရှိမြို့ခံတချို့က ပြောပါတယ်။
စစ်ဘေးရှောင်တွေဟာ မြို့နဲ့အနီးက တောတောင်တွေထဲ စစ်ဘေးရှောင်နေရပြီး စားသောက်ရေးအတွက် ခက်ခဲနေတယ်လို့ သိရပါတယ်။
တိုက်ပွဲအခြေအနေ ပြင်းထန်နေဆဲဖြစ်လို့ ဒေသခံတွေအနေနဲ့ နေအိမ်ပြန်ကြည့်တာတွေ မလုပ်ဘဲ ယာယီခိုလှုံနေကြဖို့ PNLA က သတိပေးထားပါတယ်။
MK-012
#MeKongNews
#ဆီဆိုင်
#စစ်ကောင်စီ
#PNLA
#ပအိုဝ်း
#ဗုံးကြဲ