မဲခေါင်၊ ဒီဇင်ဘာ ၂၁

ကယား(ကရင်နီ)ပြည်၊ လွိုင်ကော်မြို့၊ လွိုင်ကော်အကျဉ်းထောင်မှာ အကျဉ်းသားတွေအပေါ် ဖိနှိပ်မှု ပိုတိုးလာတယ်လို့ နိုင်ငံရေး အကျဉ်းသားဟောင်းတွေက ပြောပါတယ်။

ဒီဇင်ဘာလ ၁၆ ရက်နေ့က လွိုင်ကော် အကျဉ်းထောင်ကို ကရင်နီတော်လှန်ရေး အင်အားစုတွေ ဝင်ရောက် တိုက်ခိုက်ခဲ့ပြီးတဲ့ နောက်မှာ အကျဉ်းသားတွေ လွတ်မြောက်သွားတာမျိုး မရှိတဲ့အပြင် ထောင်တွင်း ဖိနှိပ်တွေ အရင်ထက် ပိုဆိုးလာတယ်လို့ ဆိုပါတယ်။

ကရင်နီ နိုင်ငံရေး အကျဉ်းသားများ အစည်းအရုံး (KAPP)ရဲ့ ပြန်ကြားရေး တာဝန်ခံ ကိုဇင်လင်းထွန်းက “အကျဉ်းသားတွေကို ဒိုင်းလုပ်ထားတာတွေ ကြားနေရတယ်ပေါ့နော်။ ဒါကလည်း ဖြစ်နိုင်ခြေတော့ ရှိတာပေါ့နော်။ စစ်သားတွေကလည်း အကြပ်တည်း ဖြစ်တဲ့ကာလမှာဆိုရင် ဖြစ်သွားနိုင်တာပေါ့။ ထောင်ဝင်စာကတော့ ၁၁၁၁ Operation မစခင်ကတည်းက ပို့ ဖြစ်ကြသေးတယ်။ နောက်ပိုင်းတော့ ထောင်ဝင်စာပို့လို့ မရတော့ဘူးလေနော်။ မြို့တွင်းမှာတောင်မှ သွားလာရတဲ့ အခြေအနေက အရမ်း ခက်ခဲတာကိုနော်” လို့ ပြောပါတယ်။

လတ်တလောမှာ ထောင်ဝင်စာ ပိတ်ထားတဲ့အပြင် အကျဉ်းသားတွေကိုလည်း အလုံခန်းမှာ ပိတ်လှောင်ထားတာကြောင့် စားနှပ်ရိက္ခာနဲ့ ရေလည်း ပြတ်လပ်နေတယ်လို့ သိရပါတယ်။

လွိုင်ကော် အကျဉ်းထောင်မှာ အကျဉ်းသားပေါင်း ၅၀၀ ကျော် ရှိပြီး နိုင်ကျဉ်း အနေနဲ့ ၁၄၀ ကျော် ပါဝင်တယ်လို့ ဆိုပါတယ်။

ဒါ့အပြင် စစ်ကောင်စီဘက်က ပြောင်းလာတဲ့ ထောင်အရာ ရှိတွေလည်း ဒီဇင်ဘာလအတွင်းမှာ ပိုများလာတာကြောင့် နိုင်ကျဉ်းတွေအတွက် ပိုပြီး ဖိနှိပ်မှာကို စိုးရိမ်ရတယ်လို့ ကိုဇင်လင်းထွန်းက ဆက်ပြောပြပါတယ်။

“သူက အခြေအနေ အမျိုးမျိုး ရှိတယ်။ ခုနား ပြောသလို အရပ်သား ဝန်ထမ်းတွေ ရှိတဲ့ ကာလမှာလည်း အခြေအနေ တစ်မျိုး ဖြစ်ပြီးတော့ စစ်ဖက်ကနေ ပြောင်းလာတဲ့ အရာရှိတွေ ရောက်လာတဲ့ အချိန်မှာလည်း နောက်တမျိုး ဖြစ်တယ်ပေါ့။ အစောပိုင်း ကာလမှာတောင် နိုင်ကျဉ်း ဆိုတာနဲ့ တော်တော်လေးကို ဖိနှပ်ချင်ကြတယ်ပေါ့။ ဒါပေမယ့် ဒီနောက်ပိုင်းမှာ ကျနော်တို့ကလည်း ထောင်ရဲ့ စည်းကမ်း ဥပဒေကို လိုက်နာပြီးတော့ အကျဉ်းသားရေးရာက ဆောင်ရွက်တဲ့အတွက် ဖိနှိပ်မှုကတော့ လျော့သွားတယ်ပေါ့။ ဒါပေမယ့် စစ်ဖက်ကနေ ပြောင်းလာတဲ့ အရာရှိတွေနဲ့တော့ လုံးဝ အဆင်မပြေဘူးပေါ့”

လက်ရှိ KPPA အနေနဲ့ နိုင်ငံရေးအကျဉ်းများ ကူညီစောင့်ရှောက်ရေးအသင်း (AAPP)၊ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPN)တို့နဲ့ ချိတ်ဆက်ပြီး လွိုင်ကော် အကျဉ်းထောင်ကနေ လွတ်မြောက်လာတဲ့ နိုင်ကျဉ်းဟောင်းတွေကို ကူညီဆောင်ရွက်ပေးနေတဲ့အပြင် ကရင်နီကြားကာလ အုပ်ချုပ်ရေးကောင်စီ (IEC)နဲ့လည်း လက်တွဲပြီး လစ်လပ်နေတဲ့ အုပ်ချုပ်ရေး ကဏ္ဍတွေမှာ ကူညီပေးနေတယ်လို့ တာဝန်ရှိသူတွေက ပြောပါတယ်။

CJ-007

#MeKongNews

#လွိုင်ကော်ထောင်

#နိုင်ငံရေး

#အကျဉ်းသား

#ဖိနှိပ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)