မဲခေါင်၊ ဇွန် ၂၆
ဗုဒ္ဓဟူးနေ့က ဗင်နီဇွဲလားမြို့တော် ကာရာကတ်စ်အနီး ရှေ့ဆင့်နောက်ဆင့် လှုပ်ခတ်ခဲ့သော အင်အားပြင်းငလျင်နှစ်ခုကြောင့် သေဆုံးသူအရေအတွက်သည် အနည်းဆုံး ၂၃၅ ဦး ရှိလာခဲ့ကာ ဒဏ်ရာရရှိသူလည်း အနည်းဆုံး ၄၃၀၀ ဦးသို့ ရောက်ရှိနေပြီး ကယ်ဆယ်ရေးအဖွဲ့များကလည်း အဆောက်အဦး အပျက်အစီးများအောက် ပိတ်မိနေသူများကို အချိန်လု၍ ကယ်ဆယ်ရေးလုပ်ဆောင်နေကြသည်။
မြို့တော် ကာရာကတ်စ်နှင့် အနီးအနားမှ လာဂွါအီရာ ကမ်းရိုးတန်းမြို့တွင် အဆောက်အဦးများအောက်တွင် ပိတ်မိနေသူများ၏ ကယ်ဆယ်ပေးရန် အော်ဟစ်တောင်းဆိုသံများ ကြားနေရကြောင်း သိရသည်။
ပြင်းအား ၇ ဒသမ ၂ ရှိသော ငလျင်လှုပ်ခတ်ပြီးနောက် စက္ကန့်ပိုင်းအတွင်းမှာပင် ထို့ထက် အင်အားပြင်းသည့် ၇ ဒသမ ၅ ငလျင် ထပ်မံ လှုပ်ခတ်ခဲ့ကာ ဗဟိုချက်ကလည်း မြေတိမ်သောနေရာတွင် ဖြစ်ပေါ်ခဲ့သဖြင့် ပျက်စီးမှုများ ကြီးကျယ်သွားခဲ့ရသည်။
စာရင်းရရှိထားသော အရေအတွက်ထက် ပိုမိုများပြားသော လူများ သေဆုံးသွားသည်ဟု စိုးရိမ်နေကြပြီး နေအိမ်များပျက်စီးသွား၍ အိုးအိမ်မဲ့နေသူများကလည်း ပျက်စီးနေသော အဆောက်အအုံများတွင် ဝင်မနေရဲကြဘဲ လမ်းပေါ်မှာပင် အိပ်စက်နေကြသည်။
လူအများအပြား နေအိမ်တွင် ရှိနေသော အစိုးရ ရုံးပိတ်ရက် ညနေ ၆ နာရီ ၄ မိနစ်တွင် လှုပ်ခတ်ခဲ့သော ပထမငလျင်သည် မြေအောက် ၂၀ ဒသမ ၃ ကီလိုမီတာ၊ ပိုမိုအင်အားပြင်းသော ဒုတိယငလျင်က မြေအောက်အနက် ၁၀ ကီလိုမီတာကို ဗဟိုပြုခဲ့ကြောင်း သိရသည်။
ဗင်နီဇွဲလား ကြားဖြတ်အစိုးရ သမ္မတ ဒယ်ဆီ ရိုဒရီဂွက်ဇ်က အရေးပေါ် အခြေအနေ ကြေညာထားပြီး နိုင်ငံအများအပြားကလည်း အကူအညီပေးမည်ဟု ပြောကြားကြသည်။
အမေရိကန်အစိုးရက ဒေါ်လာ သန်း ၁၅၀ ကူညီမည်ဟု ကတိပေးထားပြီး ကယ်ဆယ်ရေးလုပ်ငန်းများ လျင်မြန်သွားစေရန် သယ်ယူပို့ဆောင်ရေးသင်္ဘောများ၊ လေယာဉ်များ ပို့ဆောင်ပေးသွားမည်ဖြစ်ကြောင်း စစ်ဘက်ကလည်း ထုတ်ပြန်ပြောကြားသည်။
အများအားဖြင့် လာဂွါအီရာ ကမ်းရိုးတန်းမြို့မှ ဖြစ်သော အဆောက်အဦး ၂၅၀ ခန့် ပျက်စီးသွားကြောင်း လွှတ်တော်ဥက္ကဌ ဂျော့ချ်ရိုဒရီဂွက်ဇ်က ပြောကြားသည်။
ဘီဘီစီ စိစစ်အတည်ပြုဌာနက စိစစ်ခဲ့ရာတွင်လည်း ဆယ်ထပ်ရှိသောဟိုတယ်တစ်လုံး အုတ်ပုံဘဝ ရောက်ရှိသွားပြီး ကြာသပတေးနေ့က ယင်းနေရာတွင် မိသားစုဝင်များက လာရောက်ရှာဖွေမှုလုပ်နေသည်ကို မြင်တွေ့ခဲ့ရသည်။
ရင်းနှီးသော သူငယ်ချင်းတစ်ယောက် သေဆုံးသွားကြောင်း အတည်ပြုထားပြီး အခြားသူငယ်ချင်းများက အပျက်အစီးများအောက် ရောက်နေသည်ဟု ယုံကြည်ရကြောင်း ကမ်းရိုးတန်းတွင် နေထိုင်သည်ဟု ၎င်းသိရှိထားသူ ၂၀ ဦးခန့် ပျောက်ဆုံးနေကြောင်း လူငယ်တစ်ဦးဖြစ်သူ ဟွမ်အော်တစ်က ပြောကြားသည်။
ကျနော် ထိတ်လန့် တုန်လှုပ်ပြီး ဘာမှ ကူညီမပေးနိုင်လို့လည်း စိတ်ပျက်နေပါတယ်”ဟု ကာရာကတ်စ်မြို့၌ ဆေးကျောင်းတက်နေသူ အော်တစ်က ဘီဘီစီ သတင်းဌာနကို ပြောကြားသည်။
အေးကျော်
Ref:BBC
#MeKongNews
#ဗင်နီဇွဲလားငလျင်
#သေဆုံးသူ
#အချိန်လု
#ကယ်ဆယ်ရေး
