မဲခေါင်၊ ဇန်နဝါရီ ၃၀
ဟောင်ကောင်အခြေစိုက် CK Hutchison ကုမ္ပဏီ၏ လက်အောက်ခံလုပ်ငန်း တစ်ခုက ရယူထားသော ဆိပ်ကမ်းလုပ်ငန်း ကန်ထရိုက်များကို ပနားမားတရားရုံးချုပ်က ပယ်ဖျက်လိုက်ကာ စာချုပ်များမှာ အခြေခံဥပဒေနှင့် မကိုက်ညီကြောင်း ပြောကြားသည်။
CK Hutchison ကုမ္ပဏီ၏ လက်အောက်ခံလုပ်ငန်းဖြစ်သည့် Panama Ports Company က ပနားမားတူးမြောင်း တစ်ဖက်စီတွင်ရှိသော ပစိဖိတ်နှင့် အတ္တလန်တစ် ဝင်ပေါက်များရှိ ဆိပ်ကမ်းများကို လုပ်ကိုင်ရန် ၁၉၉၀ ပြည့်လွန်နှစ်များကတည်းက ကန်ထရိုက်စာချုပ်များ ချုပ်ဆိုထားခဲ့သည်။
ဆိပ်ကမ်းနှစ်ခုအား တည်ဆောက်၊ လည်ပတ်၍ စီမံခန့်ခွဲရန် အစိုးရနှင့် Panama Ports Company ကြားက ကန် ထရိုက်စာချုပ်ကို ခိုင်မာအောင် ပံ့ပိုးပေးထားသော ဥပဒေများ၊ ဥပဒေသများသည် အခြေခံဥပဒေနှင့် မညီညွတ်ကြောင်း တွေ့ရှိခဲ့သည်ဟု ပနားမားတရားရုံးချုပ်က ပြောသည်။
ကမ္ဘာ့ကုန်သွယ်ရေး လမ်းကြောင်းများအပေါ် အမေရိကန်၊ တရုတ် ပြိုင်ဆိုင်မှုကြီးထွားလာစဉ် ပနားမားဆုံးဖြတ်ချက် ထွက်ပေါ်လာခဲ့ခြင်းဖြစ်ကာ အမေရိကန်ဘက်က အနိုင်ရခြင်းအဖြစ် ရှုမြင်ကြသည်။
အမေရိကန်သမ္မတ ဒေါ်နယ်ထရန့်ကလည်း ကမ္ဘာ့ရေကြောင်း ကုန်သွယ်မှု ၅ ရာခိုင်နှုန်း ဖြတ်သန်းသွားသော ရေလမ်းကြောင်းအပေါ် အမေရိကန်ထိန်းချုပ်မှုကို တိုးမြှင့်ရန်နှင့် တရုတ်တို့၏ ဩဇာကျဆင်းသွားစေရန် တွန်းအား ပေးနေသည်။
ပနားမားတူးမြောင်းကို ၁၉၀၀ ပြည့်လွန်နှစ်များတွင် အမေရိကန်က တည်ဆောက်လုပ်ကိုင်ခဲ့ပြီး ၁၉၉၉ ခုနှစ်တွင် ပနားမားအစိုးရထံ လွှဲပြောင်းပေးခဲ့သည်။
တရားရုံးဆုံးဖြတ်ချက်ကို မိမိတို့အား အသိပေး အကြောင်းကြားခြင်း မရှိသေးသော်လည်း တရားရုံးဆုံးဖြတ်ချက်သည် ဆိပ်ကမ်းများကို လုပ်ကိုင်ခွင့်ပြုခဲ့သည့် ဥပဒေမူဘောင်များ၊ ဥပဒေများနှင့် ကိုက်ညီမှုမရှိဟု သဘောထားကြောင်း Panama Ports Company ပြောသည်။
တရုတ်လုပ်ငန်းများ၏ ဥပဒေနှင့်ညီသော ရပိုင်ခွင့်နှင့် အကျိုးစီးပွားများကို ကာကွယ် စောင့်ရှောက်ရန် လိုအပ်သောအစီအစဉ်၊ အတိုင်းအတာအားလုံးကို တရုတ်အစိုးရက လုပ်ဆောင်သွားမည် ဖြစ်ကြောင်း ပနားမားဆုံးဖြတ်ချက်နှင့် ပတ်သက်၍ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဝေါင်ကျားခွန်က ဆိုသည်။
အေးကျော်
Ref: Reuters
#MeKongNews
#တရုတ်ကုမ္ပဏီ
#ဆိပ်ကမ်းစာချုပ်
#ပနားမားတရားရုံး
#ပယ်ဖျက်
