မဲခေါင် ၊ ဇန်နဝါရီလ ၁၈
တရုတ်-မြန်မာ အဓိက ကုန်သွယ်မှုပြုနေတဲ့ လမ်းမပေါ်က ပြင်ဦးလွင်မြို့နယ်၊ ဝက်ဝံကျေးရွာက X-ray စစ်ဆေးရေးဂိတ်မှာ စစ်ဆေးမှုတွေ တင်းကြပ်နေတာကြောင့် ကုန်တင်ယာဥ်အစီးရေ ၅၀ ကျော်ပိတ်မိနေတယ်လို့ ကုန်တင်ယာဉ်မောင်းတွေဆီက သိရပါတယ်။
ကုန်ပစ္စည်းသယ်ယူမှုကို တင်းတင်းကြပ်ကြပ် စစ်ဆေးနေတာဖြစ်ပြီး ပြီးခဲ့တဲ့ ၂ ရက်က နောင်ချိုမြို့ဘက်ကလာတဲ့ အဆင်း ကားအားလုံးကို ကုန်ကားနဲ့ အိမ်စီးကား မခွဲခြားဘဲ စစ်ဆေးခဲ့ပေမယ့် ဒီနေ့မှာတော့ ကုန်တင်ကားတွေကို အဓိကထားစစ်ဆေးနေတယ်လို့လည်း သိရပါတယ်။
“ စက်နဲ့စစ်တဲ့အပြင် လူနဲ့ထပ်စစ်တော့ ပိုပြီး အချိန်ကကြာတယ်။ စက်ထဲကဖြတ်ပြီး ကားကွင်းထဲဝင်တဲ့ ကားပေါ်က ဂျက်ဖာတွေကို ဖောက်စစ်သံစူးနဲ့ ထိုးစစ်တာတွေလုပ်တယ်။ ကုန်ပစ္စည်းတွေကို အဓိကထား စစ်တယ်၊ စာရွက်စာတန်းပြရတာတော့ မရှိဘူး၊ စစ်တာကိုစောင့်ပြီးမှ ကားထွက်ရတော့ အနောက်မှာ ကုန်ကားအစီး ၅၀ လောက် ပိတ်မိစောင့်နေရတာပေါ့လို့” ကုန်တင်ယာဥ်မောင်းတစ်ဦးက ဆိုပါတယ်။
၂၀၂၂ ခုနှစ် ကစပြီး ဝက်ဝံ X-ray စစ်ဆေးရေးဂိတ် ဟာ တင်းကြပ်တဲ့စစ်ဆေးမှုတွေ ပြုလုပ်ခဲ့တာကြောင့် မကြာခဏ ယာဉ်ကြောပိတ်ဆို့မှုတွေ ဖြစ်ပွားလျက်ရှိပြီး အနည်းဆုံး ၄ နာရီကနေ ၈ နာရီအထိ ကြာတယ်လို့ သိရပါတယ်။
“ အခုလိုစစ်ဆေးမှု တွေကြောင့် ကုန်တင်ပို့တဲ့ တန်ဆာခတွေကို အရင်လိုသတ်မှတ်နှုန်းနဲ့ ယူလို့မရတော့ဘူး လမ်းကြာချိန်ပါတွက်နေရပြီ၊ ၁ ရက်နဲ့ ရောက်တဲ့ခရီးက၊ ၂ ရက် လောက်ကြာနေတာဆိုတော့ တော်တော်အဆင်မပြေဘူး၊ ရပ်လိုက်သွားလိုက် လုပ်နေရတဲ့ အတွက် ဆီဖိုးက ပိုကုန်တယ်၊ ဖွင့်ဖေါက် စစ်ဆေးတာတွေကြောင့် ကုန်ပျက်စီးမှုတွေလည်း ရှိတယ်” လို့ မန္တလေး-မူဆယ် ကုန်တင်ပို့ဝန်ဆောင်မှု လုပ်ငန်းလုပ်ကိုင်သူတစ်ဦးက ပြောပါတယ်။
ပြီးခဲ့တဲ့ နှစ် ဒီဇင်ဘာလအတွင်းကလည်း ပဲခူးတိုင်း၊ ဝေါ မြို့နယ်က ရန်ကုန်-မော်လမြိုင်လမ်းပိုင်း ရန်ကုန် အဝင် ညောင်ခါးရှည် X-Ray စစ်ဆေးရေးဂိတ်မှာ အချိန်ကြန့်ကြာမှုတွေဖြစ်ခဲ့တဲ့အတွက် ကားတွေရာနဲ့ချီစောင့်ဆိုင်းရမှုကြောင့် ပြည်သူအများအဆင်မပြေမူတွေ ကြုံတွေ့ခဲ့ရပါတယ်။
စစ်ကောင်စီက ပြည်နယ်နဲ့တိုင်းအလိုက် အဓိကကျတဲ့နယ်နိမိတ်ထိစပ်တဲ့နေရာတွေ၊ အဓိကကျတဲ့ လမ်းပိုင်းတွေမှာ ခရီးသွားတွေနဲ့ ကုန်တင်ယာဉ်တွေကို တင်းတင်းကြပ်ကြပ် စစ်ဆေးတာတွေ ပြုလုပ်နေတာဖြစ်ပါတယ်။
MK-006
