မဲခေါင်၊ အောက်တိုဘာ ၂၈

ရှမ်းပြည်တောင်ပိုင်း ပင်လောင်းမြို့နယ် တီကျစ်မြို့ရှိ ကျောက်မီးသွေးစက်ရုံသည် ညဖက်လူအိပ်ချိန်တွင်ပါ စက်သံများ ပြင်းထန်စွာ ဆူညံနေသဖြင့် ပြည်သူများအတွက် နေ့စဉ်အနှောက်အယှက်ဖြစ်နေသည်ဟု ဒေသခံများကပြောသည်။

ယင်းကျောက်မီးသွေးစက်ရုံမှ စက်သံများသည် နေ့ဖက်သာမက ညဖက်အနားယူချိန်၊ အိပ်စက်ချိန်တွင်လည်း စက်သံဆူညံစွာ ထွက်ပေါ်နေခြင်းကြောင့် ဒေသခံများအတွက် အနှောက်အယှက်ဖြစ်နေပြီး အထူးသဖြင့် သက်ကြီးရွယ်အိုများ၊ ကလေးများ၊ မကျန်းမာသူများ အိပ်စက်ရန် အခက်အခဲဖြစ်ရသည်ဟု ဒေသခံများက ပြောသည်။

“နေ့ဆူညံ ညဆူညံနဲ့ လူကကြာလာရင် နေလို့ကို မကောင်းတော့ဘူး။ အဲ့ဆူညံသံကိုပဲ ကြားနေရလို့ လူကလည်း စိတ်မရှည်တော့ဘူး။ အခုက နေ့ဖက်တင်မက ညဖက် ၉နာရီ ၁၀နာရီထိလည်း စက်ဆူသံတွေက တဝေါတဝေါနဲ့ တော်တော်ကို ဒုက္ခပေးနေတယ်ဗျာ” ဟု ဒေသခံတစ်ဦးက ပြောသည်။

ထို့ကြောင့် ယင်းစက်ဆူညံသံများ ညဖက်တွင် မထွက်ပေါ်အောင် လုပ်ပေးရန် အုပ်ချုပ်ရေးမှူး နှင့် ရဲစခန်းကို တိုင်ကြားခဲ့သော်လည်း တစ်စုံတစ်ရာ လုပ်ဆောင်ပေးခြင်းမရှိကြောင်း ဒေသခံများကပြောသည်။

ဒေသခံများ၏ ပြောကြားချက်အရ စက်ရုံမှ စက်ဆူညံသံများအပြင် အနံ့အသက်ဆိုးများနှင့် ပြာမှုန်များလည်း ထွက်ပေါ်နေသဖြင့် အနီးဝန်းကျင်ရှိ ဒေသခံများ အထူးသဖြင့် ကိုယ်ဝန်ဆောင်မိခင်များနှင့် ကလေးငယ်များအတွက် ကျန်းမာရေးထိခိုက်နိုင်သည့် အခြေအနေဖြစ်သည်ဟုဆိုသည်။

“အဲ့ဒီစက်ရုံက အသံအရမ်းဆူတာမကဘူး။ အနံ့ဆိုးတွေ ပြာမှုန်တွေလည်း ထွက်တော့ ကလေးတွေ ကျန်းမာရေးမကောင်းတဲ့သူတွေအတွက် စိုးရိမ်နေရပါတယ်။ အဲ့ဒါကို နေ့စဉ် ရှူနေရတော့ နေကောင်းတာတွေလည်း ပိုဖြစ်လာကြတယ်” ဟု နောက်ထပ် တီကျစ်ဒေသခံတစ်ဦးက ပြောသည်။

တီကျစ်ကျောက်မီးသွေး စက်ရုံမှ ထွက်ပေါ်နေသည့် စက်သံများနှင့် အနံ့အသက်များသည် တီကျစ်မြို့နှင့် အနီးအနားရှိ တောင်ပို့ကြီး၊ ဘုရားငါးဆူကျေးရွာများအထိပါ ဒုက္ခပေးနေသည်ဟု ဒေသခံများကပြောသည်။

ကျောက်မီးသွေးစက်ရုံသည် စီမံကိန်းစတင်သည့် ၂၀၀၀ နှင့် ၂၀၀၅ ခုနှစ်တွင် ဒေသခံပြည်သူများ၏ မြေ ဧက (၈၀၀)ကျော်ကို အတင်းအဓမ္မသိမ်းယူခဲ့သည့်အပြင် မြစိမ်းတောင်ရွာ(လယ်ကြားရွာ)နှင့် မြကန်သာရွာ(တောင်ပို့လရွာ) တို့လည်း ရွာလုံးကျွတ်ပြောင်းရွေ့ခိုင်းခဲ့သည်။

#MeKongNews
#တီကျစ်
#ကျောက်မီးသွေး
#ပင်လောင်း
#ပြည်သူ
#အနှောင့်ယှက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)