မဲခေါင်၊ ဖေဖော်ဝါရီ ၅

အမေရိကန်သမ္မတ ဒေါ်နယ်ထရမ့်၏ ဖိအားပေးမှုကြောင့် ပနားမားတူးမြောင်းရှိ ဆိပ်ကမ်း ၂ ခုမှ ဟောင်ကောင် ကုမ္ပဏီတစ်ခုကို နှင်ထုတ်ခဲ့ပြီးနောက်၊ ကြီးလေးသော ပေးဆပ်မှုများ ရှိလာလိမ့်မည်ဆိုသည့် တရုတ်နိုင်ငံဘက်က ခြိမ်းခြောက်မှုကို ပနားမားသမ္မတ ဟိုဆေးရာအူးလ်မူလီနိုက ပယ်ချလိုက်သည်။

တရုတ်အစိုးရ၏ ၎င်း၏နိုင်ငံအပေါ် ခြိမ်းခြောက်မှုကို ပြင်းထန်စွာ ပယ်ချကြောင်း သမ္မတ မူလီနိုက ၎င်း၏ လူမှုကွန်ရက် စာမျက်နှာမှတစ်ဆင့် ယမန်နေ့တွင် ပြောကြားခဲ့သည်။

ပနားမားတူးမြောင်းရှိ ဆိပ်ကမ်း ၂ ခုကို လုပ်ကိုင်ခွင့် ပေးထားသည့် ဟောင်ကောင်အခြေစိုက် CK Hutchison ကုမ္ပဏီ၏ စာချုပ်ကို ပနားမားတရားရုံးချုပ်က ပယ်ဖျက်လိုက်ပြီးနောက် ယခုကဲ့သို့ တင်းမာမှုများ ပေါ်ပေါက်လာခြင်း ဖြစ်သည်။

သမ္မတ မူလီနိုက သူ၏ လူမှုကွန်ရက်ပို့စ်တွင် ပေကျင်းအစိုးရကို ပြန်လည်တုံ့ပြန်ခဲ့ပြီး ပနားမားနိုင်ငံသည် တရားဥပဒေ စိုးမိုးမှုကို အလေးထားသော နိုင်ငံဖြစ်ကြောင်းနှင့် ဗဟိုအစိုးရ၏ သြဇာလွှမ်းမိုးမှု ကင်းစင်ပြီး လွတ်လပ်သော တရားစီရင်ရေးမဏ္ဍိုင်၏ ဆုံးဖြတ်ချက်များကို လေးစားလိုက်နာသော နိုင်ငံဖြစ်သည်ဟု အခိုင်အမာ ပြောကြားခဲ့သည်။

ပနားမား နိုင်ငံခြားရေးဝန်ကြီးဌာနကလည် ယင်းကိစ္စနှင့်ပတ်သက်၍ ထုတ်ပြန်ချက်တစ်စောင် ထုတ်ပြန် သွားမည်ဖြစ်ပြီး သင့်လျော်သော ဆုံးဖြတ်ချက်များကို ချမှတ်သွားမည်ဟု ၎င်းက ထပ်လောင်းပြောကြားခဲ့သည်။

ပနားမားတူးမြောင်းရှိ CK Hutchison ၏ ဆိပ်ကမ်းလုပ်ပိုင်ခွင့် ဆုံးရှုံးသွားခြင်းသည် လက်တင်အမေရိက ဒေသအတွင်း အမေရိကန်နှင့် တရုတ်တို့အကြား ဖြစ်ပွားနေသော ဩဇာလွှမ်းမိုးမှုနှင့် ကုန်သွယ်ရေးဆိုင်ရာ အားပြိုင်မှု၏ ပြယုဂ်တစ်ခု ဖြစ်လာခဲ့သည်။

ပြီးခဲ့သည့်နှစ်တွင် သမ္မတ ထရမ့်က ပနားမားတူးမြောင်းကို ထိန်းချုပ်မည်ဟု ခြိမ်းခြောက်ခဲ့ပြီး စစ်ရေးအရ အရေးယူမည်ဟုပင် သတိပေးကာ CK Hutchison ၏ စာချုပ်များကို ဖျက်သိမ်းရန် တောင်းဆိုခဲ့ပြီးနောက် တင်းမာမှုများ မှာ အထွတ်အထိပ်သို့ ရောက်ရှိလာခဲ့ခြင်းဖြစ်သည်။

CK Hutchison ၏ လုပ်ပိုင်ခွင့်မှာ ဖွဲ့စည်းပုံအခြေခံဥပဒေနှင့် မညီညွတ်ကြောင်း ပြီးခဲ့သည့် သီတင်းပတ်တွင် ပနားမားတရားရုံးချုပ်က ဆုံးဖြတ်ခဲ့သည်။

ထိုဆုံးဖြတ်ချက်အပေါ် တရုတ်အစိုးရ၏ ဟောင်ကောင်နှင့် မကာအိုရေးရာရုံး (HKMAO) က အဓိပ္ပာယ် မရှိသကဲ့သို့ ရှက်ဖွယ်ကောင်းသည်ဟု ဖော်ပြခဲ့ပြီး ယင်းလက်တင်အမေရိကနိုင်ငံ အနေဖြင့် နိုင်ငံရေးအရရော စီးပွားရေးအရပါ ကြီးလေးသော ပေးဆပ်မှုများ ရှိလာလိမ့်မည်ဟု သတိပေးခဲ့သည်။

ပနားမား အာဏာပိုင်များအနေဖြင့် လက်ရှိအခြေအနေကို သိရှိနားလည်ရမည်ဖြစ်ပြီး ၎င်းတို့၏ လမ်းစဉ်ကို ပြန်လည် ပြင်ဆင်ရမည်ဖြစ်သည်ဟု HKMAO ကဆိုသည်။

Ref: Aljazeera
#MeKongnews
#ပနားမားတူးမြောင်း
#တရုတ်
#ခြိမ်းခြောက်မှု
#ဂရုမစိုက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)