မဲခေါင်၊ ဧပြီ ၂၀
အပစ်ရပ် သီတင်း ၂ ပတ်အတွင်း ဒုံးကျည်နှင့်ဒရုန်းပစ်လွှတ်စင်များကို အီရန်၏ ပြန်လည်ဖြည့်တင်းနိုင်စွမ်းသည် စစ်ပွဲမတိုင်ခင်ကထက် ပိုမိုမြန်ဆန်လာခဲ့သည်ဟု အီရန်စစ်ဘက် ထိပ်တန်းကွပ်ကဲရေးမှူးတစ်ဦးက ပြောသည်။
အစားထိုးထားသော ဒုံးကျည်ပစ်လွှတ်စင်များ ၊ ဒရုန်းလွှတ်ကိရိယာများအား ရိုက်ကူးထားသော ဗီဒီယိုတစ်ခုကို UpScrolled လူမှုမီဒီယာပေါ်တွင် အီရန် တော်လှန်ရေးအစောင့်တပ်ဖွဲ့၏ လေကြောင်းနှင့်အာကာသတပ်ဖွဲ့ အကြီးအကဲ ဗိုလ်ချုပ်ကြီး ဆီရက်မာဂျစ်မူဆာဗီက ယမန်နေ့တွင် တင်ထားခဲ့သည်။
အီရန်နိုင်ငံ ၏ ဒုံးကျည်နှင့် ဒရုန်းပစ်လွှတ်စင်များကို ပြန်လည် ထုတ်လုပ်၊ အဆင့်မြှင့်တင်နိုင်စွမ်းသည် စစ်ပွဲမတိုင်မီကထက်ပင် မြန်ဆန်လာခဲ့ကြောင်းနှင့် အပစ်ရပ်ကာလအတွင်း ရန်သူ့ဘက်က အလားတူ အခြေအနေမျိုးကို မဖန်တီးနိုင်ကြောင်း မူဆာဗီက ဗီဒီယိုထဲတွင် ပြောကြားသည်။
ဧပြီ ၁၁ ရက်တွင် အပစ်အခတ်ရပ်စဲမှု စတင်ခဲ့ပြီးနောက်ပိုင်း အမေရိကန်သည် ကမ္ဘာ့အခြားတစ်ဖက်မှ လက်နက်များကို နည်းနည်းပါးပါးသာ သယ်ယူနိုင်ခဲ့သည်ဟု ၎င်းက ပြောသည်။
“သူတို့က စစ်ပွဲ ဒီအဆင့်ကိုလည်း ရှုံးနိမ့်သွားပါတယ်။ သူတို့က ရေလက်ကြားကိုလည်း ဆုံးရှုံးခဲ့ပါတယ်။ လက်ဘနွန်ကိုလည်း ဆုံးရှုံးခဲ့ပါတယ်။ သူတို့က ဒေသတစ်ခုလုံးကို ဆုံးရှုံးသွားပါတယ်” ဟု အီရန် တပ်မှူးက ပြောသည်။
အမေရိကန်နှင့် အစ္စရေးတို့၏ အီရန်အပေါ် သီတင်းပတ်များစွာကြာ ဆင်နွဲခဲ့သော စစ်ပွဲကြောင့် အီရန်၏ မဟာဗျူဟာမြောက် စွမ်းပကားများ အားနည်းသွားခဲ့ကြောင်း သတင်းများက ဖော်ပြနေကြချိန်တွင် အီရန်ဗိုလ်ချုပ်ကြီး၏ ပြောစကားများ ထွက်ပေါ်လာခြင်း ဖြစ်သည်။
အီရန်၏ ဒုံးကျည်စွမ်းရည်များသည် အားဖြည့်ကွန်ကရစ်များဖြင့် တည်ဆောက်ထားသည့် ကျယ်ပြန့်သော မြေအောက် သိုလှောင်ရေးကွန်ရက်အပေါ် အားပြုထားကြောင်း နှင့် ယင်းကွန်ရက်များမှာ အများအားဖြင့် မြေပြင်ပေါ်မှ ဗုံးကြဲတိုက်ခိုက်မှုများကို ခံနိုင်ရည်ရှိပြီး ပျက်စီးမှု မရှိကြောင်း အမေရိကန် ထောက်လှမ်းရေး သတင်းရင်းမြစ်များကို ကိုးကား၍ ဝေါလ်စထရိဂျာနယ်က ပြီးခဲ့သည့်သီတင်းပတ်တွင် သတင်းဖော်ပြခဲ့သည်။
မြေအောက် သိုလှောင်ရေးစခန်းများနှင့် ဖုံးကွယ်ထားသောနေရာများမှ ဆွဲထုတ်လာနိုင်သော တာလတ် နှင့် တာတိုပစ် ဒုံးကျည် ထောင်ပေါင်းများစွာကို အီရန်က ပိုင်ဆိုင်ထားဆဲဖြစ်ကြောင်း ဂျာနယ်သတင်းက ဆက်ပြောသည်။
အေးကျော်
Ref: Press TV
#MeKongNews
#ဒုံးကျည်ပစ်စင်
#ဖြည့်တင်းမှု
#ပိုမြန်
#အီရန်
