မဲခေါင်၊ ဇန်နဝါရီ ၂၆
ကချင်းပြည်နယ်၊ ဖားကန့်မြို့နယ်ရှိ စစ်တပ် စခန်း ၂ ခုကို KIA နဲ့ PDF တပ်ဖွဲ့က ဝင်ရောက် တိုက်ခိုက်ရာ စစ်သား ထိခိုက် သေဆုံးမှုများပြီး လက်နက်ခဲယမ်းတွေ သိမ်းဆည်းရရှိခဲ့တယ်လို့ ဒေသတွင်း သတင်းရင်းမြစ်ထံမှ သိရပါတယ်။
ဒီကနေ့ မနက် ၄ နာရီ ၃၅ မိနစ်မှာ ဖားကန့်မြို့နယ်၊ တာမခံရွာနဲ့ ဆယ်ဇင်းကျေးရွာတို့မှာ SNA နဲ့ စစ်ကောင်စီတပ်တွေ ပူးပေါင်း တပ်စွဲထားတဲ့ စခန်းကို KIA တပ်မဟာ (၉)၊ တပ်ရင်း (၂၆) က ဝင်ရောက် တိုက်ခိုက်ရာ စစ်သားတွေ လက်နက်စွန့်ကာ ထွက်ပြေး သွားတယ်လို့ သိရပါတယ်။
အဲဒီ တိုက်ခိုက်မှုအတွင်း လက်နက်ခဲယမ်းတွေ အပါအဝင် ရိက္ခာတွေကို သိမ်းဆည်းရရှိခဲ့ပြီး စစ်သားတွေ ထိခိုက် သေဆုံးမှု အများအပြား ရှိခဲ့တယ်လို့ သိရပါတယ်။
အလားတူ ဒီကနေ့ မနက် ၄ နာရီခန့်က ဖားကန့်မြို့နယ်၊ ကာမိုင်းမြို့မှာ တပ်စွဲထားတဲ့ စစ်တပ် ဗျူဟာကုန်းနဲ့ နမ့်ဆိုင်တပ်စခန်း ၂ ခုကို KIA တပ်မဟာ (၉)၊ တပ်ရင်း (၄၄) က တိုက်ခိုက်ခဲ့တယ်လို့ သိရပါတယ်။
အဲဒီ တိုက်ခိုက်မှုကြောင့် စစ်သားတွေ ထိခိုက်သေဆုံးမှု များပြားနေပြီး စစ်ကူ အမြန်ပေးဖို့ တောင်းဆိုနေကာ မြေပြင် စစ်ရေးတင်းမာနေပြီး သေဆုံးမှု အတိအကျ မသိရသေးဘူးလို့ KIA သတင်းရင်းမြစ်ထံမှ သိရပါတယ်။
ဒါ့အပြင် မနေ့က ည ၈ နာရီ ၄၅ မိနစ်ကလည်း ဖားကန့်မြို့၊ မှော်ဆီဇာ ဘုန်းကြီးကျောင်းဝင်း တာဝါတိုင်မှာ တပ်စွဲထားတဲ့ တပ်မ (၃၃) လက်အောက်ခံ တပ်ဖွဲ့ တွေကို KIA တပ်မဟာ (၉) တပ်ရင်း (၆)နဲ့ ဖားကန့်မြို့နယ် ပြည်သူ့ကာကွယ်ရေးအဖွဲ့ PDF တွေက တိုက်ခိုက်ခဲ့ပြီး စစ်တပ်စခန်းတွေကို မီးရှို့ဖျက်ဆီးနိုင်ခဲ့တယ်လို့ သိရပါတယ်။
စစ်ကောင်စီဘက်က သေဆုံးမှုတွေနဲ့ နောက်ဆုတ်ခဲ့ရတာကြောင့် မမှော်ဆီဇာ ဘုန်းကြီးကျောင်း နေရာအနှံ့သို့ ဖားကန့် တပ်မကုန်းစခန်းမှ လက်နက်ကြီး လက်နက်ငယ် တွေနဲ့ ပစ်ခတ်ခဲ့တယ်လို့လည်း သိရပါတယ်။
MK-003
#MeKongNews
