မဲခေါင်၊ ဧပြီ ၁၇

ရှမ်းပြည်တောင်ပိုင်း၊ ခိုလမ်မြို့အထွက်က စစ်ကောင်စီဂိတ်မှာ သွားလာတဲ့သူတစ်ချို့ကို စစ်ကောင်စီတပ်သားတွေက ဧပြီ ၁၆ ရက်မှာ သေနတ်ထောက်စစ်ဆေးပြီး တစ်ဦးကို ငွေတစ်သိန်းတောင်းလို့ ပေးခဲ့ရကြောင်း ဒေသခံတွေက ပြောပါတယ်။

စစ်ကောင်စီဂိတ်မှာ ဖြတ်သွားလာတဲ့သူတွေကို ဂိတ်ကြေးပေးဆောင်တာတွေရှိပြီး အခုလိုငွေညစ်တာလဲ မကြာခဏကြုံရတယ်လို့ ဒေသခံတွေက ဆိုပါတယ်။

“ မနေ့က သင်္ကြန်အလှူသွားတာ အိမ်ကားနဲ့လူ ၅ ယောက်ပါတယ် ဂိတ်ကြေးပေးတာ မယူဘူးတဲ့။ သေနတ်နဲ့ထောက်ပြီး တစ်ယောက်တစ်သိန်းမပေးရင် မသွားရဘူးတဲ့။ တစ်ခြားဖြတ်တဲ့ကားတွေ စစ်တယ် ပိုက်ဆံတောင်းတယ်၊ လွတ်ပေးတယ်၊ ကျွန်တော်ကံပဲပြောရမှာလား ၄ သိန်းနဲ့ညှိပြီး လာရတယ်” လို့ မဲခေါင် ကိုပြောပါတယ်။

ခိုလမ်မြို့နဲ့ မိုင်းနောင်မြို့ကြားမှာလည်း စစ်ကောင်စီတပ်ဖွဲ့က လမ်းကြီးတွေမှာ မကြာခဏ စစ်ဆေးမှုတွေပြုလုပ်ပြီး ဖြတ်သွားလာတဲ့ ကားနဲ့ဆိုင်ကယ်တွေကို သေနတ်ထောက် ငွေညစ်ကြတယ်လို့ သူက ဆက်ပြောပါတယ်။

အဲ့ဒီ့ခိုလမ်မြို့ စစ်ကောင်စီဂိတ်မှာ ဂိတ်ကြေးကို တစ်သောင်းအထက်ပေးဆောင်ရတယ်လို့ ကားသမားတစ်ဦးက ပြောပါတယ်။

“ ပိုက်ဆံတောင်းတာလည်း စည်းကမ်းမရှိဘူး။ သူတို့ပိုက်ဆံမရှိတဲ့အချိန်ဆို ကားတစ်စီးကို ၅ သောင်းပေးရတယ်၊ တခါတစ်လေ ခရီးသည်တွေကို မှတ်ပုံတင်စစ်တယ်၊ မပါတဲ့သူတွေကို တစ်သိန်း ၅ သောင်း ထက်ပေးရတယ်။ ပုံမှန်ဆို တစ်သောင်းပဲပေးရတယ် “ လို့ မဲခေါင်ကိုပြောပါတယ်။

ရှမ်းတောင်နဲ့ ရှမ်းမြောက်နယ်စပ်ဖြစ်တဲ့ ကျေးသီးမြို့နဲ့ မိုင်းရယ်မြို့ ကြားက စစ်ကောင်စီဂိတ်မှာလည်း ဂိတ်ကြေးအများပေးဆောင်ရတယ်လို့ သူကဆက်ပြောပါတယ်။

စစ်တပ်အာဏာသိမ်းပြီးနောက်မှာ စစ်ကောင်စီအုပ်ချုပ်ထားနိုင်တဲ့ မြို့နယ်အလိုက် စစ်ဆေးရေးဂိတ်တွေ ဖွင့်လှစ်ထားပြီး စစ်ဆေးမှုတွေ ဂိတ်ကြေးတွေ ပေးဆောင်နေရပါတယ်။

MK 011

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)