မဲခေါင်၊ ဖေဖော်ဝါရီ ၁၈
ယူကရိန်းနိုင်ငံ ဒိုးနက်စ်ဒေသရဲ့ အဗ်ဒစ်ကာမြို့ကို ယူကရိန်းတပ်တွေဟာ အောက်တိုဘာလကတည်းက ကြံ့ကြံ့ ခံလို့ ရုရှားထိုးစစ်ကို ဟန့်တားနေခဲ့ပေမယ့် မြို့ကို စွန့်ခွာနောက်ဆုတ်ပေးဖို့ အမိန့်ပေးလိုက်ကြောင်း ယူကရိန်း ကာကွယ်ရေးဦးစီးချုပ်သစ် အိုလက်ဆန္ဒား ဆာဆကီယီက ဖေဖော်ဝါရီ ၁၆ ရက်နေ့မှာ အတည်ပြုထုတ်ပြန်သွားပါတယ်။
ရုရှားတပ်တွေဟာ မြေပြင်ထိုးစစ်မှာ စစ်သည်အင်အား ၁၅၀၀၀ ကျော်ကို အသုံးပြုတိုက်ခိုက်နေချိန် လေကြောင်း ကလည်း ယူကရိန်းခံစစ်ကြောင်းဘက် တစ်နေ့ ဂလိုက်ဒါဗုံးအလုံး ၆၀ ထက်မနည်း ဆက်တိုက်ကျဲချနေသလို မတ်လ ရုရှားရွေးကောက်ပွဲမတိုင်ခင် အဗ်ဒစ်ကာမြို့ကို အပြီးသိမ်းဖို့ ပူတင်ဘက်က အမိန့်ပေးထားပြီး စစ်အင်အားအလုံးအရင်းထပ်တိုးမှာဖြစ်လို့ နိုင်ငံသားကောင်း စစ်သည်တွေအသက်ကို မစွန့်လွှတ်နိုင်လို့ ပိုကောင်းတဲ့ ခံစစ်ဇုန်နေရာဆီ တပ်ဆုတ်ခုခံသွားမှာဖြစ်တယ်လို့ ဆာဆကီယီက ရှင်းလင်းပြောကြားသွားပါတယ်။
ပြီးခဲ့တဲ့တစ်ပတ်ကမှ ကြည်းတပ်ချုပ်အဖြစ်ကနေ ကာကွယ်ရေးဦးစီးချုပ်အဖြစ် တင်မြှောက်ခံရတဲ့ ဆာဆကီယီ အတွက် ပထမဆုံးသော ဖိအားကို ကြုံရတာဖြစ်ပြီး ပိုမိုရဲရင့်လို့ ရုရှားကို အပြုတ်တိုက်နိုင်ရေး ဒီရာထူးပေးခဲ့တာ ဖြစ်ကြောင်း ယူကရိန်းသမ္မတ ဇီလန်းစကီးက ထောက်ခံပြောဆိုခဲ့တာကြောင့် တပ်ဆုတ်ရတဲ့ အမိန့်ပေးရမှုဟာ မျက်နှာပျက်စရာဖြစ်ခဲ့ရပါတယ်။
ဒါပေမဲ့ ဆာဆကီယီဟာ ခေါင်းမာပြီး ဘက်ခ်မတ်မြို့တိုက်ပွဲမှာ ၉ လကြာ ခုခံစေခဲ့တဲ့အတွက် ယူကရိန်းစစ်သည်များစွာ အသက်စွန့်ခဲ့ရလို့ တစ်ဖက်က ဝေဖန်မှုခံခဲ့ရသူဖြစ်ပါတယ်။
လက်ရှိမှာ အမေရိကန် လွတ်တော် အတွင်း ရီပါဘလစ်ကန်အမတ်တွေဘက်က ယူကရိန်းကို ထောက်ပံ့ဖို့ သမ္မတ ဂျိုးဘိုင်ဒန် အဆိုပြုထားတဲ့ ထောက်ပံ့ငွေ ဒေါ်လာ ၆၀ ဘီလီယံ မရရှိနိုင်သေးခြင်း၊ အီးယူနဲ့ အနောက်မဟာမိတ်တွေဆီက လက်နက် ထောက်ပံ့မှုတွေ နှောင့်နှေးခြင်းတွေကြောင့် အဗ်ဒစ်ကာစစ်မြေပြင်မှာ စစ်ပန်းပြီး လက်နက် အင်အားနည်းပါး တာကြောင့်လည်း ဆုတ်ခွာပေးလိုက်ရတာမျိုးဖြစ်ပါတယ်။
Ref: theweek
MKF-001
