မဲခေါင်၊ မတ် ၆
အရှေ့အလယ်ပိုင်းဒေသတွင် စစ်ရေးတင်းမာမှုများ မြင့်တက်လာခြင်းကြောင့် ထိုင်းနိုင်ငံအတွင်း စက်သုံးဆီပြတ်လပ်မှု မဖြစ်ပေါ်စေရန်အတွက် ဝန်ကြီးချုပ် အနုတင်က စက်သုံးဆီနှင့် ဓာတ်ငွေ့ (LPG) တင်ပို့မှုကို ယာယီပိတ်ပင်ရန် အမိန့်ထုတ်ပြန်လိုက်ကြောင်း သိရသည်။
ထိုင်းအစိုးရပြန်တမ်းတွင် ယနေ့ (မတ်လ ၆ ရက်) ၌ ဖော်ပြခဲ့သော အမိန့်အမှတ် ၂/၂၀၂၆ အရ ဓာတ်ဆီ၊ ဂတ်ဆိုဟော၊ ဒီဇယ်နှင့် လေယာဉ်ဆီ (Jet A1) အပါအဝင် LPG ဓာတ်ငွေ့များကို ပြည်ပသို့ တင်ပို့ခြင်းကို ချက်ချင်းရပ်ဆိုင်းရန် ညွှန်ကြားထားသည်။ ယင်းကန့်သတ်ချက်သည် နောက်ထပ် အကြောင်းကြားစာ ထုတ်ပြန်ခြင်းမရှိမချင်း အတည်ဖြစ်မည်ဟု ဆိုသည်။
အမေရိကန်၊ အစ္စရေးနှင့် အီရန်တို့အကြား တိုက်ခိုက်မှုများ ပြင်းထန်လာခြင်းကြောင့် ကမ္ဘာ့ရေနံသယ်ယူပို့ဆောင်ရေးတွင် အဓိကကျသော ပါရှန်းကွေ့နှင့် ဟော်မုဇ်ရေလက်ကြား (Strait of Hormuz) လမ်းကြောင်းများတွင် အခက်အခဲများ ကြုံတွေ့နေရသည်။ ထို့ကြောင့် ထိုင်းနိုင်ငံ၏ စက်သုံးဆီဖူလုံရေးအတွက် ၁၉၇၃ ခုနှစ် စက်သုံးဆီပြတ်လပ်မှု ကာကွယ်ရေးအက်ဥပဒေအရ ယခုကဲ့သို့ ကြိုတင်ကာကွယ်မှုများ ပြုလုပ်ရခြင်းဖြစ်ကြောင်း အစိုးရက ရှင်းလင်းထားသည်။
ယခုထုတ်ပြန်လိုက်သော ပိတ်ပင်မှုတွင် အိမ်နီးချင်းနိုင်ငံများဖြစ်သည့် မြန်မာနှင့် လာအိုနိုင်ငံများသို့ စက်သုံးဆီ တင်ပို့ခြင်းကိုမူ ကင်းလွတ်ခွင့်ပြုထားကြောင်း အမိန့်စာတွင် အတိအလင်း ဖော်ပြထားသည်။
ထို့အပြင် ပြန်လည်တင်ပို့ရန် (Re-export) အတွက် အကောက်ခွန်လွတ်ဇုန်များတွင် သိမ်းဆည်းထားသော ဆီများနှင့် ပြည်တွင်းအရည်အသွေးစံနှုန်းမမီသော ဆီများကိုလည်း တင်ပို့ခွင့် ဆက်လက်ပေးထားသည်။
ထိုင်းနိုင်ငံ၏ ယခုလုပ်ဆောင်ချက်သည် ပြည်တွင်းစက်သုံးဆီဖူလုံရေးကို အဓိကထားခြင်းဖြစ်သော်လည်း မြန်မာနိုင်ငံသို့ ဆက်လက်တင်ပို့ခွင့်ပေးထားခြင်းကြောင့် နယ်စပ်ကုန်သွယ်ရေးနှင့် စက်သုံးဆီလိုအပ်ချက်အပေါ် ရိုက်ခတ်မှုမရှိနိုင်ကြောင်း သုံးသပ်ထားသည်။
Ref: Khaosod English
#MeKongNews
#ထိုင်းနိုင်ငံ
#စက်သုံးဆီ
#မြန်မာ
#လာအိုနိုင်ငံ
