မဲခေါင်၊ ဧပြီ ၂၉
ပြီးခဲ့သည့် ဧပြီ ၂၇ ရက်က အိန္ဒိယနိုင်ငံ အိုဒီရှာပြည်နယ်ရှိ ဂရာမင်းဘဏ်သို့ အမျိုးသားကြီးတစ်ဦး ငွေထုတ်ရန် ရောက်ရှိလာရာတွင် ဘဏ်ဝန်ထမ်းများက ဘဏ်အကောင့်ပိုင်ရှင် ကိုယ်တိုင်ပါမှ ထုတ်နိုင်မည်ဟု အကြိမ်ကြိမ် ပြောလွှတ်သောကြောင့် ယင်းအမျိုးသားသည် သေဆုံးပြီးဖြစ်သော အစ်မအလောင်းကို တူးဖော်ကာ အရိုးစုများကို ဘဏ်အထိ ထမ်းပိုးသယ်ဆောင်လာမှု ဟိုးလေးတကျော် ဖြစ်ပွားခဲ့သည်။
ဂျီတူမွန်ဒါဆိုသည့် ၆၅ နှစ်အရွယ် အမျိုးသားကြီးသည် ဇန်နဝါရီလက သေဆုံးခဲ့သော အစ်မဖြစ်သူ ကယ်လ်ရာမန်ဒါ ဘဏ်ငွေစုအကောင့်ကိုယူကာ ထိုအကောင့်ထဲတွင် ရှိသည့် ရူပီး ၂ သောင်း (၁၅၇ ပေါင်) ကို ဘဏ်မှထုတ်ယူရန် ဂရာမင်းဘဏ်သို့ ဆက်တိုက်သွားပြောခဲ့သော်လည်း အကောင့်ပိုင်ရှင်အစစ်ပါမှသာ ထုတ်ခွင့်ရမည်ဟု ဘဏ်ဝန်ထမ်းများက အကြိမ်ကြိမ် ပြောခဲ့ကြသည်။
ထို့ကြောင့်နောက်ဆုံး စိတ်ဆိုးဒေါသထွက်ကာ သင်္ချိုင်းသို့သွားပြီး အစ်မအလောင်း အရိုးစုအား တူးဖော်ကာ အဝတ်များဖြင့်ပတ်ပြီး ၁ ဒသမ ၈ မိုင် ခရီးနှင်ကာ အရိုးစုအား ဘဏ်သို့ ထမ်းသယ်လာခဲ့သဖြင့် ဘဏ်ဝန်ထမ်းများ အထိတ်တလန့်ဖြစ်သလို အရိုးစုသယ်လာသည့် ဗီဒီယိုမှတ်တမ်းသည်လည်း လူမှုကွန်ရက်များပေါ်တွင် အလွန်ပျံ့နှံ့သွားခဲ့သည်။
ထို့ကြောင့် ရွာသားများ သတင်းပေးသဖြင့် ဒေသခံရဲအရာရှိ ပရာဆက်ဆာဟူက ဘဏ်သို့လိုက်သွားခဲ့ရာ ဂျီတူအား အရိုးစုနှင့်အတူ ထိုင်နေသည်ကို တွေ့ရှိရသဖြင့် ဖျောင်းဖျပြီး အလောင်းအား ပြန်လည် မြှုပ်နှံစေကာ ဘဏ်တာဝန်ရှိသူများနှင့် ညှိနှိုင်းပေးခဲ့သည်။
၎င်း၏ အစ်မဖြစ်သူ ကယ်လ်ရာမန်ဒါ ဘဏ်အကောင့်ဖွင့်စဉ် ဒုတိယ ငွေထုတ်ခွင့်ပြုသူအဖြစ် အစ်ကိုအကြီးဆုံး နာမည်ကို ထားရှိသဖြင့် ဘဏ်ဘက်က လုပ်ထုံးလုပ်နည်းအတိုင်း ဂျီတူမွန်ဒါကို ငွေမထုတ်ပေးဘဲ ကာယကံရှင် အတင်းခေါ်ခိုင်းနေခဲ့ခြင်း ဖြစ်ကြောင်း၊ အိန္ဒိယကျေးလက်ဒေသများ၌ စာမတတ်ခြင်းနှင့် ဌာနဆိုင်ရာ လုပ်ထုံး လုပ်နည်းများတွင် တင်းကျပ်ကာ လာဘ်စားမှုများ ရှိသဖြင့် အများနည်းတူ ကယ်လ်ရာမန်ဒါ သေဆုံးမှုတွင်လည်း သေစာရင်းမလုပ်ခဲ့ဘဲ ၎င်းလွှဲအပ်ထားသည့် အစ်ကိုအကြီးဆုံးမှာလည်း သေဆုံးပြီဖြစ်ခြင်းကြောင့် ယခုလို ပြဿနာများ ရှုပ်ထွေးခဲ့ရခြင်း ဖြစ်သည်။
ထို့နောက် ဘဏ်ဝန်ထမ်းများ လုပ်ရပ်ကို သေချာ လေ့လာစုံစမ်းကာ အရေးယူမှုများ ထိုက်သင့်သလိုလုပ်သွားမည်ဟု အိန္ဒိယဘဏ္ဍာရေးနှင့် ဘေးအန္တရာယ်စီမံခန့်ခွဲရေးဝန်ကြီး ဆူရက်ပူဂျာရီက ပြောကြားခဲ့သည်။
ထိုအရိုးစုထမ်းလာသော ဗီဒီယိုကို လူမှုကွန်ရက်များပေါ်တွင်လည်း ဝေဖန်မှုများစွာ ရှိခဲ့ရာတွင် စာမတတ်သူ အသိုင်းအဝိုင်းများအပေါ် ဘဏ်များသာမက အုပ်ချုပ်ရေးပိုင်းအာဏာရှိ အသိုင်းအဝိုင်းအားလုံးက လူ့ဂုဏ်သိက္ခာထက် စာရွက်စာတမ်းကိစ္စများအပေါ်သာ ပိုမို ဦးစားပေးနေသည့် စနစ်ဆိုးဖြင့် ဆက်ဆံနေသည့် လုပ်ရပ်မျိုးဟု ဝေဖန် ရေးသားခဲ့ကြသည်။
ကိုကလင်း
Ref:Thesun
#MeKongNews
#ငွေထုတ်
#အကောင့်ပိုင်ရှင်
#အစ်မအရိုးစု
#ထမ်းလာ
