မဲခေါင်၊ ဇန်နဝါရီ ၁၄
ရုံးခန်းအတွင်းမှာ သမ္မတဦးဝင်းမြင့်ရဲ့ ဓာတ်ပုံ တွေ့လို့ဆိုပြီး ပင်လောင်းမြို့နယ် စည်ပင်ဦးစီးမှူးကို စစ်ထောက်လှမ်းရေးမှ ဇန်နဝါရီလ ၁၂ ရက်က ဖမ်းဆီးသွားတယ်လို့ စည်ပင်သာယာရေးဌာန သတင်းရင်းမြစ်တွေထံက သိရပါတယ်။
ရှမ်းပြည်နယ် တောင်ပိုင်း၊ ပအိုဝ်း ကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ် စည်ပင်သာယာရေးဌာနမှ အမှုဆောင်အရာရှိ ဦးဝင်းနိုင်ဦး ကို ရုံးခန်းအတွင်း သမ္မတဦးဝင်းမြင့်ရဲ့ ဓာတ်ပုံ တွေ့ရှိတယ်လို့ အကြောင်းပြပြီး စစ်ထောက်လှမ်းရေး-စရဖနဲ့ ရဲတပ်ဖွဲ့က ဖမ်းဆီးသွားတယ်လို့ ဆိုပါတယ်။
“ ၁၂ ရက်နေ့ညက စရဖနဲ့ ရဲက အင်အားအများကြီးနဲ့ လာဖမ်းသွားတာ။ ရုံးခန်းထဲမှာ အရင်က နံရံမှာ ချိတ်ထားတဲ့ ဓာတ်ပုံ တွေ့တယ်ဆိုပြီး ဖမ်းခေါ်သွားတာ။ အခုထိတော့ ဘာသတင်းမှ မရသလို ပြန်လည်း မလွတ်လာသေးဘူး” လို့ သတင်းရင်းမြစ်က ပြောပါတယ်။
ပင်လောင်းမြို့နယ် စာရင်းစစ်ရုံး ဝန်ထမ်းတွေ ဦးဝင်းနိုင်ဦး ရုံးခန်းထဲသို့ လာရောက်စဉ် သမ္မတဦးဝင်းမြင့်ရဲ့ ဓာတ်ပုံကို တွေ့တဲ့အတွက် စရဖထံ တိုင်းကြားခဲ့တာကြောင့် ဖမ်းဆီးခံရတာလို့ သတင်းထွက်ပေါ်နေပေမယ့် မဲခေါင်သတင်း အနေနဲ့ သီးခြား အတည်မပြုနိုင်သေးပါဘူး။
လက်ရှိ ဦးဝင်းနိုင်ဦး ကို ပင်လောင်းမြို့မရဲစခန်းမှာ စစ်ဆေးနေပြီး စစ်ကောင်စီက အရေးယူဖို့ ရှိ၊ မရှိ ကိုတော့ မသိရသေးပါဘူး။
ပင်လောင်းမြို့နယ်ဟာ စစ်ကောင်စီတပ်တွေနဲ့ PNO တပ်ဖွဲ့တွေ အများအပြား တပ်စွဲရာ ဒေသဖြစ်သလို ဆန္ဒပြကာလက လွဲပြီး တော်လှန်ရေး လှုပ်ရှားမှု မရှိတဲ့ ဒေသလည်း ဖြစ်ပါတယ်။
MK-008
