မဲခေါင်၊ မတ် ၂၃
စစ်ကောင်စီ အုပ်စိုးခဲ့တဲ့ ခေတ်အဆက်ဆက် သင်ကြားခွင့် မရခဲ့တဲ့ တအာင်း စာပေကို လက်ရှိ ကိုယ်ပိုင် ပညာရေးစနစ်အဖြစ် အကောင်အထည်ဖော်နေဆဲ ကာလမို့ ရုန်းကန်နေရတယ်လို့ တအာင်း ပညာရေး ကော်မတီ-TNEC တာဝန်ရှိသူတွေက ပြောပါတယ်။
ရှမ်းပြည်နယ်ထဲမှာ တအာင်းအမျိုးသား ပညာရေး ကော်မတီ-TNEC က ဦးစီးပြီး စာသင်ကျောင်းပေါင်း ၅၀၀ ကျော်အထိ ဖွင့်လှစ်ဖို့ စီစဉ်ထားပေမယ့် တချို့ကျေးရွာတွေမှာ ညှိနှိုင်းနေရပြီး ကျောင်းအဆောက်အအုံနဲ့ ဆရာ အခက်အခဲကြောင့် ဒီနှစ်မှာ ကျောင်းပေါင်း ၄၀၀ ကျော်သာ ဖွင့်လှစ် နိုင်ခဲ့တယ်လို့ TNEC ထံက သိရပါတယ်။
“အောက်ခြေမှာ ဆရာ၊ ဆရာမ လုံလောက်မှု မရှိတာ။ တချို့ စာရေးကိရိယာပိုင်း ပြည့်ပြည့်စုံစုံ မရှိတာ။ လိုအပ်ချက်ရှိတယ်။ ကလေးတွေအတွက် ဖတ်စာအုပ် မလုံလောက်သလို ဆရာလမ်းညွှန်မရှိတဲ့အတွက် အခက်အခဲ အနည်းငယ်ရှိတယ်” လို့ CDM ဆရာမတစ်ဦးကပြောပါတယ်။
ပြီးခဲ့တဲ့နှစ် ဇူလိုင်လ အထိ ရှမ်းပြည်နယ် မြောက်ပိုင်းက ကျောက်မဲ၊ သီပေါ၊ နမ့်ဆန်၊ မန်တုံ၊ လားရှိုး၊ ကွတ်ခိုင်၊ မူဆယ်၊ နမ့်ခမ်း စတဲ့ မြို့နယ်တွေမှာ စာသင်ကျောင်းတွေ ဖွင့်လှစ်ထားပြီး ကျောင်းသူ၊ ကျောင်းသား ၂၅,၀၀၀ ကို ဆရာ၊ ဆရာမ ၁,၀၀၀ ဝန်းကျင်နဲ့ သင်ကြားပေးနေ သလို အလယ်တန်းနဲ့ အထက်တန်းအဆင့် သင်ကြားနိုင်ဖို့ အတွေ့အကြုံရင့် CDM ဆရာ၊ ဆရာမတွေ ဖိတ်ခေါ် ဖြည့်ဆည်းထားတယ်လို့ ဆိုပါတယ်။
“သင်ပေးမယ့် ဆရာ၊ ဆရာမ ရှိရင်တောင် ကလေးတွေ အတွက် စာသင်ရမယ့် နေရာနဲ့ ကျောင်းအဆောက် အအုံ မရှိတာက စိန်ခေါ်မှု တစ်ခု ဖြစ်နေပြီး TNEC က ကိုယ်ပိုင်စာသင်ကျောင်းတွေ မဆောက်နိုင်သေးတာ ကြောင့် ကျေးရွာ တချို့မှာ အစိုးရ စာသင်ကျောင်းတွေကိုပဲ အသုံးပြုနေရတယ်” လို့ တအာင်း ပညာရေး ကော်မတီ တာဝန်ရှိသူက ပြောပါတယ်။
လက်ရှိ တအာင်း စာပေကို ဒေသတွင်း လူဉီးရေရဲ့ ၂၀ ရာခိုင်နှုန်းသာ သင်ကြားပေးနိုင် သေးတယ်လို့ တအာင်းစာပေ ဖြစ်မြောက်ရေး အတွက် ဉီးဆောင်ပံ့ပိုးခဲ့တဲ့ တအာင်း အမျိုးသား ပညာရေး ကော်မတီ-TNEC ထံက သိရပါတယ်။
တအာင်းပညာရေး ကော်မတီ-TNEC ကို တအာင်း ကျောင်းသားနဲ့ လူငယ်အဖွဲ့-TSYU၊ တအာင်း အမျိုး သမီးအဖွဲ့-TWO၊ တအာင်း ဥပဒေ အထောက်အကူပြုအဖွဲ့-TLA၊ တအာင်း သံဃာတော်များအဖွဲ့ ဗဟို-TSA စတဲ့ အဖွဲ့အစည်းတွေ ပါဝင် ဖွဲ့စည်းထားတာ ဖြစ်ပါတယ်။
MK-010
