မဲခေါင်၊ ဒီဇင်ဘာ ၁၆
စစ်ကောင်စီတပ် ပြန်သိမ်းထားသော ဆီဆိုင်မြို့နယ်၊ ထီမန်း ကျေးရွာခံများ၏ တောင်ယာ မြေကွက်များကိုစစ်ကောင်စီတပ်က ခြံစည်းရိုးများ အဓမ္မ ကာထားပြီး မြေမြုပ်မိုင်းများပါ ထောင်ထားခဲ့ကြောင်း ဒေသခံများထံမှ သိရသည်။
ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသရှိ ထီးမန်းကျေးရွာ အရှေ့ဘက်နှင့် အနောက်ဘက်တွင် စစ်တပ်သိမ်းမြေ စုစုပေါင်း ဧက ၇၀၀ ရှိပြီး ယင်းမြေ အားလုံးကို ပြီးခဲ့သည့် နိုဝင်ဘာလတွင် စစ်ကောင်စီ တပ်သားများက သံကြိုး၊ အုတ်တံတိုင်းဖြင့် အခိုင်အမာ လာကာထားပြီး မြေမြုပ်မိုင်းများပါ ထောင်ထားသဖြင့် လုံးဝဝင်၍ မရတော့ကြောင်း ဒေသခံများက ဆိုသည်။
“အရင်နှစ်တွေဆို ဝင်လို့ရတယ်၊ ပြီးရင် အဲ့မြေထဲကို စိုက်ပျိုးရေး လုပ်ချင်တယ်ဆိုရင် ဆန် ဒါမှမဟုတ် ပိုက်ဆံနဲ့ စစ်တပ်ဆီ အခွန်ဆောင်ပေးရတယ်။ ခုတော့ သူတို့ အကုန်ပိတ်တော့ ဝင်လို့ လုံးဝမရတော့ဘူး။ နောက်နှစ် တောင်သူတွေ ဘယ်လို စိုက်ပျိုးရေး လုပ်ရမလဲတောင် မသိတော့ဘူး။ “ဟု ဒေသခံ တောင်သူတစ်ဦးက မဲခေါင်သို့ ပြောသည်။
ယခုကဲ့သို့ ပိတ်လိုက်ခြင်းကြောင့် ပြီးခဲ့သည့် မိုးရာသီတွင် တောင်သူများ စိုက်ပျိုးထားသော ပဲစင်းငုံနှင့် ပြောင်းတချို့ကိုလည်း ရိတ်သိမ်းခွင့် မရတော့ကြောင်း ဒေသခံများက ဆိုသည်။
“ပြီးခဲ့တဲ့နှစ် တစ်နှစ်စာ စိုက်ပျိုးထားတဲ့ တောင်ယာ မသိမ်းရသေးဘဲ ခုလိုပိတ်တော့ စိုက်ထားတဲ့ တောင်သူတွေ တစ်နှစ်စာ နစ်နာရတယ်။ တချို့ဆို အော်တောင်ငိုတယ်၊ လဲကျ သတိမေ့ပြီး ဆေးရုံတင်ရတဲ့ တောင်သူတွေလည်း ရှိတယ်၊ တောင်သူတွေ စိတ်တော်တော် ထိခိုက်ကြရတယ်။ ကိုယ့်ရဲ့ ဘိုးဘွားပိုင်မြေမှာ ကိုယ်စိုက်ပျိုးခွင့်တောင် မရတဲ့ဘဝ တော်တော် ရင်နာဖို့ ကောင်းတယ်။ ကူညီပေးမယ့် သူလည်းမရှိဘူး”ဟု ဒေသခံတစ်ဦးက ပြောသည်။
ယင်းမြေများကို ပြန်လည်ရရှိရန် နယ်မြေ ထိန်းချုပ်သူ ပအိုဝ်းပြည်သူ့စစ် – PNO မှ ဦးခွန်အောင်ခမ်းထီ နှင့် ဦးခွန်စံလွင်တို့ကို ဒေသခံ တောင်သူများက အကူညီ သွားတောင်းသော်လည်း ငြင်းဆန်ခဲ့သည့် အပြင် စစ်တပ်ကို မဆန့်ကျင်ရန်လည်း ပြောခဲ့ကြောင်း ဒေသခံများက ဆိုသည်။
ဆီဆိုင်မြို့ မြောက်ဘက်ရှိ တောင်ကြီး – လွိုင်ကော်လမ်း အရှေ့ဘက် ဒေသခံ တောင်သူများ၏ မြေဧက ၃၀၀ နှင့် လမ်းအနောက်ဘက်ရှိ မြေဧက ၁၉၀၀ ကျော်ကို ဆီဆိုင်မြို့ရှိ ခမရ – ၄၂၃ နှင့် ခမရ – ၄၂၄ တပ်တို့က အတင်းအဓမ္မ သိမ်းယူခဲ့ခြင်း ဖြစ်ကြောင်း ဒေသခံများထံမှ သိရသည်။
ထိုသို့ သိမ်းယူပြီးနောက် တောင်သူများက ဆက်လက် စိုက်ပျိုးခဲ့ရာ ယင်းသီးနှံများကို စစ်ကောင်စီတပ်က ဖျက်ဆီးခဲ့သည့် အပြင် ပိုက်နက်ကျူးကျော်မှု ပုဒ်မ – ၄၄၇ ဖြင့်လည်း တရားစွဲခဲ့ကြောင်း ဒေသခံများက ပြောသည်။
ယင်းတရားစွဲခံရမှုတွင် တောင်သူ ၅၀ ဦးအထိ ပါဝင်ပြီး တရားရင်ဆိုင်ချိန် ၃ နှစ် ကြာခဲ့ကာ ရုံးချိန်း ၇၀ ကြိမ် တက်ရပြီးနောက် ၂၀၂၃ ခုနှစ် အောက်တိုဘာ၂၇ ရက်တွင် ဆီဆိုင်တရားရုံးက အမှုတစ်ခုကို ဒဏ်ငွေ ကျပ်တစ်သောင်းစီ တောင်သူများအပေါ် ချမှတ်ခဲ့ကြောင်း ဒေသခံများထံမှ သိရသည်။
#MeKongNews
#ဆီဆိုင်
#ဒေသခံမြေ
#စစ်ကောင်စီတပ်
#မြေမြုပ်မိုင်း
