မဲခေါင်၊ ဩဂုတ် ၂၄
ကရင်နီပြည်၊ လွိုင်ကော်မြို့မှာရှိတဲ့ ခြေလျှင်တပ်ရင်း(ခလရ ၅၄)က ဒီးမော့ဆိုမြို့နယ်ကို လက်နက်ကြီး ဦးတည်ပစ်ခတ်နေတယ်လို့ ဒေသတွင်း စစ်ဘေးရှောင်တွေက ပြောပါတယ်။
ဒီနေ့ ဩဂုတ် ၂၃ ရက်နေ့ မနက်ပိုင်းမှာ လက်နက်ကြီး ၁၂ လုံး ပစ်ခတ်ခဲ့ပြီး ဒီးမော့ဆိုမြို့နယ် ၅ မိုင်နဲ့ ဟိုဖိတ်ကျေးရွာတွေမှာ ကျရောက်ပေါက်ကွဲခဲ့တယ်လို့ ဆိုပါတယ်။
“သူတို့ ပစ်ပြီဆိုရင် အနည်းဆုံး ၃ ရက်လောက် ဆက်တိုက်ပဲ။ ပစ်ပြီး နေ့ချင်းရပ်တယ်ဆိုတာ လုံးဝမရှိဘူး။ လောလောဆယ်တို့ လူထိတာ မကြားရသေးဘူး။ ကျမတို့က လက်နက်ကြီးသံကြားလို့ သိတာ။ နောက်ရက်တွေ ဆက်ပစ်ရင်တော့ မပြောတတ်ဘူး” လို့ စစ်ဘေးရှောင် တစ်ဦးက ပြောပါတယ်။
မဲခေါင်သတင်းဌာန အနေနဲ့ နေအိမ်အဆောက်အဦး ပျက်စီးဆုံးရှုံးမှုတွေ အပါအဝင် လူထိခိုက် သေဆုံးမှုတွေကို စုံစမ်းနေဆဲ ဖြစ်ပြီး စစ်ကောင်စီဖက်ကလည်း ဒီးမော့ဆိုမြို့နယ်တွင်းမှာ ကင်းထောက်လေယာဉ်တွေ ပျံဝဲနေတယ်လို့ သိရပါတယ်။
ပြီးခဲ့တဲ့ ၃ ရက်တာအတွင်း စစ်ကိုင်းတိုင်းဘက်က စစ်မှုထမ်း ခေါ်ယူထားသူတွေကို ရွှေညောင်မြို့ကတဆင့် ကရင်နီပြည်ကို ပို့ဆောင်နေပြီး ဒီးမော့ဆိုမြို့နယ်ကို စစ်ကြောင်းထိုးဖို့ ပြင်ဆင်နေတယ်လို့ ရှေ့တန်းတော်လှန်ရေး တပ်ဖွဲ့ဝင်တွေက သုံးသပ်ပါတယ်။
လွိုင်ကော် – ဒီးမော့ဆို လမ်းမကြီးနဲ့ ဟိုဖိတ် – စံပြ ၆ မိုင် – ပန်ကန်းလမ်းကို လတ်တလော အသုံးမပြုကြဖို့ တော်လှန်ရေး အင်အားစုတွေက သတိပေးထားပါတယ်။
MK-014
