မဲခေါင်၊ ဇန်နဝါရီ ၂
လိုအပ်သော ပြုပြင် ပြောင်းလဲမှုများ လုပ်ဆောင်ပြီး ဂျပန်အတွက် အင်အား တောင့်တင်းမှု၊ သာယာဝပြောမှုနှင့် မျှော်လင့်ချက်များ သယ်ဆောင်လာမည်ဟု ဂျပန်ဝန်ကြီးချုပ် ဆာနာအဲ တာကာအိချိက ၎င်း၏ နှစ်သစ်ကူး သတင်းစကားတွင် သန္နိဌာန်ပြုသည်။
နှစ်သစ်သည် ဂျပန်နိုင်ငံ၏ ယခင် ရှိုးဝခေတ် စတင်ပြီးနောက် နှစ်ပေါင်း ၁၀၀ ပြည့်သော နှစ်ဖြစ်ကြောင်း မှတ်ချက်ပြုကာ ပိုမို ကောင်းမွန်သော အနာဂတ် ဖြစ်လာနိုင်ခြေကို တာကာအိချိက ကြွေးကြော်သည်။
“မနက်ဖြန်ဟာ ဒီနေ့ထက် ပိုကောင်းလိမ့်မယ် ဆိုတဲ့ အားတက်သရော မျှော်လင့်မှုဟာ ရှိုးဝခေတ် ကာလအများစုမှာ ပြည်သူတွေ ရရှိခဲ့ကြတဲ့ မျှော်လင့်ချက် ဖြစ်ပါတယ်” ဟု ၎င်းက ဆိုသည်။
ဂျပန်နိုင်ငံနှင့် ဂျပန်ပြည်သူများ၏ အတွင်းအင်အားနှင့် တက်ကြွမှုတွင် ခိုင်မာသော၊ မယိမ်းယိုင်သော ယုံကြည်မှု၏ အားဖြည့်ပေးမှုဖြင့် ရှိုးဝခေတ်အတွင်း ကြီးမားသော အပြောင်းအလဲများကို ဖြတ်ကျော်ခဲ့သူများ၊ မိမိတို့ မတိုင်မီ ရှင်သန် နေထိုင်ခဲ့သူများ၏ ကြိုးပမ်း အားထုတ်မှုများနှင့် အမြော်အမြင်များမှ သင်ယူသွားချင်သည် ဟုလည်း ၎င်းက ဆိုသည်။
“ဒါ့အပြင် ကျမအနေနဲ့ အပြောင်းအလဲကို ကြောက်ရွံ့နေမှာ မဟုတ်ပါဘူး။ လိုအပ်တဲ့ ပြုပြင် ပြောင်းလဲမှုတွေကို ပြတ်ပြတ်သားသား တွန်းလုပ်သွားပါမယ်” ဟု ၎င်းက ဆက်ပြောသည်။
အောက်တိုဘာလတွင် အာဏာရလာပြီး နောက်ပိုင်း ၎င်းတို့အစိုးရက ထပ်ဆောင်း ဘတ်ဂျက်ကို အတည်ပြုလိုက် ခြင်းဖြင့် ပြည်သူလူထုကို ပေးထားသော ကတိကို ဖြည့်ဆည်းခဲ့ကာ တက်ကြွသော စီးပွားရေး၊ ခိုင်မာသော သံတမန်ရေးနှင့် လုံခြုံရေး တည်ဆောက်မှုဆီသို့ လမ်းကြောင်း တစ်ခုကို ချမှတ်နိုင်ခဲ့သည် ဟုလည်း ဝန်ကြီးချုပ် တာကာအိချိက ဆိုသည်။
တစ်ချိန်တည်းမှာပင် မိမိတို့ အစိုးရအဖွဲ့ က တာဝန်များ စတင်ရုံသာ ရှိသေးပြီး ရှေ့ဆက်သွားချိန်တွင် စိန်ခေါ်မှုများကို ကျော်လွှား သွားရမည်ကိုလည်း ၎င်းက အသိအမှတ်ပြုခဲ့သည်။
“ဂျပန်နိုင်ငံကို ပိုမိုအင်အား တောင့်တင်းအောင်၊ ပိုမိုကြီးပွား ချမ်းသာအောင် လုပ်ဖို့နဲ့ အဲဒီလို လုပ်ရင်း နိုင်ငံအတွက် မျှော်လင့်ချက် မြှင့်တင်သွားမယ်လို့ ဂျပန်ပြည်သူတွေကို ကျမ နှစ်သစ်ကူး အဓိဌာန်ပြုပါတယ်” ဟု ၎င်းက ဆိုခဲ့သည်။
အေးကျော်
Ref: Japan Times
#MeKongNews
#ပြောင်းလဲမှု
#ဂျပန်
#တာကာအိချိ
#သန္နိဌာန် ပြု
