မဲခေါင်၊ ဇန်နဝါရီ ၂၂
ဆီးရီးယားသမ္မတဟောင်း ဘာရှားအယ်လ်အာဆတ်၏ ဦးလေးတော်စပ်ပြီး ဒုသမ္မတဟောင်းလည်းဖြစ်သူ ဟားမားမြို့မှ သားသတ်သမားဟု နာမည်ဆိုးဖြင ့်ကျော်ကြားခဲ့သော အသက် ၈၈ နှစ်အရွယ် ရီဖတ်အယ်လ်အာဆတ်သည် ပြည်ပြေးဘဝဖြင့် ဇန်နဝါရီ ၂၁ ရက်က ဒူဘိုင်းတွင် သေဆုံးခဲ့ပြီဖြစ်သည်။
ရီဖတ်သည် စစ်တပ်အကြီးအကဲ့ဟောင်း ဖြစ်ကာ ၁၉၇၀ ပြည့်နှစ်က ဆီးရီးယားတွင် စစ်အာဏာသိမ်းရာ၌ အစ်ကိုတော်သူ ဟာဖက်ဇ် အယ်လ်အာဆက် သမ္မတ ဖြစ်လာစေရေး အကူအညီပေးခဲ့သူ ဖြစ်သလို ၁၉၈၂ ခုနှစ်က ဟားမားမြို့ အစ္စလာမ္မစ်အုံကြွမှုအား နှိမ်နင်းခဲ့ရာ၌ အရက်စက်ဆုံး သတ်ဖြတ်ခဲ့သူ ဖြစ်သောကြောင့် ဟားမားမြို့မှ သားသတ်သမားဟု နာမည်ရခဲ့သူလည်း ဖြစ်သည်။
နောက်ပိုင်းတွင် ရီဖတ်သည် အစ်ကိုဖြစ်သူ ဟာဖက်ဇ်ထံမှ အာဏာသိမ်းရေး ကြိုးပမ်းခဲ့ရာ မအောင်မြင်ခဲ့သဖြင့် ပြည်ပြေးဘ၀ ရောက်ခဲ့ပြီး သေဆုံးသည်အထိ သမ္မတဖြစ်လိုစိတ်ကို မလျှော့သွားခဲ့ကြောင်း ရင်းနှီးသည့် အသိုင်းအဝိုင်းက ဆိုသည်။
၂၀၀၀ ပြည့်နှစ်တွင် ဟာဖက်ဇ်သေဆုံးပြီးနောက် ဆီးရီးယား အချုပ်အခြာအာဏာအား တူတော်သူ ဘာရှားအယ်လ်အာဆတ်အား လွှဲပေးရာတွင်လည်း ရာဖတ် ကန့်ကွက်ခဲ့ကာ မိမိသာလျှင် ဆီးရီးယားအာဏာကို ဆက်ခံသင့်သူဟု ဟစ်ကြွေးခဲ့သည်။
သို့ရာတွင် တူဖြစ်သူ ဘာရှားက ပြည်တော်ပြန်ရန် ခွင့်ပြုကာ ပြန်ခေါ်ခဲ့သဖြင့် ၂၀၂၁ တွင် ဆီးရီးယားသို့ ပြန်လာခဲ့သော်လည်း ၂၀၂၄ ခုနှစ်တွင် ဘာရှား အာဏာပြုတ်ကျကာ ရုရှားသို့ ထွက်ပြေးသွားရသဖြင့် တစ်ဖန် ပြည်ပြေးဘ၀ ရောက်ခဲ့ပြီး နောက်ဆုံး ယူအေအီးတွင် သေဆုံးသွားခဲ့ခြင်းဖြစ် သည်။
ရီဖတ်အယ်လ်အာဆတ်သည် ဂျီနီဗာတွင်အခြေချကာ ပြင်သစ်နှင့် စပိန်တို့တွင်လည်း စီးပွားရေးလုပ်ငန်းများစွာ လုပ်ကိုင်ခဲ့ရာမှ ၂၀၂၀ ပြည့်နှစ်တွင် ကြွယ်၀မှု ပေါင်းသန်း ၁၀၀ ရှိသည့် မီလျံနာဖြစ်လာခဲ့ပြီး ထိုစဉ်က ပြင်သစ် တရားရုံးတစ်ခုက ဆီးရီးယားအစိုးရပိုင် ရန်ပုံငွေ သန်းပေါင်းများစွာကို အိမ်ခြံမြေ လုပ်ငန်းများတွင် ထည့်ဝင် ရင်းနှီးခဲ့သည်ဟုဆိုပြီး အပြစ်ရ ှိကြောင်း ဖော်ထုတ်ခဲ့ပြီး ထောင်ကျရမည့်အရေးမှ တူဖြစ်သူ ဘာရှားက ကာကွယ်ပေးနိုင်ခဲ့သဖြင့် လွတ်မြောက်ခဲ့သူ ဖြစ်သည်။
ဘာရှားသည် ၂၀၂၄ ဒီဇင်ဘာလတွင် တော်လှန်ရေး အဖွဲ့များ မြို့သိမ်းပြီး အာဏာရယူသွားသဖြင့် ဆီးရီးယားအား အာဆတ် မိသားစုက အစဉ်အဆက် နှစ် ၅၀ ကြာ အုပ်စိုးခဲ့မှု ရပ်တန့်သွားခဲ့သည်။
ကိုကလင်း
Ref: Thesun
#MeKongNews
#ဟားမားမြို့
#သားသတ်သမား
#အာဆတ်
#ဦးလေး
#သေဆုံး
