မဲခေါင်၊ ဒီဇင်ဘာ ၉
ရှမ်းပြည်နယ်မြောက်ပိုင်း၊ မန်တုံမြို့နယ်ရှိ စစ်ကောင်စီရဲ့ ခိုမုန်းစခန်းကို တအာင်း(ပလောင်)လွတ်မြောက်ရေးတပ်မတော် (TNLA) က ဒီဇင်ဘာ ၇ ရက်နေ့မှာ သိမ်းပိုက်ခဲ့ပြီး ရရှိခဲ့တဲ့ လက်နက်ခဲယမ်းတွေကို ဒီနေ့မှာ ထုတ်ပြန်ပါတယ်။
အဲ့ဒီစခန်းကနေ ၆၀ မမ လက်နက်ကြီးအပါအဝင်၊ ပစ္စတို(၁)လက်၊ လက်နက် (၅) လက်၊ ခဲယမ်းများစွာနဲ့ စစ်သုံးပစ္စည်းများ သိမ်းဆည်းရမိခဲ့တယ်လို့ TNLA က ထုတ်ပြန်ချက်က ဆိုပါတယ်။
ဒီဇင်ဘာ ၇ ရက်နေ့မှာ ကျောက်မဲမြို့နယ်ရှိ စစ်ကောင်စီရဲ့ လယ်ကြီးစခန်းကိုလည်း TNLA နဲ့ PDF တို့က တိုက်ခိုက်သိမ်းပိုက်ခဲ့ပြီး စစ်သားနဲ့ရဲ ၅ ယောက်ကို သုံ့ပန်းအဖြစ် ဖမ်းမိခဲ့ကာ လက်နက်ခဲယမ်းတွေလည်း သိမ်းမိခဲ့ပါသေးတယ်။
တအာင်း(ပလောင်)ဒေသအတွင်းက စစ်ကောင်စီစခန်း ၅၃ ခုကို TNLA က သိမ်းပိုက်ထားပါတယ်။ မြောက်ပိုင်းမဟာမိတ် ၃ ဖွဲ့ ဖော်ဆောင်နေတဲ့ “၁၀၂၇ စစ်ဆင်ရေး” အတွင်း ကိုးကန့်ဒေသမှာလည်း စစ်ကောင်စီစခန်း ၂၀၀ ကျော်ကို MNDAA က သိမ်းပိုက်ထားပါတယ်။
ရှမ်းပြည်မြောက်ပိုင်းကို စစ်ကောင်စီတပ်တွေ စစ်ကူမလာနိုင်အောင် သိန္နီမြို့ကနေ TNLA နဲ့ PDF ပူးပေါင်းအဖွဲ့တွေက ကြားဖြတ်တိုက်ခိုက်ပေးနေပြီး မန္တလေးတိုင်းအတွင်းက မတ္တရာနဲ့ မိုးကုတ်မြို့နယ်အတွင်းမှာလည်း တိုက်ခိုက်မှုတွေ ရှိနေပါတယ်။
#MeKongNews
#မန်တုံ
#ခိုမုန်း
#ခဲယမ်း
#သိမ်းပိုက်
#TNLA