မဲခေါင်၊ မတ် ၇
အီရန်နိုင်ငံ၏ အကြွင်းမဲ့ လက်နက်ချမှုကသာ စစ်ပွဲအဆုံးသတ်ရန် တစ်ခုတည်းသော လက်ခံနိုင်သည့်နည်းလမ်းဖြစ်သည်ဟု အမေရိကန်သမ္မတ ဒေါ်နယ်ထရမ့်က တောင်းဆိုလိုက်ကာ တစ်ဖက်တွင်လည်း တီဟီရန်က ယင်းကို လက်သင့်ခံခဲ့ပါက နိုင်ငံ၏ စီးပွားရေး ပြန်လည်တည်ဆောက်ရန် ကူညီပေးမည်ဟုလည်း ပြောသည်။
ထရမ့်၏ တောင်းဆိုမှုသည် စစ်ပွဲအတွက် ယခင်က အီရန်၏ ဒုံးကျည်အစီအစဉ်နှင့် ရေတပ်အား ဖျက်ဆီးပစ်ရေးကိုသာ အဓိကထားခဲ့ကာ အမေရိကန်၏ ရည်ရွယ်ချက်များကို ချဲ့ထွင်မှုဖြစ်ပုံရသည်။
“အကြွင်းမဲ့ အညံ့ခံတာကလွဲလို့ အီရန်နဲ့ သဘောတူညီချက်ရှိမှာ မဟုတ်ပါဘူး” ဟု ထရမ့်က ၎င်း၏လူမှုကွန်ရက် Truth Social ပေါ်တွင် ပြောကြားသည်။
အီရန်မြို့တော် တီဟီရန်နှင့် ဘေရွတ်မြို့မှ ဟစ်ဇ်ဘိုလာ စခန်းများကို အစ္စရေးက အပြင်းအထန် ထိုးနှက်နေစဉ် ထရမ်ပို့စ်တက်လာခြင်းဖြစ်ကာ အီရန်အပေါ် အမေရိကန်၏ တိုက်ခိုက်မှုများ သိသိသာသာ များပြားလာဦးမည်ဟု အမေရိကန်ကာကွယ်ရေးဝန်ကြီး ပိဟက်ဆက်ကလည်း ပြောသည်။
အီရန်ဘက်က လက်နက်ချ အညံ့ခံခဲ့လျှင် အမေရိကန်နှင့် မဟာမိတ်များက အီရန်နိုင်ငံ လုံးဝပျက်စီးသွားခြင်းမှ ကာကွယ်ပြီး ယခင်ကထက် ပိုမိုကြီးမား၊ ကောင်းမွန်၊ ခိုင်မာသော စီးပွားရေး ဖြစ်လာစေရန် ကူညီသွားမည်ဟုလည်း ထရမ့်က ဆိုသည်။
“Make America Great Again” နိုင်ငံရေးကြွေးကြော်သံကို ချိတ်ဆက်၍ “MAKE IRAN GREAT AGAIN (MIGA!)” ဟု လည်း ထရမ့်က ရေးသားခဲ့သည်။
အီရန်က သဘောတူညီချက်ရယူရန် မိမိတို့ထံ ဖုန်းခေါ်ဆိုခဲ့ကြောင်း၊ သို့သော် အနည်းငယ်နောက်ကျသွားပြီဟု မိမိတို့က ပြန်ကြားခဲ့ကြောင်း ၎င်းက ကြာသာပတေးနေ့တွင် ပြောသည်။
“အခုဆိုရင် သူတို့ထက် ကျနော်တို့က ပိုပြီးတိုက်ခိုက်ချင်ပါတယ်” ဟု ၎င်းက ဆိုသည်။
အီရန်တွင် ဘာသာရေးခေါင်းဆောင်သစ် တက်လာရေးကိုလည်း ၎င်းအနေဖြင့် ဆန့်ကျင်မည်မဟုတ်ကြောင်း အီရန်ခေါင်းဆောင်သစ် ရွေးချယ်ရာ၌ အမေရိကန်ကလည်း ပါဝင်စွက်ဖက်လိုကြောင်းလည်း ၎င်းက ပြောသည်။
အေးကျော်
Ref: AFP
#MeKongNews
#အီရန်
#အကြွင်းမဲ့လက်နက်
#စစ်ပွဲပြီးဆုံး
#ထရမ့်
