မဲခေါင်၊ ဒီဇင်ဘာ ၂၈
အင်ဒိုနီးရှားနိုင်ငံကို ရိုဟင်ဂျာဒုက္ခသည်တွေ လှေတွေနဲ့ဆက်တိုက်ဆိုသလို ရောက်ရှိလာတဲ့အတွက် အင်ဒိုနီးရှား ကျောင်းသားလူငယ်တွေကြား နေရပ်ပြန်ပို့ရေး ဆန္ဒပြတောင်းဆိုမှုတွေ အရှိန်မြင့်လာချိန် ဒီဇင်ဘာ ၂၇ ရက်နေ့က ဘန်ဒါအက်ချ်အရပ် ရိုဟင်ဂျာဒုက္ခသည်စခန်းထဲထိ ယူနီဖောင်းဝတ်ကျောင်းသားများစွာ စီးနင်းဝင်ရောက်ပြီး ဒုက္ခ သည်တွေကို နေရပ်ပြန်ပို့ဖို့ အတင်းအကြပ်မောင်းထုတ်ခဲ့ကြပါတယ်။
ရိုက်တာသတင်းရဲ့ ရုပ်သံဖော်ပြမှုမှာ ရဲအစောင့်အရှောက်နဲ့ အကာအရန်တွေကို အစိမ်းရောင် ကျောင်းဂျာကင် ဝတ် ကျောင်းသားများစွာဟာ ကျော်ဖြတ်ပြီး ဒေါသတကြီးနဲ့ ၁၃၇ ယောက်ရှိတဲ့ ဒုက္ခသည်တွေကို ထရပ်ကား နှစ်စီးပေါ် အတင်းတွန်းတင်၊ တခြားဘန်ဒါအက်ရှ်အရပ်က နေရာတစ်ခုကို ပြောင်းရွှေ့ခိုင်းပြီး အားလုံးကို နေရပ် မြန်မာနိုင်ငံပြန်ပို့ဖို့ ဖိအားပေးတောင်းဆိုခဲ့ကြတာ တွေ့ရပါတယ်။
အမျိုးသမီးနဲ့ကလေးငယ်ပေါင်းများစွာပါရှိတဲ့ ဒုက္ခသည်တွေဟာ ထိတ်လန့်တကြား ပလတ်စတစ်ထုတ်လေးတွေ စွဲပြီး ငိုယိုနေကြတာလည်း တွေ့ရတာကြောင့် ကုလသမဂ္ဂဒုက္ခသည်များဆိုင်ရာအေဂျင်စီ (UNHCR) က ကလေးနဲ့အမျိုးသမီးများစွာပါဝင်တဲ့ ဒုက္ခသည်တွေအပေါ် အကြမ်းဖက်တိုက်ခိုက်မှုဖြစ်လို့ လွန်စွာစိတ်မကောင်း ဖြစ်ရကြောင်းနဲ့ အင်ဒိုနီးရှားအစိုးရအနေနဲ့ ဒုက္ခသည်တွေကို ပိုပြီးလုံခြုံတဲ့အကာအကွယ်ပေးသင့်တယ်လို့ တိုက် တွန်းထုတ်ပြန်ခဲ့ပါတယ်။
၁၉၅၁ ကုလသမဂ္ဂဒုက္ခသည်များဆိုင်ရာ ကွန်ဗန်းရှင်းမှာ လက်မှတ်မထိုးခဲ့လို့ ဒုက္ခသည်တွေကို လက်မခံနိုင်တဲ့ အင်ဒိုနီးရှားသမ္မတဂျိုကိုဝီက ဒီလပိုင်းထဲ ရိုဟင်ဂျာတွေ လှေနဲ့ အင်ဒိုနီးရှားကို ဆက်တိုက်ရောက်လာကြခြင်းဟာ လူမှောင်ခိုကူးတင်သွင်းလာခြင်းဖြစ်တယ်လို့ အပြစ်တင်ပြောကြားခဲ့ပြီး နိုင်ငံတကာအဖွဲ့အစည်းတွေပူးပေါင်းပါ ဝင်လို့ ခိုလှုံရာယာယီအဆောင်တွေ ဆောက်ပေးဖို့ တောင်းဆိုခဲ့ပါတယ်။
နိုဝင်ဘာနဲ့ဧပြီလကြားဟာ ပင်လယ်ရေကြောင်း လှိုင်းငြိမ်ချိန်ဖြစ်လို့ ရိုဟင်ဂျာတွေဟာ အင်ဒိုနီးရှားနဲ့ မလေး ရှားနိုင်ငံဆီ လှေတွေနဲ့ ဆက်တိုက်ကူးဖြတ်ရောက်ရှိလာကြပြီး အရှေ့အာရှနိုင်ငံတွေက ပြည်ပသားတွေသာ ဖြစ်တယ်၊ နိုင်ငံသားခံယူခွင့်မပေးတဲ့ ဒီလူချိုးတွေဟာ မဖိတ်ခေါ်ဘဲ အင်ဒိုနီးရှားကို ကျူးကျော်ရောက်လာသူတွေ သာဖြစ်တယ်လို့ အမုန်းစကားတွေနဲ့ သွေးထိုးမှုတွေကြောင့် အင်ဒိုနီးရှားမှာ ကျောင်းသားလူငယ်တွေနဲ့ ပြည်သူ တွေက ဆန်ကျင်ဆန္ဒပြမှုတွေ ဆက်တိုက်လုပ်နေကြတာဖြစ်ပါတယ်။
Ref: indiatoday
MKF-001
#MeKongNews
#အင်ဒို
#ရိုဟင်ဂျာ
#ဝင်စီး
#မောင်းထုတ်
