မဲခေါင်၊ ဇန်နဝါရီ ၂၂
ဥရောပသမဂ္ဂအတွက် အကာအကွယ်အဖြစ် ပူးတွဲစစ်တပ် တစ်ရပ်ထူထောင်ရန် အီးယူက လုပ်ဆောင်သင့်ကြောင်း ဒါးဗို့စ်မြို့၌ အစည်းအဝေးများမစခင် တစ်ရက်တွင် စပိန်နိုင်ငံခြားရေးဝန်ကြီး ဟိုဆေးမန်နျူရယ် အယ်လ်ဘာရက်စ်က တိုက်တွန်းလိုက်သည်။
၎င်းတို့၏ ကာကွယ်ရေးလုပ်ငန်းများကို စနစ်တကျ ပူးပေါင်းနိုင်ရန် ထိရောက်သော ပိုင်ဆိုင်မှုများကို အတူပေါင်းစည်းရေးကို အီးယူက အရင်ဆုံး အာရုံစိုက်သင့်ပြီး နောက်ပိုင်းတွင် စိတ်တူကိုယ်တူ မဟာမိတ်အဖွဲ့ တစ်ခုအနေဖြင့် လှုပ်ရှားသင့်သည်ဟု အယ်လ်ဘာရက်စ်က ဆက်ပြောသည်။
ဥရောပသားများက စစ်ရေးအရ ပေါင်းစည်းရေးကို စိတ်အားထက်သန်ကြမည်လား ဆိုသည်မှာ ဆွေးနွေး ငြင်းခုံရမည့်ကိစ္စ ဖြစ်သော်လည်း သီခြားစီ ရပ်တည်နေသည့် အမျိုးသားစစ်တပ် ၂၇ ခုထက် ပူးပေါင်းအားထုတ်မှုက ပိုထိရောက်မည်ဟု ၎င်းက ဆိုသည်။
ဂရင်းလန်းအား ဝယ်ယူရန် သို့မဟုတ် သိမ်းပိုက်ရန် အမေရိကန်သမ္မတ ဒေါ်နယ်ထရမ့်၏ ခြိမ်းခြောက်မှုများ အပေါ် ပူးတွဲ တုံ့ပြန်နိုင်ရေး မည်သို့ ပူးပေါင်း လုပ်ဆောင်ကြမည်ကို ဆွေးနွေးရန် အီးယူခေါင်းဆောင်များက ဘရပ်ဆဲလ် မြို့၌ ယနေ့ နှောင်းပိုင်းတွင် အရေးပေါ် အစည်းအဝေးတစ်ရပ် ကျင်းပရန် ရှိနေစဉ် စပိန် နိုင်ငံခြားရေးဝန်ကြီး၏ မှတ်ချက်များ ထွက်လာခြင်းဖြစ်သည်။
“ဥရောပကာကွယ်ရေး စိတ်ကူးက အီးယူစတင်ခဲ့ကတည်းက ရှိခဲ့တာပါ။ ဒီတာဝန်ကို အပြီးသတ်ဖို့ ကျနော်တို့ မျိုးဆက်ပေါ်မှာ မူတည်ပါတယ်”ဟု အယ်လ်ဘာရက်စ်က ပြောသည်။
အီးယူအတွက် သီခြားစစ်တပ်မှာ နေတိုးအဖွဲ့ကို အစားထိုးရန် မရည်ရွယ်ကြောင်း အိန္ဒိယနိုင်ငံတွင် ရောက်ရှိနေ သော စပိန် နိုင်ငံခြားရေးဝန်ကြီးက ဆိုပြီး အမေရိကန်နှင့် မဟာမိတ်ပြုထားခြင်းမှာ အရေးပါသည်ကိုလည်း အသိအမှတ်ပြုသည်။
“ဒါပေမဲ့လည်း ဥရောပဟာ စစ်ရေးအရ ဒါမှမဟုတ် စီးပွားရေးအရ ခြိမ်းခြောက် အကျပ်ကိုင်လို့ရတဲ့ နေရာမဟုတ်ဘူး ဆိုတာကို ကျနော်တို့ ပြသဖို့လိုပါတယ်” ဟု ၎င်းက ဆက်ပြောသည်။
ဒေါ်နယ်ထရမ့်၏ လူမှုမီဒီယာကြေညာချက် ထွက်ပေါ်လာပြီး နောက်တွင်လည်း စပိန်နိုင်ငံခြားရေးဝန်ကြီး၏ ရပ်တည်မှုမှာ ပြောင်းလဲမသွားကြောင်း အကြီးတန်း နိုင်ငံခြားရေးဌာန အရာရှိကြီးတစ်ဦးက ဆိုသည်။
နေတိုးအတွင်းရေးမှူးချုပ် မာ့ခ်ရုတေးနှင့် အစည်းအဝေးတွင် ဂရင်းလန်းနှင ့်ပတ်သက်၍ သဘောတူညီချက် မူဘောင်တစ်ခု ရရှိပြီဖြစ်ကြောင်း ဒေါ်နယ်ထရမ့်က လူမှုမီဒီယာပေါ်မှ ကြေညာခဲ့သော်လည်း အီးယူခေါင်းဆောင်များ၏ အရေးပေါ် အစည်းအဝေးကို ဆက်လုပ်သွားမည်ဟု ဥရောပကောင်စီ ပြောခွင့်ရသူတစ်ဦးက အတည်ပြု ပြောကြားသည်။
အေးကျော်
Ref: Reuters
#MeKongNews
#ဂရင်းလန်း
#ပူးတွဲစစ်တပ်
#ဥရောပသမဂ္ဂ
#စပိန်
#တိုက်တွန်း
