မဲခေါင်၊ ဇန်နဝါရီ ၁၀
ထိုင်းအာဏာပိုင်တွေဟာ ငွေကြေးအလုံးအရင်းနဲ့ ရာဇဝတ်မှုကျူးလွန်ခဲ့မှု ၃ မှုကို ဖမ်းဆီးခဲ့ပြီးပါလျှက် မသိကျိုးကျွံပြု လွှတ်ပေးခဲ့မှု ၃ မှုကို ပြန်လည်စုံစမ်းဖော်ထုတ်သင့်ကြောင်း ထိုင်းနိုင်ငံဆိုင်ရာ ရာဇဝတ်မှုကျူးလွန်ခံရသူများ ကူညီစောင့်ရှောက်ရေးအသင်း ဥက္ကဌက အောက်လွှတ်တော်ထံ တိုက်တွန်းတင်ပြသွားပါတယ်။
ထိုင်း၊ မြန်မာ၊ ကမ္ဘောဒီးယား၊ လာအို စတဲ့ နိုင်ငံတွေဆီ အွန်လိုင်းငွေလိမ် ကျားဖြန့် ဒုစရိုက်လုပ်ငန်းကြီးတွေကို ကမ္ဘာချီလိမ်လည်နေတဲ့ တရုတ်ဒုစရိုက်ဂိုဏ်းများစွာ အခြေချလုပ်ကိုင်နေရာမှာ ဒေသဆိုင်ရာ အာဏာပိုင်တွေ၊ ရဲတပ်ဖွဲ့အကြီးအကဲမှသည် အောက်ခြေအထိ ပူးပေါင်းကာ အကျင့်ပျက် ခြစားမှုတွေကြောင့် ထိန်းမနိုင်သိမ်းမရဖြစ်နေခြင်းမှာ ထိုင်းအာဏာပိုင်တွေလည်း ကျယ်ကျယ်ပြန့်ပြန့်ပါဝင်နေခဲ့ကြောင်း ထောက်ပြ တိုက်တွန်းသွားပါတယ်။
ပထမတစ်ခုက ၂၀၂၂ ခုနှစ်မှာ ထိုင်းရဲတပ်ဖွဲ့ဟာ ကျားဖြန့်လုပ်ငန်းနဲ့ပတ်သက်တဲ့ ငွေကြေးခဝါချမှုအတွက် ၁၅ ယောက်ကို ဖမ်းဆီးခဲ့ပြီး ငွေကြေးနဲ့ပိုင်ဆိုင်မှု ဘတ်သန်း ၇၀၀ ကျော်ကို သိမ်းဆည်းခဲ့မှုဖြစ်ပါတယ်။ ဒီအမှုဟာ ဘန်ကောက်က တရုတ်ဒုစရိုက်ဂိုဏ်းက ဖွင့်လှစ်ထားတယ်လို့ သံသယရှိတဲ့ ကလပ်နဲ့ ပတ်သက်ဆက်နွယ်နေကြောင်း အထောက်အထားတွေ များစွာရှိခဲ့ပါတယ်။
ဒီအမှုကို ဘန်ကောက်မြို့ပြရဲတပ်ဖွဲ့ထံ လက်လွှဲပေးခဲ့ရာမှာ ထပ်မံစုံစမ်းအရေးယူမှု မလုပ်တဲ့အပြင် သိမ်းဆည်းထားတဲ့အထဲက ဘတ်သန်း ၁၀၀ နဲ့ ဇိမ်ခံကားတွေကိုပါ ပြန်ပေးခဲ့ပြီး ရဲချုပ်သက်တမ်းနှစ်ဆက်မှာ သံသယတရားခံတွေကို စစ်ဆေးအရေးယူမှု လုံး၀မရှိခဲ့ကြောင်း တင်ပြခဲ့ပါတယ်။
ဒုတိယ တစ်မှုကတော့ တရုတ်အမျိုးသမီးတစ်ဦးဆီက ဘန်ကောက်မြို့ပြရဲတပ်ဖွဲ့ဗျူရိုက ဘတ် ၇ သန်း အကျပ်ကိုင်ငွေညှစ်ခဲ့မှုဖြစ်ပြီး သက်သေတွေအရ စီနီယာရဲအရာရှိတွေအထိ ပါဝင်နေတာသိရပေမယ့် စုံစမ်းအရေးယူမှု လုံး၀မရှိဘဲ မျက်ကွယ်ပြုခဲ့မှုဖြစ်တယ်လို့ ဂရတ်နာတာပေါင်က ထပ်မံတင်ပြလာပါတယ်။
တတိယတစ်မှုကတော့ ကမ္ဘောဒီးယားနိုင်ငံ ပွိုင်ပတ်မှာရှိတဲ့ ကျားဖြန့်လုပ်ငန်းနဲ့ပတ်သက်တဲ့ ရာဇဝတ်မှုဖြစ်ပြီး ပွိုင်ပတ်မြို့က ကျားဖြန့်အဆောက်အအုံကြီး ၂ လုံးမှာ ထွက်ပြေးလွတ်မြောက်နိုင်ခြင်းမရှိဖို့ ပြတင်းတွေတံခါးတွေအားလုံး သံတိုင်တွေနဲ့ ထောင်သဖွယ် တည်ဆောက်ထားကြောင်း၊ ထိုင်းနိုင်ငံသားလို့ ယုံကြည်ရသူအမျိုးသားတစ်ယောက် ဒီပွိုင်ပတ် ကျားဖြန့်လုပ်ငန်းမှာ အလုပ်လုပ်ဖို့ သွေးဆောင်ခံရလို့ ရောက်ရှိသွားပြီး ၁၈ ထပ်မြင့်တဲ့ အဆောက်အအုံရဲ့ ၁၄ လွှာက ကျပြီး သေဆုံးခဲ့မှုကိုလည်း ထိုင်းအာဏာပိုင်အသီးသီးက စုံစမ်းစစ်ဆေးဖော်ထုတ်ဖို့ နှုတ်ဆိတ်နေခဲ့ကြောင်း အောက်လွှတ်တော်ထံ တင်ပြသွားတာဖြစ်ပါတယ်။
ဒီတင်ပြချက်နဲ့အတူ ထိုင်းမှာ နိုင်ငံအဆင့်အကြီးအကဲတွေ၊ ပြည်သူ့စစ်တွေ၊ ရဲအရာရှိတွေဟာ ဒုစရိုက်ကျားဖြန့်ဂိုဏ်းတွေဆီက သမာအာဇီ၀မဟုတ်ဘဲရတဲ့ အကျိုးအမြတ်တွေမှာ ကော်မရှင် ရယူခံစားနေကြပါတယ်။
တရုတ် ကျားဖြန့် ဒုစရိုက်ဂိုဏ်းတွေဟာ ဒီလို ဝန်ထမ်းဆိုးတွေကို စည်းရုံးပြီး SIM ကဒ်တွေ၊ ဘဏ်အကောင့်တွေ ဖွင့်လှစ်ပေးခြင်းနဲ့ တရားမဝင် လုပ်ငန်းတွေကို အာဏာပိုင်တွေရှေ့မှာပဲ ပြောင်ပြောင်းတင်းတင်း လုပ်ဆောင်နေနိုင်ကြတာပါ။
ဒါတွေကို လွှတ်တော်က စုံစမ်းစစ်ဆေးရေးကော်မရှင်ဖွဲ့ပြီး တည်နေရာ၊ အကျင့်ပျက်ခြစားရာ အာဏာပိုင်တွေကို စုံစမ်းဖော်ထုတ် အရေးယူခြင်းမရှိရင် ကာလရှည်ကြာ အမြစ်တွယ်နေတဲ့ ကျားဖြန့်နဲ့ ဒုစရိုက်လုပ်ငန်းပေါင်စုံဟာ ထိုင်းနိုင်ငံမှသည် အိမ်နီးချင်းနိုင်ငံတွေအထိ ပိုမိုကျယ်ပြန့်လာဖို့ သာရှိကြောင်း လွှတ်တော်ထံ တင်ပြတောင်းဆိုသွားပါတယ်။
Ref: Thai Enquirer
MKF-001
#MeKongNews
#ထိုင်းကျားဖြန့်
#ရဲအကျပ်ကိုင်
#ငွေညှစ်မှု
#အာဏာပိုင်
#မသိယောင်ဆောင်
